Հայ Եկեղեցին ազգային անվտանգության հարցեր պիտի բարձրացնի, քանի որ իշխանությունն իր տեղում չէ. Տեր Փառեն

 

«Ցավով այսօր նորից Ազգային ժողովի ամբիոնից լսեցինք հիասթափեցնող խոսքեր։ Այս անգամ հեղինակը պատգամավոր Մարիա Կարապետյանն էր։ Առհասարակ բոլոր խոսքերն ու ելույթներն ունեն նպատակ, ուղերձներ եւ հասցեատեր։ Ուղերձները հետեւյալն են. «Եկեղեցին դեմ է պետականությանը», 

«հայը պետք է հրաժարվի իր ազգային երազանքներից», «Եկեղեցին զբաղվում է քաղաքականությամբ»: Այս խոսքերի հասցեատերը պարզ ժողովուրդն է, իսկ նպատակը` մարդկանց մոլորեցնելը։ 

 

Առաջին՝ եթե Եկեղեցին դեմ լիներ պետականությանը, ապա հինգերորդ դարում, երբ հայոց իշխանական տներն ուզում էին, որ օտարը իրենց ղեկավարեր, Սահակ Պարթեւ Հայրապետը չէր ասի իր հայտնի խոսքը, թե ավելի լավ է իմ հիվանդ գառնուկը, քան օտարի առողջ գայլը։ Այս մոտեցման կրողն է Հայ Եկեղեցին։

 

Երկրորդ՝ հրեաները տարիներ շարունակ որտեղ էլ լինեն կենաց են ասում. «Հաջորդ անգամ Երուսաղեմում»` այդպիսով իրենց երազած հայրենիքը շահելով եւ պահելով։ Իսկ այսօր քաղաքականությունն ու աշխարհաքաղաքականությունը վեր է դասվում ազգային երազանքից։

 

Երրորդ՝ Հայ Եկեղեցին ոչ թե զբաղվում է քաղաքականությամբ, այլ ազգային անվտանգության հարցերն է բարձրացնում եւ պիտի բարձրացնի, քանի որ իշխանությունն իր տեղում չէ։

 

Եվ տիկնոջ վերջին. «Մի՞թե թուրքին ատելու մեջ է ամփոփված դարերով նվիրագործված մեր ավանդույթները», պարզապես «ցնցող» է։ Թուրքը պիտի ներողություն խնդրի հայից, սա է արժանապատիվ հայի մոտեցումը։ Մարդասիրություն եւ քրիստոնեություն մի՛ խաղացեք։ Ամենայն Հայոց Հայրապետին էլ դաս մի՛ տվեք, թե ինչ պիտի ասի եւ ինչ պիտի չասի։ Ժողովուրդը լսում է Ամենայն Հայոց Հայրապետի պատգամը, մի՛ մոլորեցրեք մարդկանց», - գրել է Տեր Փառեն։