Թանկարժեք մեքենաների հայելիների գողը ընկել է «պարեկների թակարդը»

Քրեական 7 Մայիս, 2023 21:17

Այսօր՝ մայիսի 7-ին, ՀՀ ներքին գործերի նախարարության ոստիկանության պարեկային ծառայության Կոտայքի մարզի պարեկները բացահայտել են հերթական հանցագործությունը:

Գագիկ Շամշյանի հաղորդմամբ՝ Ժամը 04:00-ի սահմաններում պարեկները հերթական ծառայությունը կատարելու ժամանակ Ռոսիայի փողոցում նկատել են «Մերսեդես» մակնիշի ատոմեքենա և ստուգման նպատակով կանգնեցրել այն:

Նրանք ավտոմեքենայի սրահում նկատել են կողային հայելիներ ու երբ վարորդին հարցրել են՝ դրանք ի՞նչ են, նա սկսել է կմկմալ և անհասկանալի բառեր ասել, ինչից հետո, ըստ սկզբնաղբյուրի, պարեկների մոտ լուրջ կասկած է առաջացել, որ վարորդը «Գյուլնազ տատու» հեքիաթն է պատմում և փորձում է իրենց ականջներից «լապշա կախել»:

Նրանք «Մերսեդես»-ի վարորդին, որը Երևանի բնակիչ 25-ամյա Պերճ Մ.-ն է, գողություն կատարելու կասկածանքով տեղափոխել են Ոստիկանության Կոտայքի բաժին: Արդեն տեղում փաստերի ճնշման տակ Պերճ Մ.-ն խոստովանել է, որ ինքը Աբովյան քաղաքի Հանրապետության փողոցի շենքերից մեկի բակից 2 ավտոմեքենա է թալանել:

Կարճ ժամանակում ոստիկանները, պարեկներն ու քննիչները պարզել են, որ թալանված ավտոմեքենաներից մեկը Աբովյան քաղաքի բնակիչ 34-ամյա Անդրանիկ Մ.-ի «Մերսեդես S 550» մակնիշի ավտոմեքենան է, իսկ մյուսը Աբովյան քաղաքի բնակիչ 31-ամյա Գոռ Խ.-ի «Մերսեդես S 500» մակնիշի ավտոմեքենան:

Սկզբնաղբյուրը նաև հայտնում է՝ ոստիկաններն ու քննիչները ունեն կասկածներ, որ հնարավոր է՝ սա Պերճ Մ.-ի առաջին նմանատիպ գողության դեպքը չէ:

Դեպքի փաստով Հայաստանի քննչական կոմիտեի Կոտայքի մարզային քննչական վարչության Աբովյանի քննչական բաժնում նախաձեռնվել է քրեական վարույթ: Քննիչի որոշմամբ՝ Պերճ Մ.-ն ձերբակալվել է: