Պետք չէ Քրիստոսի Հարության վեհ խորհուրդը պարզունակացնել ներկված հավկիթների աստիճանի. Տեր Ներսես

«Սիրելի հավատացյալներ, մի քանի դիտարկում կցանկանայի անել՝ հուսալով, որ ինձ ճիշտ կհասկանաք: Ս. Հարության տոնն, իհարկե, քրիստոնյաներիս մեծագույն տոնն է, եւ բոլորիս հասկանալի է այն բերկրանքը, որով ավետիս ենք տալիս միմյանց եւ շնորհավորում: Բայց, զուտ իմ անձնական կարծիքով, միանգամայն բավարար է, եթե մեր էջերում ընդհանուր ազդարարում ենք Ս. Հարության Ավետիսը. «Քրիստոս Յարեաւ....»: Կարծում եմ՝ պարտադիր չէ, որ բոլոր ընկերներին անձնական նամակով շնորհավորական տեքստեր եւ նկարներ ուղարկենք՝ գուցե մտածելով, որ եթե այդպես չանենք, մեզանից կնեղանան կամ մեր բոլոր ընկերները պարտադիր դրան են սպասում: Այդպես ուղղակի ծանրաբեռնվում է մարդկանց նամակների բաժինը, եւ երբեմն դժվար է լինում նկատել այլ նամակները: Կարեւոր է նաեւ հաշվի առնել, որ մեր ոչ բոլոր ընկերներն են քրիստոնյա, եւ իրենց համար դա ուղղակի սպամ է, որ կարող է հավելյալ տհաճ վերաբերմունք առաջացնել քրիստոնեության նկատմամբ (օրինակ՝ քրիստոնյաներս ինչպե՞ս կվերաբերենք նմանատիպ երեւույթերին, եթե մեզ սկսեն իրար հետեւից շնորհավորել ոչ քրիստոնեական ինչ-որ տոնի, ասենք՝ Ռամադանի առիթով): Բացի դրանից, անգամ շատ քրիստոնյաների հոգնեցնում է իրենց նամակների բաժինը լցված տեսնել գունագեղ հավկիթների նկարներով: Ի վերջո, նաեւ պետք չէ Քրիստոսի Հարության վեհ խորհուրդը պարզունակացնել ներկված հավկիթների աստիճանի: Եվ քանի որ խոսք գնաց, ասեմ նաև, որ սիմվոլը կարմիր ներկված ձուն է, որ խորհրդանշում է Քրիստոսի արյունով փրկագնված աշխարհը. տոնածառի խաղալիքների նման երփներանգ հավկիթները որեւէ կապ չունեն իրական խորհրդանշանի հետ», - գրել է Ստեփանակերտի Ս. Աստվածածին մայր եկեղեցու հոգեւոր հովիվ ՏԵՐ ՆԵՐՍԵՍ քահանա ԱՍՐՅԱՆԸ եւ ընդգծել՝ Քրիստոս Յարեաւ ի մեռելոց, Օրհնեալ է Յարութիւնն Քրիստոսի: