Ո՞ւմ առաջ եք արդարանում՝ այսօր «Նեմեսիսի» հուշակոթողը կպահանջեն ապամոնտաժել, վաղը՝  Ծիծեռնակաբերդի հուշահամալիրը. Մանրիկյան

«Ազատություն» ռադիոկայանին տված հարցազրույցում Նիկոլ Փաշինյանը պատասխանելով «Նեմեսիս» գործողության մասնակիցների հիշատակին նվիրված հուշակոթողի թեմային` ասել է, որ արձանի տեղադրումը եղել է սխալ եւ էմոցիոնալ ֆոնի վրա: Ի վերջո, ո՞վ է ճիշտ, ո՞վ սխալ եւ ինչպե՞ս տեղադրվեց մի հուշակոթող Երեւանի սրտում՝ առանց Նիկոլ Փաշինյանի գիտությամբ, բայց Երեւանի փոխքաղաքապետ Տիգրան Ավինյանի մասնակցությամբ, «Իրավունքը» պարզել է Երեւանի «Բարգավաճ Հայաստան» խմբակցության ղեկավար ՄԻՔԱՅԵԼ ՄԱՆՐԻԿՅԱՆԻ տեսակետը:

- Փաստորեն, ոչ միայն Թուրքիան եւ Ադրբեջանը, այլ նաեւ հայաստանյան իշխանությունն է դժգոհ, որ տեղադրվել է «Նեմեսիս» գործողության մասնակիցների հիշատակին նվիրված հուշակոթող: Ի՞նչ կասեք այս մասին:

- Քաղաքապետարանը շատ ճիշտ որոշում է կայացրել: Եվ ես, լինելով Երեւանի ընդդիմադիր խմբակցության ղեկավար, երկու ձեռքով կողմ եմ, որ այն տեղաղրվել է եւ հպարտ եմ, որ ունենք նման հուշակոթող: Այն հարգանքի տուրք է մեր ազգային արժանապատվության ասպետներին եւ կրթելու եւս մի միջոց՝ մեր ապագա սերունդների համար: Մեր երեխաները պետք է ծանոթանան հուշակոթողի վրա գրված անունների պատմությանը: Ընդհանրապես, մեր պարտականությունն է երբեք չմոռանալ եւ չհրաժարվել մեր պատմությունից եւ սերունդներին փոխանցել ողջ իրողությունը Հայոց ցեղասպանության, «Նեմեսիս» գործողության մասին: Եվ ինձ համար անընդունելի են հնչեցված այն մտքերը, թե հուշակոթողի տեղադրումը եղել է սխալ: Ինչ վերաբերում է հարեւան երկրներին, եթե իրենք, իսկապես ուզում են խաղաղության ուղղությամբ քայլեր անել, ապա պետք է հաշտվեն եւ առերեսվեն պատմության հետ:

- Բայց հենց այս փուլում արձանի բացումն, ինչպե՞ս հասկանալ: Իշխանությունը Թուրքիայի հետ գնում էր խաղաղության պայմանագրի կնքման, իսկ արձանը պատճառ դարձավ, որ Թուրքիան փակի իր օդային տարածքը երրորդ ուղղությամբ շարժվող հայկական թռիչքների համար:
- Հուշակոթողի բացման համար ընտրված ժամանակն, իհարկե, պատահականություն եմ համարում: Այստեղ ինչ-որ միտում չկար, որովհետեւ հուշակոթողի տեղադրման որոշումը նոր չէր կայացվել: Երեւանի ավագանին այն տեղադրելու որոշում կայացրել էր դեռ երկու տարի առաջ՝ 2021 թվականի սեպտեմբերի 14-ին: Հուշակոթողը մեկ ամսում կամ մեկ-երկու օրում հնարավոր չէր քանդակել եւ տեղակայել: Այն փուլեր է անցել թե՛ քաղաքային գործադիր մարմնում, թե՛ օրենսդիր մարմնում, ինչը բավական ժամանակ է պահանջում:  Ինչ վերաբերում է մեր հարեւան երկրի մոտեցմանն այս հարցում, դատապարտում եմ եւ կարծում, որ, ուղղակի, իրենց առիթ էր պետք, որպեսզի այն օգտագործելով՝ ինչ-որ պատժամիջոցներ կիրառեին մեր դեմ:

