«ՀՐՈւՄ ՎԱՐԺՈՒԹՅԱՆ ԵՐԿՐՈՐԴ ՄՈՏԵՑՈւՄՍ ԲԱՑԱՌԻԿ ԷՐ, ՔԱՆԻ ՈՐ ՏՐԻԲՈւՆԱՅԻՑ ԼՍԵՑԻ ՈՐԴՈւՍ ՁԱՅՆԸ». ՓՈԽՉԵՄՊԻՈՆ ԱՆԴՐԱՆԻԿ ԿԱՐԱՊԵՏՅԱՆ

Ապրիլի 23-ին Երևանում ավարտվեց Ծանրամարտի Եվրոպայի առաջնությունը ։Մեր երկրի ծանրորդները փայլուն հանդես եկան ու թիմային հաշվարկում գրավեցին առաջին պատվավոր հորիզոնականը, նվաճելով 4 «մեծ» ոսկե, 4 արծաթե և 5 բրոնզե մեդալ, ընդհանուր 13 մեդալ ։Մեր լավագույն ծանրորդներից, ծնունդով Էջմիածնի շրջանի Հայթաղ գյուղից ԱՆԴՐԱՆԻԿ ԿԱՐԱՊԵՏՅԱՆԻՑ ևս ոսկի էր սպասվում, առավել ևս, որ նա պոկում վարժությունում հաջորդաբար բարձրացրեց 167, 173 և 178 կգ ծանրաձողերը, իսկ վերջին մոտեցմամբ սահմանեց Եվրոպայի ռեկորդ 178 կգ։ Բայց ահա հրում վարժությունում հայ ծանրորդը գլխավերևում պահեց 206 կգ - ն, մինչդեռ նախորդ տարվա Եվրոպայի փոխչեմպիոն բուլղարացի 18-ամյա Կառլոս Նասարը պարզապես փայլեց 221 կգ - ով սահմանելով մեծահասակների Աշխարհի ու Եվրոպայի ռեկորդ։ Նա էլ երկամարտի 395 կգ արդյունքով Եվրոպայի չեմպիոն հռչակվեց։

Iravunk. com-ի հետ զրույցում Եվրոպայի փոխչեմպիոն ԱՆԴՐԱՆԻԿՆ այսպես ամփոփեց առաջնությունը.

«Բոլոր մարզիկները պայքարում են չեմպիոնության համար, սակայն իմ այս արդյունքը ևս գոհացնում է բազմաթիվ վնասվածքներից հետո։ Շնորհակալ եմ բոլորին, ինձ սատարելու համար ։178 կգ - անոց ծանրաձողը երբեք, ոչ մի հարթակում չեմ պահել իմ գլխավերևում, և կարծում եմ դա նաև դահլիճի մեծ ոգևորության արդյունքն էր, ինչի համար ևս շնորհակալ եմ։ Շնորհավորում եմ բոլոր մարզասերներին, այս գեղեցիկ առաջնության, մեդալների և անմոռանալի զգացողությունների համար։ Հաջորդ կարևորագույն նպատակս Օլիմպիական խաղերն են։ Յուրաքանչյուր մարզիկ նախընտրում է չեմպիոն դառնալ։ Այս պահին երկրորդ տեղը գոհացնող է, քանի որ ծնկի վնասվածք ունեի, և այն բավականին լուրջ էր։ Աշխարհի առաջնությունում լավ հանդես չեկա, և բոլորը կարծեցին, որ ես պիտի հեռանամ ծանրամարտից ու ավարտեմ իմ մարզական կարիերան։ Նշեմ, որ հրում վարժության երկրորդ մոտեցումը բացառիկ էր, քանի որ տրիբունայից լսեցի որդուս ձայնը և մոտեցումս նվիրեցի նրան։ Հիմա վնասվածք չկա, ու կա արդյունք։Ինձ համար մեծ նշանակություն ուներ, որ Երևանում է ընթանում առաջնությունը ու շատ մեծ հպարտություն զգացի, երբ ռեկորդ սահմանեցի ։Այս նվաճումը ինձ կտա էլ ավելի մեծ նվաճումներ»։

Պատրաստեց ՀՈՎՀԱՆՆԵՍ ՍԱՐԳՍՅԱՆԸ