Գոյապայքար` մասնագիտական տոնին

Թատերական գործիչների մասնագիտական տոնը երեկ նշվեց, բառի բուն իմաստով, ԳՈՅապայքարի մթնոլորտում:

Ամեն ինչ սկսվեց նրանից, որ ՀՀ ԿԳՄՍ նախարարի տեղակալ Արա Խզմալյանը «Գոյ» թատրոնի տնօրենի ժամանակավոր պաշտոնակատար Սարգիս Չոլոյանին հրավիրել էր նախարարություն եւ բանավոր կերպով տեղեկացրել, թե քննարկվում է նախագիծ, ըստ որի, նախատեսվում է, որ Արմեն Մազմանյանի անվան բեմարվեստի ազգային, փորձարարական «Գոյ» կենտրոնը» պետք է լուծարվի, վարչական մասը կրճատվի, իսկ ստեղծագործական կազմը միավորվի Գաբրիել Սունդուկյանի անվան ազգային ակադեմիական թատրոն ՊՈԱԿ-ի հետ: Ինչպես ԿԳՄՍ փոխնախարարն էր նշել՝ որպես «էքսպերիմենտալ թատերական խմբակ»: Ավելի ուշ նախարարությունում տեղի էր ունեցել Արա Խզմալյանի եւ «Գոյ» կենտրոնի ստեղծագործական կազմի 7 ներկայացուցիչների հանդիպումը, որի ժամանակ «Գոյ» կենտրոնի ստեղծագործական կազմին ներկայացվել էր՝ որպես առանձին միավոր կենտրոնի լուծարման եւ մեկ այլ թատրոնի հետ միավորման հիմքերը: Մինչդեռ «Գոյից» պնդում են, որ այդ «հիմնավորումները» չեն համապատասխանում  իրականությանը, իսկ իրենք չեն համակերպվելու այդ որոշման հետ: ԳՈՅեցիներին միացան բազմաթիվ անվանի թատերական գործիչներ` անգամ արտասահմանից ուղերձների ակցիա իրականացնելով եւ ամոթանք տալով ԿԳՄՍ նախարարությանը:

«Գոյ» կենտրոնի ռեժիսոր եւ գեղարվեստական ղեկավար ԱՐԹՈՒՐ ՍԱՀԱԿՅԱՆԸ վստահեցնում է, որ թատրոնի վերամիավորման վերաբերյալ խոսակցությունները սկսվել են իրենց «Գարեգին Նժդեհ» ներկայացումից հետո:

«Ունեցանք պրեմիերա «Գարեգին Նժդեհը», որի հաջորդ օրը հրավիրվեցի նախարարություն` պարոն Արա Խզմալյանի մոտ: Զրույցն այսպես սկսվեց` Սարգիս ջան, մենք ընկերներ ենք, հասկանում եմ, բայց զրույցը ծանր է լինելու, դուք ե՛ւ պլանը չեք կատարել, ե՛ւ որպես թատրոն չեք ծառայում ձեր նպատակին, ուստի` ձեզ առաջարկում եմ վարչական մասը ցրել, վերամիավորվել Սունդուկյան թատրոնի հետ: Ասաց, թե կունենանք ընտիր պայմաններ` ե՛ւ լույսը կլինի, ե՛ւ դահլիճը կվերանորոգվի, ե՛ւ գումար կիջնի նոր բեմադրությունների համար, կուզենք Սունդուկյանի մեծ բեմում կբեմադրեք, կուզենք` ներքեւի բեմում, կուզենք Ձմեռային այգում: Ես էլ ասացի, որ նախ ինքս համաձայն չեմ, հետո պետք է խոսեմ կոլեկտիվի հետ, միանձնյա որոշում չեմ կարող կայացնել», - մանրամասնեց թատրոնի տնօրենի ԺՊ ՍԱՐԳԻՍ ՉԱԼՈՅԱՆԸ:

Սարգիս Չալոյանն ասել է փոխնախարարին, որ եթե խնդիրը 3,5 մլն դրամի պատմություն է, ապա իրենք կես տարվա մեջ կկատարեն պլանը` երկու-երեք անգամ էլ ավել:

«Առաջարկել եմ նույնիսկ սուբսիդիայից հրաժարվել, ասացի` մենք կպահենք թատրոնը, միայն շենքին ձեռք մի տվեք: Ասացին՝ այդպես չի լինի, հետո նորից գնացինք մի քանի հոգով պարոն Խզմալյանի մոտ, ժամանակ խնդրեցինք` մեկ տարի, վեց ամիս, ասաց` կմտածեմ, բայց մի քանի օրից արձագանքը բացասական էր, ասաց՝ պետք է վերամիավորվեք: Հիմա ես ուզում եմ ասել, որ պարոն Խզմալյան եւ տիկին նախարար, մի՛ արեք մեզ այդ «լավությունը», մենք չենք ուզում, մեզ վատություն արեք ու մի վերամիավորեք, մեզ լավ պայմաններ պետք չեն, թողեք հանգիստ աշխատենք, մենք աշխատում ենք, եւ դա կփաստի հանդիսատեսը»,- ընդգծեց տնօրենի ժամանակավոր պաշտոնակատարը:

ՀՐԱՆՏ ՍԱՐԱՖՅԱՆ

Այս թեմայով Ոտնակոխ անելով Փաշինյանի այս հայտարարությունները` թփռոշացած ՔՊ-իստները գործող քաղաքապետ են «խաղացնում».ուր է հակակոռուպցիոնը Գորիսի «Համերաշխություն»-ը ոչ մի աղերս չունի իրական «Համերաշխության» հետ ՇՏԱՊ․ Արմավիր ՔԿՀ-ի բանտախցում կտրուկ վատացել է Արթուր Վարդանյանի առողջական վիճակը կտրուկ վատացել է Ռուսական դրամատիկական թատրոնը բացեց 89-րդ թատերաշրջանը «Սովորական պատմություն» ներկայացմամբ Նախկին վարչապետի ընտանիքը սգում է