«Ժողովրդավարության բաստիոնի կառավարչի» ու պաշտոնաթող նախագահ Սարգսյանի անվտանգության ապահովումը. իշխանական քարոզչամեքենայի կեղծիքների հետքերով

Վերջին օրերին իշխանական քարոզչամեքենան հերթական արշավն է սկսել ՀՀ երրորդ նախագահ Սերժ Սարգսյանի դեմ։ Նիկոլ Փաշինյանի աշխատակազմի ղեկավարի տեղակալ Տարոն Չախոյանի հետ ասոցացվող MediaNews հարթակը Սերժ Սարգսյանի՝ Հայոց ցեղասպանության հուշահամալիր կատարած այցից լուսանկար է հրապարակել, որտեղ կարմիր օղակի մեջ են վերցված, ըստ տեղեկությունը տարածողի, նախագահի անվտանգության աշխատակիցները։ Հոդվածը վերնագրված է՝ ««Քաղաքում ազատ շրջող» Սերժին անվտանգության առնվազն 7 աշխատակիցներ էին ուղեկցել Ծիծեռնակաբերդ»։

Լուսանկարը տարածել են իշխանական քարոզչամեքենայի այլ ներկայացուցիչներ և հարթակներ, որոնք պնդում են, թե անվտանգության աշխատակիցների թիվը 7-8 է, թե Սերժ Սարգսյանը «մսխում է» ՀՀ հարկատուների գումարները՝ վճարելով անվտանգության աշխատակիցներին, նրանցից մեկն էլ պնդում է, թե նկարում պատկերված անվտանգության աշխատակիցների մեծ մասը ռուսներ են։

Իշխանական քարոզչական թեզերը նույնաբովանդակ են, այն է` Սերժ Սարգսյանը, չունենալով պետական որևէ կարգավիճակ, ունի անվտանգության բազմաթիվ աշխատակիցներ, որոնք վճարվում են ՀՀ հարկատուների հաշվին, իսկ այն թեզը, թե Սերժ Սարգսյանը «ազատորեն է շրջում Հայաստանում», չի համապատասխանում իրականությանը, քանի որ նրան ուղեկցում են անվտանգության «բազմաթիվ» աշխատակիցներ։ Նույնանման տեղեկություններ սոցիալական ցանցերում տարածվում են մի քանի օր շարունակ:  

Նշենք, որ իշխանական քարոզչամեքենայի այս հայտարարությունները պարունակում են մի շարք կեղծ և մանիպուլյատիվ պնդումներ:

Այսպես, Հայաստանի Հանրապետության պաշտոնաթող նախագահների և վարչապետների անվտանգությունն ապահովվում է օրենքով սահմանված կարգով: Մասնավորապես, «Հատուկ պետական պաշտպանության ենթակա անձանց անվտանգության ապահովման մասին» ՀՀ օրենքի 6-րդ հոդվածի 3-րդ մասի համաձայն` Հայաստանի Հանրապետության պաշտոնաթող Նախագահին տրամադրվում է անձնական ցմահ պետական պահպանություն: Չնայած նրան, որ 2022 թվականի դեկտեմբերի 23-ին օրենքում փոփոխություն է կատարվել և պաշտոնաթող նախագահների անվտանգության ապահովման համար սահմանվել է 7, իսկ վարչապետների համար 10 տարի, անհրաժեշտ է նշել, որ փոփոխված կարգավորումները տարածվում են օրենքի փոփոխությունից հետո ընտրված նախագահների և վարչապետների վրա:

Այսինքն, իշխանական քարոզչամեքենայի պնդումը, թե ՀՀ պաշտոնաթող նախագահ Սերժ Սարգսյանը մսխում է ՀՀ հարկատուների փողերը և օգտվում անվտանգության բազմաթիվ աշխատակիցների ծառայությունից, մանիպուլյատիվ է, քանի որ Սերժ Սարգսյանին տրամադրվել է անձնական ցմահ պահպանություն ոչ թե իր ցանկությամբ, այլ օրենքի պահանջով:

Իշխանական քարոզչամեքենայի մյուս մանիպուլյացիան և կեղծիքը վերաբերվում է անվտանգության աշխատակիցների թվաքանակին: Հարկատուների գրպանից «մսխվող» գումարների չափը «ճոռոմացնելու» և այդպիսով ենթադրաբար հարկատուների զայրույթը մեծացնելու համար իշխանական քարոզչամեքենան շրջանառում է անվտանգության 7-8 աշխատակիցների մասին տեղեկությունը:

Այս պնդումը կեղծ է այն պատճառով, որ լուսանկարում պատկերված և օղակի մեջ վերցված անձանցից առնվազն երկուսը քաղաքականությամբ հետաքրքրվող քաղաքացիներին հայտնի անձինք են. նրանցից մեկը ՀՀ երրորդ նախագահ Սերժ Սարգսյանի պաշտոնավարման ժամանակ նախագահի օգնականի պաշտոնը զբաղեցրած Արմեն Աբելյանն է (լուսանկարում` աջից առաջինը), իսկ մյուսը` Հայաստանի Հանրապետական կուսակցության երիտասարդական կազմակերպության նախագահ Հենրիխ Դանիելյանը (լուսանկարում` աջից երկրորդը): Այսինքն, տվյալ լուսանկարում Հանրապետության երրորդ նախագահի անվտանգությունն ապահովող անձանց թիվը ոչ թե 7 կամ 8 է, այլ` 5: 

