Ժողովրդի զգալի մասին միեւնույնն է, թե ով կգա իշխանության. ինչ են մտածում սիսիանցիները

Սյունիքի մարզի Սիսիան համայնքում կայացած ավագանու արտահերթ ընտրությունների արդյունքները բաշխվել են հետեւյալ կերպ` «Քաղաքացու որոշում» սոցիալ-դեմոկրատական կուսակցություն` 1443 քվե, Հայաստանի Հանրապետական կուսակցություն` 2553 քվե, «Քաղաքացիական պայմանագիր» կուսակցություն` 7325 քվե: Փաստացի ՔՊ-ն համայնքում կկարողանա միանձնյա իշխանություն ձեւավորել եւ համայնքապետ էլ կարգել մինչ այս ժամանակավոր պաշտոնակատարի դերը ստանձնած Արմեն Հակոբջանյանին: Նկատենք, որ ընտրություններին մասնակցել էր քվեարկելու իրավունք ունեցողների 49.63%-ը կամ` 22.880 քաղաքացիներից 11.356-ը:

«ՏԵՂԱԿԱՆ ԻՇԽԱՆՈՒԹՅՈՒՆՆԵՐԸ ԿՓՈԽՎԵՆ, ԹԵ ՉԵՆ ՓՈԽՎԻ, ԷԱԿԱՆ ՏԱՐԲԵՐՈՒԹՅՈՒՆ ՉԿԱ»

«Իրավունքի» հետ զրույցում Սիսիանի 34/02 ընտրատեղամասի հանձնաժողովի նախագահ ՎԵՅՆԱՄԻՆ ԹԱՆԳՅԱՆԸ, որը Սիսիանի ՀՅԴ կոմիտեից է եւ ներկայացնում էր «Հայաստան» դաշինքը, ասաց, որ ժողովրդի մեջ անտարբերությունը շատ է:

«Ժողովրդի զգալի մասը անկախ է տեղական իշխանություններից, իրենց չի հետաքրքրում, թե ով կղեկավարի: Իրենք իրենց հողն են մշակում, իրենց հոգսերն են հոգում: Խոշոր հաշվով` իրենց միեւնույնն է, թե ով կգա իշխանության»,- ասաց Վեյնամին Թանգյանը:

Ըստ ՀՅԴ-ականի, ընդհանուր երկրի իրավիճակը հաշվի առնելով` այս անգամ իրենց կուսակցությունը չմտավ ընտրապայքարի մեջ:

«Նպատակահարմար չենք համարում այս տիպի ընտրություններին մասնակցելը: Խնդիրն այն է, որ տեղական իշխանությունները փոխվեն-չփոխվեն, էական տարբերություն մարդիկ չեն տեսնում իրենց խնդիրների լուծման առումով»,- ասաց «Հայաստան» դաշինքի ներկայացուցիչը:

«ՈՒՂՂՈՐԴՎԱԾ ԲԵՐՈՒՄ ԷԻՆ ԸՆՏՐՈՒԹՅԱՆ, ԻՆՉԻ ԴԵՄ ՉԷԻՆՔ ԿԱՐՈՂ ԱՌՆԵԼ»

Սիսիանի 34/02 ընտրատեղամասում «Քաղաքացու որոշում» սոցիալ-դեմոկրատական կուսակցության վստահված անձ ՍԱԹԵՆ ԱՍԱՏՐՅԱՆՆ էլ նշեց, որ ցանկանում է Սիսիանը վերջապես ունենա իր վարչական ղեկավարը` հաշվի առնելով, որ դեռեւս նախորդ տարվա սեպտեմբերին կայացած ընտրությունների արդյունքներով, այդպես էլ ավագանին չընտրեց համայնքապետ:

«Այսպես շարունակվել չի կարող: Կարծում եմ՝ պետք է կուսակցական բաժանումներին, այս ամեն ինչին վերջ տալ, համախմբվել եւ իրար հետ աշխատել: Երեւի, միայն միահամուռ աշխատանքով կարող ենք մի բանի հասնել», - ընդգծեց Սաթեն Ասատրյանը:

Ի դեպ, վերոնշյալ ընտրատեղամասում նա արձանագրել էր երկու խախտում, ինչը տեւական պայքարից հետո` ստիպված եղավ չշրջանցել հանձնաժողովի քարտուղարը, որը ո՛չ ավել, ո՛չ պակաս ՔՊ-ական համայնքապետի թեկնածու Արմեն Հակոբջանյանի հայրն էր` Բենիամին Հակոբջանյանը:

«Մեր ընտրատեղամասում համեմատաբար հանգիստ է ընթացել ընտրությունները: Թեպետ պարբերաբար կուտակումներ էինք նկատում ընտրատեղամասից ոչ հեռու: Բայց ոստիկանության օգնությամբ` հնարավոր եղավ ցրել կուտակումները: Սա նկատել էին նաեւ դիտորդները: Մարդկանց ուղղորդված բերում էին ընտրության, ինչի դեմ չէինք կարող առնել, որովհետեւ օրենքով ոստիկանությունը միայն 50 մետր շառավղով է ապահովում, որպեսզի կուտակումներ չլինեն: Սակայն, այդ մարդիկ շարունակում էին մնալ ընտրատեղամասից 100-120 մետր հեռավորության վրա: Նրանք կոնկրետ ՔՊ-ի կողմնակիցներն էին, որոնց անձամբ ենք ճանաչում»,- շեշտեց ՔՈ-ի վստահված անձը:

Հաջորդը, ինչ արձանագրել էր Սաթեն Ասատրյանը, վերաբերում էր կոնկրետ ընտրողի, որն ուներ հոգեկան խնդիրներ:

«Հանձնաժողովի քարտուղարի կողմից հստակ ուղղորդվում էր, թե ով պետք է նրան ուղեկցի քվեախցիկ: Մենք դեմ էինք, բայց իրենք գրանցեցին, որպես ուղեկցող, ում ուզում էին», - ասաց նա:

ՀՐԱՆՏ ՍԱՐԱՖՅԱՆ

Սիսիան-Երեւան

Այս թեմայով Փաշինյանի տրանսֆորմացիան իրականում պայքար է այն հարցի շուրջ, թե Ռուսաստանը Հայաստանի համար լինելու է գործընկե՞ր, թե՞ համակարգային հենարան Շոգը նահանջում է, տեղումնաբեր ցիկլոն կներթափանցի Հայաստան․ ջերմաստիճանը կնվազի Վերսկսվել է Հայաստան բնական գազի մատակարարումը «Հյուսիսային Կովկաս – Անդրկովկաս» գազատարով Իրանում հանդիսավորությամբ նշվել է Հայաստանի Անկախության տոնը Վիրավոր իմ Հայաստան, դու դեռ ուղղելու ես քո ողնաշարը