Գրազ եմ գալիս` Փաշինյանի դուխը չի հերիքելու Հռոմի ստատուտը ներկայացնի խորհրդարանի վավերացմանը. Զոհրաբյան

Անդրադառնալով Հաագայի միջազգային քրեական դատարանի կողմից ՌԴ նախագահ Վ. Պուտինին եւ երեխաների իրավունքների պաշտպան Մարիա Լվովա-Բելովային ձերբակալելու միջազգային օրդեր տալուց մեկ շաբաթ անց` ՀՀ ՍԴ-ի կողմից Հռոմի կանոնադրությունը Սահմանադրությանը չհակասող ճանաչելուն` «Անվտանգություն եւ ժողովրդավարություն» ՀԿ նախագահ ՆԱԻՐԱ ԶՈՀՐԱԲՅԱՆՆ ասաց, որ զուգադիպություն չէ, որ դրան հաջորդեց Լիսագոր-Ստեփանակերտ ճանապարհի փակվելը:

— 2004 թվականին ՍԴ-ն ճանաչել էր այն ՀՀ Սահմանադրությանը հակասող եւ հանկարծ այսօր այդ Հռոմի ստատուտը ճանաչվում է ՀՀ Սահմանադրությանը չհակասող: Ես գրազ եմ գալիս, որ Փաշինյանի դուխը չի հերիքելու, որ այդ ստատուտը ներկայացնի ՀՀ խորհրդարանի վավերացմանը: Հիմա որոշել է Պուտինի բերանը ձեռքը մտցնել` չհասկանալով, որ դրանով ուղղակիորեն վտանգում է Արցախի գոյությունը: Այսօր այդ այլընտրանքային ճանապարհի փակումը նշանակում է Արցախի էթնիկ զտում եւ ցեղասպանություն:

— Իսկ ի՞նչ կասեք «Հանուն Ժողովրդավարության» երկրորդ գագաթնաժողովին Նիկոլ Փաշինյանի մասնակցության եւ ելույթի մասին:

— Արեւմուտքը հրապարակային ապտակեց Նիկոլին: Նա իր ելույթում շնորհակալություն հայտնեց այն Արեւմուտքին, որի լիդերները մասնակցում էին գագաթնաժողովին: Բայց այդ գագաթնաժողովն ընդունեց հայտարարություն, որտեղ որեւէ բառ Ադրբեջանի կողմից Բերձորի միջանցքի, ՀՀ ինքնիշխան տարածքի, 120 հազար արցախցիներին շրջափակման, էթնիկ զտման եւ ցեղասպանության մասին չկա, ինչի մասին մշտապես խոսել են բոլոր տերությունների ղեկավարները: Դրանից հետո Նիկոլ Փաշինյանը հայտարարում է, թե ՀՀ-ն ձեռնպահ է մնում ստորագրել գագաթնաժողովի հայտարարության այդ մի հատվածը: Փաստորեն, Նիկոլ Փաշինյանն այնքան հեղինակություն չունի, որ անգամ Արեւմուտքին քծնելուց եւ շնորհակալություն հայտնելուց հետո` վերջնական հայտարարության մեջ չկար դատապարտող կոչ Ադրբեջանին, նրան ընդամենը բերել էին գագաթնաժողովին մասնակցելու, որ ստորագրի մի հայտարարության տակ, որտեղ ՌԴ-ին համարում են ագրեսոր եւ ռազմական հանցագործ:

— Ի դեպ, գագաթնաժողովի ընթացքում Նիկոլ Փաշինյանը հավաստիացնում էր, թե Freedom House-ն «Ինտերնետի ազատության» իր տարեկան զեկույցում Հայաստանին դասել է որպես «ազատ» երկիր:

— Նախկին իշխանությունների օրոք` 2013 թվականից սկսած` Freedom House-ը, ինտերնետի ազատության առումով, Հայաստանի Հանրապետությունը մշտապես ճանաչել է ամենաազատ երկրներից մեկը: Իսկ ինչ վերաբերում է Նիկոլ Փաշինյանի մյուս պնդմանը, թե «Լրագրողներ առանց սահմանների» կազմակերպության հրապարակած 2022 թվականի մամուլի ազատության համաշխարհային ինդեքսում ՀՀ-ն բարելավել է իր դիրքերը 12 կետով, ասեմ, որ այդ զեկույցում մամուլի ազատության ցուցիչով մեզնից մեկ նիշ առաջ է Գամբիան, եւ մեզնից մեկ նիշ հետ է Սուրինամը, իսկ մեզնից առաջ է Զամբիան:

ՀՐԱՆՏ ՍԱՐԱՖՅԱՆ

Այս թեմայով Իրանի գլխավոր օդանավակայանը շարունակում է լիարժեք գործել՝ չնայած ԱՄՆ պատժամիջոցներին Մի քեֆ, մի ուրախություն․ ԸՆԿԵՐ ՓԱՆՋՈՒՆԻ  Բրիտանիան կարող է աղետի ենթարկվել, եթե ԱՄՆ-ն արգելի դիզելային վառելիքի արտահանումը. Telegraph ԻՊՀԿ-ն հայտարարեց ԱՄՆ-ի REMUS 600 ստորջրյա անօդաչուի գրավման մասին (Տեսանյութ) Հզոր փոթորիկը հարվածել է ԱՄՆ-ի հյուսիս-արևելքին (Տեսանյութ)