Ով է մեղավոր Նիկոլին իշխանության բերելու մեջ` ըստ Վանեցյանի

Ընդդիմադիր դաշտում վերջին շրջանում ամենաշատ քննարկված թեման բոլորովին էլ այն չէ, թե ինչպես են հեռացնելու Նիկոլ Փաշինյանին եւ իր թիմին իշխանությունից: Հատկապես սոցցանցերում ակտիվացել է հարցը, թե իրականում ո՞վ բերեց իշխանության Նիկոլ Փաշինյանին եւ ո՞ւմ շնորհիվ նա երկրորդ անգամ ընտրվեց 2021 թվականին: Այս մասին «Իրավունքը» պարզեց «Հայրենիք» կուսակցության նախագահ ԱՐԹՈՒՐ ՎԱՆԵՑՅԱՆԻ տեսակետը:

— Դուք ակտիվ դերակատարություն ունեիք 2018 թվականին տեղի ունեցած իրադարձություններում: Ի վերջո, Ձեր գնահատմամբ` ո՞վ է մեղավոր Նիկոլ Փաշինյանին իշխանության բերելու մեջ:

— Ուզում եմ հասկանալ` իմ դերակատարումը ո՞րն էր, այն էլ` ակտիվ: Ես ԱԱԾ աշխատակից եմ եղել, կատարել եմ իմ գործառույթները, ես որեւէ մասնակցություն այդ հեղափոխությանը, հեղաշրջմանը, ինչպես ուզում եք անվանեք, չեմ ունեցել: Իսկ ով է մեղավոր, թող յուրաքանչյուրն իր մեջ ման գա: Արդեն մոդայիկ չէ ասել, որ մենք եղել ենք փողոցում եւ պահանջել ենք Սերժ Սարգսյանի հրաժարականը, աջակցել ենք Նիկոլ Փաշինյանին: Բա ովքե՞ր էին այդ ժամանակ փողոցում: Հիմա ում հարցնում ես, ասում են՝ մենք չենք եղել: Բա ո՞վ է եղել, ո՞ւր են այդ մարդիկ:

— Պատերազմից հետո` Շուշիի անկումն իշխանությունը փորձում էր «ձեր գրպանը գցել»: Հիմա երեք տարի անց` որոշակի պարզություն կա՞ այս առումով, թե ո՞վ էր դավաճան, ով` ոչ:

— Արդեն անգամ անիմաստ եմ համարում մեկնաբանել այն անհեթեթությունները, որոնք արտահայտում են այս իշխանությունները: Խոսում են 5-րդ շարասյան մասին, մինչդեռ պատերազմից անցել է շուրջ երեք տարի, մինչ օրս մեղավորներ են ման գալիս: Ինչ-որ փուլում փորձեցին նաեւ ասել, թե Շուշիի հանձնման մեղավորներից մեկն էլ ես եմ: Ասում էին` պետք է դատվի եւ այլն, բայց երեք տարի է անցել, ու ինչպես տեսնում եք` որեւէ բան չկա: 5-րդ շարասյուն եթե կա մի երկրում, իրավապահ համակարգն ի՞նչ է անում: Երեք տարին հավատացեք` շատ մեծ ժամանակահատված է, որպեսզի, այսպես կոչված, 5-րդ շարասյունը բացահայտվի: 5-րդ շարասյուն տերմինը մտցրել են շրջանառության մեջ` այն դեպքում, որ հանրության մի մեծ հատված չգիտի, թե դա ինչ է, ո՞վ է այդ 5-րդ շարասյունը: Ամենամեծ մեղավորներն այս խայտառակ պարտության գործող իշխանություններն են, եւ նրանք անպայման դրա համար պետք է պատասխան տան:

ՀՐԱՆՏ ՍԱՐԱՖՅԱՆ

Այս թեմայով Արթուր Վարդանյանի կյանքին վտանգ է սպառնում. Փաստաբան Չէ՞, հա, իրո՞ք. Գեւորգ Սուջյանի պատասխանը Ալիեւին Ինչ նոտարական փաստաթուղթ է իրականում ստորագրել Հարությունյանը Բաքվի բանտում Ընտրապայքարի են դուրս եկել ներկա եւ նախկին համայնքապետերը Վիրավոր իմ Հայաստան, դու դեռ ուղղելու ես քո ողնաշարը