Կոռուպցիայի նոր մեթոդ․ շուկայականից անհամեմատ ցածր գներով բնակարաններ պաշտոնյաններին

Իշխանափոխությունից հետո պետական պաշտոնյաները հատուկ թուլություն ունեն վարկերի նկատմամբ։ Համատարած շարժական ու անշարժ գույք են գնում, և որպեսզի չերևա, թե այս կարճ ժամանակում որտեղից հասցրեցին կուտակել այդ հսկայական ունեցվածքը, վարկեր են ձևակերպում ու ցույց տալիս, թե վարկերով են գնել։

Հիմա ո՞ւմ հաշվին են այս մարդիկ վարկերով այսպես համատարած բնակարան կամ այլ գույք գնում։ Պարզ չէ՞, որ պետության։ Պետությունից փողը վերցնում են ու լուծում իրենց խնդիրները։ Սա իրականում թաքնված կոռուպցիա է ու պետական միջոցների բացահայտ վատնում, որից լիուլի օգտվում են մերօրյա իշխանավորները: Այդ թվում ՔՊ-ական պատգամավոր Հովիկ Աղազարյանը, ով ինչպես ինքն է իր խոսքում նշել.«Բնակարանը ձեռք ենք բերել «Անի թաղամասում» 63  հազար դոլարով, հիպոթեքով, որի համար ամեն ամիս վճարում ենք այս պահին դեռ հիսուն հազար դոլար պարտք ունենք բանկին: Այդ բնակարանում ապրում ենք ես, կինս, որդիս ու նրա ընտանիքը, բոլորս ներդրում ենք ունենում հիպոթեքը վճարելու»: 

Նկատենք, որ «Անի» թաղամասը գտնվում է Արաբկիրում, որտեղ նորակառույցների գները սկսում են մինիմում 800 դոլարից: Մենք փորձեցինք տվյալ թաղամասի կառուցապատող ընկերությունից հետաքրքրվել, թե ինչ արժի տվյալ թաղամասում 1.քմ.-ը, որտեղից մեզ նախ նշեցին, որ տվյալ պահին վաճառքի բնակարան չկա տվյալ թաղանասում: Իակ ինչ վերաբերում է գներին, ապա շենքի հիմքը դնելու պահից բնակարանները ամրագրվել են 600 դոլարից սկսած մինչեւ 1000 ԱՄՆ դոլար: Հավելյալ հարցին, թե քանի՞ քառակուսիմետր բնակարան կարելի կլիներ ձեռք բերել 63 հազար ԱՄՆ դոլարով մեզ փոխանցեցին, որ ստույգ ասել չեն կարող, բայց մոտավորապես 60-65 քմ:

Շուկայականից անհամեմատ ցածր գներով բնակարաններ գնելը ներկա իշխանավորների մոտ, կարծես քարացած օրենք է դարձել:

Որպեսզի մերկապարանոց չհնչի ներկայացնում ենք վերը նշված մեխանիզմով բնակարան ձեռք բերած պաշտոնյանների հետ կապված փաստերը.

Եվ այսպես ՀՀ Պաշտպանության նախարար Սուրեն Պապիկյանը հիպոթեք է վերցնում 69 մլն դրամով մայրաքաղաքի կենտրոնում 165 քառակուսի մետր բնակարան ձեռք բերելու համար։

Հայտնի մյուս օրինակն էլ ԱԳՆ նախարար Արարատ Միրզոյանն է, ով վերջերս 280 հազար դոլարանոց առանձնատուն ձեռք բերեց ու կրկին հիպոթեքով։ Նախկինում ապառիկով հեռուստացույց հազիվ էր կարողանում ձեռք բերել, հիմա 280 հազար դոլարանոց առանձնատուն է գնում։

Կամ Ալեն Սիմոնյանը, որը իշխանափոխությունից շատ չանցած վաճառեց իշխանափոխությունից մեկ տարի առաջ 22 մլն դրամով գնած շուրջ 78 քառակուսի մետր բնակարանը 120 միլիոն դրամով և նույն մուտքում, նույն ժամանակահատվածում գնեց գրեթե կրկնակի մեծ՝ 145 քառակուսի մետր բնակարան, բայց ավելի ցածր գնով՝ 114 միլիոն դրամով։

Եվս մեկ առանձնատուն՝ 140 հազար դոլարով Ալեն Սիմոնյանի ընտանիքը ձեռք բերեց 2020 թվականին:

Կամ Նիկոլ Փաշինյանի աներձագը, որն իշխանափոխությունից հետո հասցրել է մի քանի շարժական ու անշարժ գույքի տեր դառնալ։

Ենթադրությունները թողնում ենք ընթերցողին:

ԻԼՈՆԱ ԱԶԱՐՅԱՆ