«4 Գոտեմարտերից կառանձնացնեմ ադրբեջանցի մրցակցիս հետ պայքարը». Ըմբշամարտի Եվրոպայի չեմպիոն ՎԱԶԳԵՆ ԹԵՎԱՆՅԱՆ

Վերջերս Խորվաթիայի մայրաքաղաք Զագրեբում կայացած ազատ ոճի ըմբշամարտի Եվրոպայի առաջնությանը չեմպիոնի տիտղոսը նվաճեց մեր լավագույն ըմբիշներից Մ23 տարեկանների Աշխարհի չեմպիոն, ծնունդով Արարատի մարզի Փոքր Վեդի գյուղից ՎԱԶԳԵՆ ԹԵՎԱՆՅԱՆԸ։ Եվ ահա, Iravunk. com-ին հաջողվեց կապ հաստատել ու զրուցել Եվրոպայի նորընծա չեմպիոն Վազգենի հետ։

- Շնորհավորում ենք, Վազգեն, փայլուն հաղթանակի կապակցությամբ։

- Շատ շնորհակալ եմ ։Շատ ուրախ եմ, որ վերջապես կարողացա մասնակցել Եվրոպայի առաջնությանը և հաղթել։ Չորրորդ տարին էր, որ չէի կարողանում մասնակցել վնասվածքների պատճառով։ Հանդես եկա 65 կգ քաշային կարգում, մեկնարկային գոտեմարտս իսրայելցի մարզիկի հետ էր, որին հաղթեցի բացարձակ առավելությամբ 10։0 հաշվով, այնուհետև 4։1 հաշվով հաղթեցի ադրբեջանցի մրցակցիս ու այդպես դուրս եկա կիսաեզրափակիչ փուլ։ 12։4 հաշվով հաղթեցի Ուկրաինան ներկայացնող Առուշանյանին։ Այս մեդալը շատ կարևոր է ինձ համար, քանի որ առաջինն է մեծահասակների Եվրոպայի առաջնություններում։ Պարգևատրման արարողության ժամանակ պատվո հարթակին կանգնած աննկարագրելի զգացողություններ ապրեցի, երբ հնչեց մեր երկրի հիմնը, բարձրացավ Հայոց եռագույնը։ Ինձ համար շատ մեծ պատիվ է միջազգային մրցահարթակներում ներկայացնել Հայաստանը։

- Վազգեն, իսկ կարող ես առանձնացնել, թե որ գոտեմարտը առավել բարդ տրվեց։

- Ոսկե մեդալի ճանապարհին անցկացրածս 4 գոտեմարտերից կառանձնացնեմ ադրբեջանցի մրցակցիս հետ պայքարը, սակայն, ոչ նրա համար, որ մրցակիցս ադրբեջանցի էր։ Մի փոքր մրցումային լարվածություն կար։ Այս հաղթանակս նվիրում եմ մեր ամբողջ ազգին, հայ ժողովրդին։ Ինձ համար շատ սպասված հաղթանակ էր, մեդալ, որին ստացվեց հասնել միայն քրտնաջան ու թիմային աշխատանքի շնորհիվ։ Հատկապես մեծ է մարզիչների և մեզ հետ մարզվող ընկերների դերը։ Առանձնահատուկ շնորհակալ եմ իմ անձնական մարզիչ Ռաֆիկ Գոլեցյանին, այս հաղթանակի մեջ ունեցած աննկարագրելի ավանդի և մշտապես կողքիս լինելու համար։ Շնորհակալ եմ հարազատներիս, ինձ ոգևորելու համար։ Շնորհակալ եմ բոլորից շնորհավորանքների համար։ Շարժվում ենք առաջ։

- Իսկ հետագա ծրագրերի, անելիքների մասին ինչ կասես։

- Հաջորդ նպատակս Փարիզ 2024-ի օլիմպիական ուղեգիր նվաճելն է։ Պիտի աշխատենք այդ ուղղությամբ։ Անկախ բարձր արդյունքներից, ոսկե մեդալից, միշտ էլ ավելացնելու տեղ կա։ Պետք է աշխատեմ ավելի լավ մարզավիճակ ձեռք բերեմ, որովհետև Աշխարհի առաջնությունում ավելի ուժեղ մրցակիցներ են լինելու։

Իսկ ահա Վազգենի անձնական մարզիչը ՌԱՖԻԿ ԳՈԼԵՑՅԱՆԸ, Iravunk. com -ի հետ զրույցում, այսպես բնութագրեց իր սանին.

«Իմ սանը Վազգենը, շատ դաստիարակված, կշռադատված, շատ լավ մարզիկ է, աշխատասեր, պարտաճանաչ, շատ լավ ըմբիշ ։Մեր տքնաջան պարապմունքները տվեցին իրենց արդյունքը, ինչի համար շատ ուրախ եմ։ Առաջ Աստված։ Պիտի պատրաստվենք, առջևում Աշխարհի առաջնությունն է։ Հուսով եմ, որ Վազգենը կնվաճի ուղեգիր նաև Օլիմպիական խաղերին մասնակցելու համար։ Շատ մեծ հույսեր եմ կապում նրա հետ, իմ լավագույն սաներից է»։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