Անվտանգության աշխատակիցների թվաքանակն ընդգծելու մանիպուլյացիան կայանում է նրանում, որ պաշտոնաթող նախագահները և վարչապետներն իրենք չեն որոշում իրենց տրամադրվող անվտանգության աշխատակիցների թվաքանակը, այլ դա հաստատվում է վերը նշված օրենքով և ենթաօրենսդրական ակտերով սահմանված կարգով` հաշվի առնելով պետական պաշտպանության ենթակա անձի կյանքին կամ առողջությանը սպառնացող վտանգի առկայությունը, նրանց կողմից պետական կամ օրենքով պահպանվող այլ գաղտնիք կազմող տեղեկատվությանը տիրապետման հանգամանքը, գործունեության բնույթը և այլն: Այսինքն, ՀՀ երրորդ նախագահ Սերժ Սարգսյանի անվտանգությունն ապահովող անձանց թիվը որոշվում է ոչ թե իր կողմից, այլ ըստ անհրաժեշտության` օրենքով և ենթաօրենսդրական ակտերով սահմանված կարգով: Այդ թիվն առանց երրորդ նախագահի միջամտության կարող էր լինել 10, 15 և այսպես շարունակ: 

Հաջորդ անլուրջ պնդմանը, թե Սերժ Սարգսյանի անվտանգությունն ապահովում են ազգությամբ ռուսներ, կարծում ենք անգամ անդրադառնալ չարժե:

Իսկ որն է իշխանական քարոզչամեքենայի` ՀՀ երրորդ նախագահի դեմ հենց այս թեմայով արշավ իրականացնելու շարժառիթը: 

Այսպես, Հայոց ցեղասպանության զոհերի հիշատակի օրը` ապրիլի 24-ին, ԶԼՄ-ներում և սոցիալական ցանցերում տարածվեց մի տեսանյութ, որտեղ երևում էր Հայաստանի վարչապետի աթոռը զբաղեցնող Նիկոլ Փաշինյանի` հուշահամալիր այցին ընդառաջ իր անվտանգության աշխատակիցների կողմից ձեռնարկված աննապադեպ մի միջոցառում: Մասնավորապես, Փաշինյանի թիկնազորը մետաղորսիչներով ստուգում էր Ծիծեռնակաբերդի հուշահամալիրում խոնարհված ծաղիկների թմբերում վտանգավոր իրերի առկայությունը:

Նույն օրը տարածված ՀՀ երրորդ նախագահ Սերժ Սարգսյանի այցի լուսանկարները փաստում էին պաշտոնաթող նախագահի անկաշկանդ և ազատ մուտքը հուշահամալիր` ՀՀ քաղաքացիների հետ, նրանց ուղեկցությամբ և առանց անվտանգային լրացուցիչ միջոցառումների անհրաժեշտության: 

Փաստ է, որ ի տարբերություն Սերժ Սարգսյանի, որի անվտանգությունը վստահված է ենթադրաբար 5 անձանց, Նիկոլ Փաշինյանին ուղեկցում են ծառայողական` ոստիկանական և հատուկ պահպանության առնվազն 15 մեքենաներ, իսկ որոշ դեպքերում` մի քանի տասնյակ ավտոբուսներով ոստիկաններ, նրա անվտանգությունն ապահովում են մի քանի տասնյակ, իսկ մարդաշատ միջոցառումների ժամանակ մի քանի հարյուր անվտանգության աշխատակիցներ: Նրա այցերին ընդառաջ ձեռնարկվում են անվտանգային աննախադեպ միջոցառումներ, ընդհուպ` տարբեր հաստատությունների տանիքներին հայտնվում են դիպուկահարներ, Ազգային ժողովում կրկնապատկվում է պետական պահպանության ծառայողների թիվը, հանրահավաքների ժամանակ տեղադրվում են լուսաձայնային նռնակներ և այլն:

Մի դեպքում խոսքը վերաբերվում է իբրև «ժողովրդի միջից ծնված», «ժողովի անունից» իշխող, «ժողովրդավարության բաստիոնի» կառավարիչ Նիկոլ Փաշինյանին: Մյուս դեպքում խոսքը վերաբերվում է իբրև ՀՀ քաղաքացիների կողմից «մերժված» ՀՀ երրորդ նախագահին:

Այսպիսով, իշխանական քարոզչամեքենան արդեն օրեր շարունակ Փաշինյանի այցին ընդառաջ հուշահամալիրում խոնարհված ծաղիկները մեկ առ մեկ ստուգելուն և նրա անվտանգությունն ապահովելու համար հարյուրավոր թիկնապահներին, տասնյակ ծառայողական մեքենաներին և աննախադեպ այլ միջոցառումներին փորձում է հակադրել Սերժ Սարգսյանի` «հարկատուների հաշվին պահվող» «մեծ» թվով` անվտանգության 5 աշխատակիցների լուսանկարը: 

Ստորև` իշխանական քարոզչամեքենայի այլ ներկայացուցիչների` ՀՀ երրորդ նախագահ Սերժ Սարգսյանի մասին կեղծիքներ պարունակող գրառումները

Աղբյուր՝ AntiFake.am