Արթուր Մարտիրոսյանի «18,60» նկարների ցուցահանդեսը

Օրերս Հայաստանի նկարիչների միությունում կայացավ նկարիչ Արթուր Մարտիրոսյանի «18,60» խորագիրը կրող նկարների ցուցահանդեսը։

Արթուր Մարտիրոսյանը 1980-1985 թվականներին սովորել է Խ. Աբովյանի անվան Հայկական պետական մանկավարժական ինստիտուտի նկարչա-գծագրական ֆակուլտետում: 1989 թվականից մինչ օրս աշխատում է ՀՊՄՀ Գեղարվեստի ֆակուլտետի գունանկարի ամբիոնում: 1990 թվականից հանդիսանում է նկարիչների միության անդամ: 1985 թվականից մասնակցել է հանրապետական և միութենական ցուցահանդեսների: 1999 թվականից հետո չորս անհատական ցուցահանդեսով հանդես է եկել Ֆրանսիայում: 2007 թվականին «Հայաստան, իմ բարեկամ» ֆրանս-հայկական միջոցառման շրջանակներում ունեցել է անհատական ցուցահանդես, ինչպես նաև Գերմանիայում, Լիտվայում և Հայաստանում։

«Մեր մեջ կան մտքեր, որոնք բնությունը նկարելով հնարավոր չէ վերարտադրել, զգայություններ կան, որոնք որևէ իրատեսական նկարչության մեջ չես կարող վերարտադրել, և դու պետք է ստեղծես քո բնությունը, քո լանդշաֆտը, ստեղծես բոլոր այն հարթությունների կոմպոզիցիան, որի մեջ կտեղավորես քո գույները, որն էլ համահունչ կդառնա  քո մտքերին։

Բնությունը պետք չէ նկարել, որովհետև բարձրյալը  շատ լավ վրձին ունի, և արդեն ստեղծել է այն, իսկ երբ մենք ենք այն փորձում նկարել նկարում ենք ոչ թե բնությունը, այլ մեր զգայությունը բնության տեսքով»,- ասաց նկարիչը։

Այս նկարի պատմությունը նկարիչը ներկայացրեց այսպես.

— Այցելել էի Երնջատափ գյուղ, և հենց այնտեղ էլ հանդիպեցի մի տատիկի, բոլոր գյուղացիները ճանաչում, օգնում և կարեկցանքով էին վերաբերում նրան, քանի որ նա միայնակ էր ապրում և բավականին պատկառելի տարիք ուներ։ Մի օր այնտեղ գյուղի բնանկարն էի նկարում, երբ նա եկավ կանգնեց կողքիս և մենք սկսեցինք զրուցել, և քանի որ մենք  հին գերեզմանատան մոտ էինք գտնվում, նկատում էի, որ չնայած նրան, որ նրա տունը հեռվում էր գտնվում այնուամենայնիվ նա անընդհատ այդ հին գերեզմանատանն էր լինում, հետո իմացա, որ այնտեղ թաղված էին իր ընտանիքի անդամները, և նա մշտապես ցանկանում էր նրանց մոտ գտնվել, տպավորություն էր, որ հեռվում գտնվող իր տան մասին նա մոռացել էր, և իր տունն այստեղ էր՝ իր հարազատների կողքին։ Որոշեցի նկարել նրան այդ բնապատկերի մեջ, իր խոսող հայացքն ավելի պերճավոր էր բոլոր արտասանվող խոսքերից։

Արթուր Մարտիրոսյանը 2000 թվականից՝ ՅՈՒՆԵՍԿՕ-ի համաշխարհային կազմակերպության անդամ է, իսկ  2007 թվականին պարգևատրվել է ՀՀ մշակույթի նախարարության ոսկե մեդալով, 2007 թվականին կերտել է «Հայոց ցեղասպանություն» թեմայով հուշարձան, որը տեղադրված է Ֆրանսիայի Տուր քաղաքում:

Ցուցահանդեսը կգործի մինչև մայիսի 28-ը։

ԱՆԺԵԼԱ ՍԵԴՐԱԿՅԱՆ