-  Ամեն դեպքում, Նիկոլ Փաշինյանը համարելով արձանի տեղադրումը սխալ՝ ընդգծում է, որ կավառարությունը չի արձանի տեղադրման որոշումը կայացրել: Այդ դեպքում՝ ստացվում է, որ այս հարցում հակասությո՞ւն կա իշխանության եւ իշխանական քաղաքապետի թեկնածու, Երեւանի փոխքաղաքապետ Տիգրան Ավինյանի միջեւ, որը բացման արարողությանը նույնիսկ ելույթ ունեցավ:

- Կներեք, բայց եկեք չմոռանանք, որ իշխող ուժն է այսօր ղեկավարում քաղաքապետարանը: Այսինքն՝ նույն քաղաքական ուժը՝ «Քաղաքացիական պայմանագիրը», որը ձեւավորել է կառավարությունը, նույն ուժի ներկայացուցիչներն էլ եղել են Երեւանի քաղաքապետ, իսկ այժմ քաղաքապետի ժամանակավոր պաշտոնակատար: Ավելին՝ նրանք Երեւանի ավագանիում ունեն մեծամասնություն, ուստի՝ կարծում եմ՝ պետք է աջ ձեռքն իմանա ձախն ինչ է անում: Սա ինչ-որ արդարանալու թեմա չէ: Ո՞ւմ առաջ եք արդարանում:

- Այնուամենայնիվ, կա մտավախություն, որ այս իշխանությունն ընդունակ է հուշակոթողի ապամոնտաժման գործընթաց սկսել՝ Թուրքիայի եւ Ադրբեջանի դժգոհությունը մեղմելու համար…

- Ստացվում է, որ մեր ոչ բարյացակամ հարեւան երկրները փորձում են ներգրավել մեր առօրյա կյանքին: Այսօր «Նեմեսիսի» հուշակոթողը կպահանջեն ապամոնտաժելը, վաղը, կներեք, բայց իրենց բողոքը կարտահայտեն սպարապետ Վազգեն Սարգսյանի արձանի վերաբերյալ, իսկ հետո՝ կպահանջեն ապամոնտաժել նաեւ Ծիծեռնակաբերդի հուշահամալիրը: Այնպես չէ, որ մենք պետք է հաշվի առնենք իրենց կարծիքը: Չէ որ ասում էին՝ հայ-թուրքական հարաբերությունները կարգավորվում են՝ առանց նախապայմանների: Մինչդեռ այս դեպքում տեսնում ենք հուշակոթողի հետ կապված հստակ նախապայման, որովհետեւ ի պատասխան՝ փակել է Թուրքիան օդային տարածքը հայկական ինքնաթիռների համար: Անընդունելի է տուրք տալը նմանատիպ արձագանքներին:

ՀՐԱՆՏ ՍԱՐԱՖՅԱՆ

Այս թեմայով Ինչո՞ւ Ռոբերտ Քոչարյանը չհաղթեց 2021-ին և չի հաղթելու 2026-ին. Միքայել Մինասյան Դատարանի էս գրածներից հետո ո՞նց զսպենք մեր էմոցիաները. Միքայել Սրբազանի պաշտպանը՝ դատավորին Ընդդիմադիր մեկ ճակատով ընտրություններին մասնակցելը պահանջված մոտեցում էր. Փոստանջյան 111 տարի անց վտանգն անցյալում չէ. այն թաքնված է մեր հիշողության նոսրացման և ինքնության կորստի մեջ. Միքայել Մինասյան Մենք, ցավոք, հաճախ պատրաստ ենք գնալ մինչև կործանում, միայն թե չասենք՝ «Այո՛, այստեղ սխալվել ենք». Միքայել Մինասյան