ՀՀ երկրորդ անձի գործողության վերաբերյալ պետք տրվի ոչ միայն իրավական, այլեւ տոտալ քաղաքական գնահատական.«Լեվ Գրուպ» փաստաբանական ընկերության հիմնադիր-ղեկավար

Ապրիլի 2-ին Կասկադում ԱԺ նախագահ Ալեն Սիմոնյանի մասնակցությամբ միջադեպ է տեղի ունեցել․ քաղաքացի Կարեն Մկրտչյանը հայտարարել է, որ Հայաստանի ԱԺ նախագահը թքել է իր երեսին։ Ինքը՝ Ալեն Սիմոնյանը քաղաքացու վրա թքելու փաստը չի հերքել։ Երևանի կենտրոնում տեղի է ունեցած միջադեպը երկուստեք  հանրային պարսավանքի առիթ է դարձել: Ի՞նչ իրավական գնահատականի պետք է արժանանա ԱԺ նախագահի նման կեցվածքը քաղաքացու նկատմամբ եւ հակառակը, հարցի պատասխանը փորձել ենք ստանալ «Լեվ Գրուպ» փաստաբանական ընկերության հիմնադիր-ղեկավար, հնչեղ գործերով փաստաբան ԼԵՎՈՆ ԲԱՂԴԱՍԱՐՅԱՆԻՑ, ով նախ նկատեց.

-Վերը նշված տեղեկատվությունը ես ստացել եմ լրատվությունից եւ ելակետային եմ վերցնում լրատվության փոխանցած տեղեկատվությունը: Միջադեպի հետ կապված ցանկանում ԱԺ նախագահի գործողությանը տալ ոչ միայն իրավական, այլ քաղաքական գնահատական: Նախ արձանագրեմ հետեւյալ հանգամանք. ՄԻԵԴը իր նախադեպային որոշումներով բազմիցս արձանագրել է, որ երբ անձը դառնում է հանրային դեմք, ապա պետք է գիտակցի, որ լինելու է հասարակության թիրախում եւ շատ հաճախ հասարակության, ԶԼՄ-ների որակումները կարող են լինել չափազանցված, ընդհուպ կարող են նաեւ չհամապատասխանել իրականության հետ: Եվ ՄԻԵԴ-ը իր որոշումներում արձանագրել է, որ տվյալ անձիք պետք է բավականին զուսպ եւ ողջամիտ լինեն:

Ինչ վերաբերում է ԱԺ նախագահի գործողություններին, ապա ես կարծում եմ, որ նախ, եթե դեռ չի հարուցվել, ապա անհապաղ պետք է քր. վարույթ հարուցվեր, որպեսզի տրվի իրավական գնահատական: Սա բավականին վատ նախադեպ է, հատկապես, երբ այն կատարվում է ՀՀ երկրորդ անձի կողմից, ուստի իրավական գնահատականին զուգահեռ կատարվածին պետք է տրվի նաեւ քաղաքական գնահատական, հակառակ պարագայում ունենալու ենք վատ նախադեպ բխող բոլոր վատ հետեւանքներով: 

Ինչ վերաբերում է քաղաքացուն, ապա, փաստաբանի խոսքերով.

-Դրա իրավական գնահատականը եւս պետք է պատկան լիազոր մարմինը տա: Որովհետեւ, եթե դու դիմացինի կողմից ստանում ես վիրավորանք կամ զրպարտություն, որը առերեւույթ աղերս կարող է ունենալ պատվի, արժանապատվության,գործարար համբավի հետ, ապա այդ գործիքակազմը մենք ունենք եւ այդ մշակույթով պետք է շարժվել:

Անդրադառնալով ԼՏՊ-ի կողմից արված հայտարարությանը, որ քաղաքական մեծամասնությունը պետք է քննարկի ԱԺ նախագահի պաշտոնանկության հարցը, մեր զրուցակիցը զերծ մնաց մեկնաբանելու ՀՀ առաջին նախագահի հայտարարության մեջ գտած մտքերը, բայց եւ փաստեց.

-Այ՛ո, միանշանակ պետք է տրվի տոտալ քաղաքական գնահատական, հիմա դա կլինի պաշտոնանկ անելով, նկատողություն տալով, հանրային պարսավանքի ենթարկելով կամ այլ մեխանիզմով` կարեւոր չէ: Որքան որակով  դա անի տվյալ իշխանությունը, այնքան վերջինիս իմիջը հնարավորինս կվերականգնվի:

Հ. Գ. Մեր զրուցակիցը այս եւ այլ օրակարգային հարցերի շուրջ իր տեսակետը կհայտնի երկուշաբթի օրը «Իրավունք TV»-ի եթերում:

ԻԼՈՆԱ ԱԶԱՐՅԱՆ