Ժամերով պահում են եւ իրականացնում տոտալ խոշտանգում, ֆիզիկական հաշվեհարդար․Բացառիկ զրույց Վարդան Ղուկասյանի եւ մյուսների հնչեղ գործով հայտնի փաստաբանի հետ

Արդեն մի քանի շաբաթ է մի շարք հանրային գործիչներ, իրավապաշտպաններ բարձրաձայնում են «Հանրային ձայն» կուսակցության խորհրդի նախագահ Արտակ Գալստյանի, Արկադի Ղուկասյանի եւ Արման Մկրտումյանի նկատմամբ հարուցված քր․ գործով աղմկահարուց խախտումների,  ֆիզիկակական եւ քաղաքական հաշվեհարդարների մասին։ Նախաքնության մանրամասների վերաբերյալ մեկնաբանություն ենք խնդրել բազում աղմկահարույց գործերով հայտնի փաստաբան ԼԵՎՈՆ ԲԱՂԴԱՍԱՐՅԱՆԻՑ, ով օրեր շարունակ բարձրաձայնում է սույն գործով աննախատեպ տոտալ խոշտանգումների եւ իրավախախտումների մասին։ Անդրադառնալով գործի քննության ընթացքին մեր զրուցակիցը նախ նկատեց․

-Չեմ կարող տեղեկացնել այնպիսի առերեւույթ տեղեկատվություն, որն իր մեջ կարող է պարունակել նախաքննության գաղտնիք։ Իսկ օբյեկտիվ քննության մասին խոսք լինել չի կարող, երբ Ա․ Մկրտումյանը առանց պաշտպանի է, չի կարող պաշտպանի մասնագիտական օգնության միջոցով անգամ բողոքարկել դատարանի որոշումը, մեկուսացված է, կրտված արտաքին աշխարհից եւ մերձավորների հետ շփվելու կամ զանգ կատարելու իրավունքից։ Դիմել ենք ՀՀ գլխավոր դատախազին, քաղաքի դատախազին մեղավորներին քրեական պատասխանատվության ենթարկելու համար, քանի որ փաստաբանի մասնագիտական գործունեությանը խոչընդոտելը վտանգում է Մկրտումյանի սահմանադրական իրավունքները եւ առաջացնում քր․ պատասխանատվությունը։ Մկրտումյանի մասով դիմում է ներկայացվել նաեւ ՄԻԵԴ։

Արտակ Գալստյանի մասով իրականացվել եւ իրականացվում է տոտալ խոշտանգում, ֆիզիկական հաշվեհարդար բացահայտ եղանակով։ Ընդ որում խոշտանգման բռնության հետքերն այնքան ակնհայտ են եղել, որ դրանք արձանագրվել են Նուբարաշենի քննչական մեկուսարանի աշխատակիցների կողմից։ Պաշտպանական կողմը բոլոր իրավասու մարմիններին ՀՀ գլխավոր դատախազին, ԱԱԾ տնօրենին, ՄԻՊ-ին այդ թվում հրապարային տեղեկացրել է, որ Քննչական կոմիտեի շենքում՝ յուրաքանչյուր քննչական գործողություն կատարելուց հետո ժամերով պահում են եւ իրականացնում տոտալ խոշտանգում, ֆիզիկական հաշվեհարդար, նման նախադեպ չի եղել երբեւէ ՀՀ-ում։

Վարդան Ղուկասյանի մասով դեռեւս ապրիլի 25-ին վերջինիս գրավոր դիմումը պաշտպան ունենալու վերաբերյալ առձեռն հանձնվել է քննչական մարմիններին, որոնք պարտավոր էին անհապաղ ներգրավվել փաստաբան, սակայն մինչ այս պահը արձագանք չկա։ Նման պայմաններում խոսել օբյեկտիվ քննության մասին նշանակում է նպաստել եւ հովանավոր դառնալ բոլոր աննախադեպ անօրինականություններին։

-Պարոն Բաղադասարյան, համացանցումբազմաթիվ հրապարակումներ եղան, որ կատարվում է համահայկական դրամահավաք Ձեզ որպես փաստաբանի փոխանցելու համար, միեւնույն ժամանակ տարբեր հարթակներում տեղեկանում ենք, որ ՌԴ հայ համայնքը Ձեզ է նվիրել Մայբախ ավտոմեքենա, ԱՄՆ հայ համայնքը Համմեր տեսակի մեքենա, Գերմանիայի հայ համայնքը Մերսեդես մեքենա ջիպ, իրականությո՞ւն է դա, թե՞ ոչ։

-Կարելի էր նաեւ ավելացնել, որ Ֆրանսիայի հայ համայնքը ինձ է նվիրաբերել «Գրանդ-Օպերայի» շենքը, իսկ Ավստրալիայի հայ համայնքը՝ կենգուրուների մեծ ֆերմա իր ֆազենդայով։ Այ՛ո, ունեմ փաստաբանական ծառայությունների մասին պայմանագիր պատվիրատուի հետ, որի ուժով իրականացվում է  պատվիրատուի կողմից եւ պատվիրատուի անունից վճարումներ։