Այդուհանդերձ՝ ընտրությունները կլինեն սեպտեմբեր-հոկտեմբեր ամսին. Թեհմինա Վարդանյան

Երեւանի քաղաքապետ Հրաչյա Սարգսյանը հրաժարական տվեց պաշտոնավարման 15-րդ ամսում: Նա քաղաքապետարանին հրաժեշտ տվեց արտահերթ նիստում, ուղիղ հեռարձակմամբ, սակայն բուն պատճառների մասին այդպես էլ չխոսեց:

«Բոլորիդ հայտնի է, որ «Քաղաքացիական պայմանագիր» կուսակցության Երեւանի քաղաքապետի թեկնածուն պարոն Տիգրան Ավինյանն է, եւ ցուցակը գլխավորելու է նա: Հույս ունեմ, որ «Քաղաքացիական պայմանագիր» կուսակցությունը կստանա երեւանցու վստահության քվեն», - հրաժարականի մասին հայտարարելուց հետո՝ ասել էր Հրաչյա Սարգսյանը:

«Իրավունքի» հետ զրույցում Երեւանի ավագանու անդամ ԹԵՀՄԻՆԱ ՎԱՐԴԱՆՅԱՆԸ, ում համար Հրաչյա Սարգսյանի աշխատանքը քաղաքապետի պաշտոնում գնահատելի էր ու դրական, նշեց, որ չի կարծում, թե գործող քաղաքական թիմը այս պահին ի վիճակի է արտահերթ ընտրություն անցկացնել:

«Հաշվի առնելով, որ առաջիկայում ամառ է, այդուհանդերձ՝ ընտրությունները կլինեն սեպտեմբեր-հոկտեմբեր ամսին: Ինչ վերաբերում է քաղաքապետի հրաժարականին, այստեղ չեմ կարող որեւէ շոշափելի մեկնաբանություն տալ, բացի նրանից, ինչ տեսնում եմ ընդհանուր դաշտում»,- ասաց Վարդանյանը ու հավելեց, որ հրաժարականը սպասելի էր:

«Քաղաքապետն այս պարտականությունները ստանձնել էր շատ դժվարին պայմաններում, եւ բոլորս, ըստ էության, գիտեինք, որ դա լինելու է ժամանակավոր կառավարում, որը նա փայլուն իրականացրեց»,- նշեց Թեհմինա Վարդանյանը:

Անդրադառնալով Տիգրան Ավինյանի թեկնածությանն ու նրա մրցակիցներին, ավագանու անդամն ընդգծեց, որ այս պահին չի տեսնում մրցակից. «Այն անունները, որոնք այս պահին շրջանառվում են, թույլ են, ինձ համար խոսուն չեն»:

Նշենք, որ Հրաչյա Սարգսյանին քաղաքապետի պաշտոնում կփոխարինի հինգ տեղակալներից առաջինը՝ Լեւոն Հովհաննիսյանը: Խոսակցություններ են շրջանառվում այն մասին, որ փոխքաղաքապետը Տիգրան Ավինյանի ընկերն է ու, ամենայն հավանականությամբ՝ ավելի դյուրին կերպով քաղաքապետարանի աշխատանքներն ավտոմատ կերպով կանցնի միայն Ավինյանի վերահսկողության տակ: Իսկ թե սպասվող ընտրություններից առաջ Հրաչյա Սարգսյանը որքանո՞վ էր խանգարում Ավինյանի ազատ գործունեությանը, կամ արդյոք քաղաքապետի՝ հենց այս պահին հրաժարականը կապ ունի Ավինյանի ազատ գործունեության հետ, ցույց կտան ժամանակն ու ընտրության արդյունքները:

Ս. ԱՍԱՏՐՅԱՆ

Այս թեմայով Ինչու Կիեւի քաղաքապետ Կլիչկոյի երեխաները չեն գտնվում առաջնագծում Անկախության օրը՝ ախմախ անակնկալներով Արթուր Վարդանյանի կյանքին վտանգ է սպառնում. Փաստաբան Սերժ Սարգսյանը շեշտել է արժեքների վրա խարսխված քաղաքականություն իրականացնելու կարևորությունը Պաշտպանը միջնորդեց վերացնել Սերժ Սարգսյանի նկատմամբ հարուցված հանրային քրեական հետապնդումը