Թատրոնի 90-ամյա պատմության մասին պատմող գիրքը Երեւանից Ստեփանակերտ տեղափոխելու խնդիր ունենք. Հարությունյան

«Իրավունքը» զրուցել է Ստեփանակերտի Վահրամ Փափազյանի անվան պետական դրամատիկական թատրոնի տնօրեն ԱՐՄԵՆ ՀԱՐՈՒԹՅՈՒՆՅԱՆԻ հետ:

— Պարոն Հարությունյան,  թատրոնում այս պահին ի՞նչ նոր ստեղծագործական ծրագրեր կան:

— Այս պահին մեր ստեղծագործական կյանքը շատ հագեցված է: Նույնիսկ ստեղծված իրավիճակում, երբ փակ է Արցախը Հայաստանի հետ կապող ճանապարհը, մենք որոշել ենք, որ մեր ստեղծագործական կյանքը չի կանգնելու: Ուզում ենք մարտի 27-ին՝ Թատրոնի միջազգային օրը, նշել առաջնախաղով՝ Գուաչիդզեի «Բակում կատաղի շուն կա» բեմադրությամբ, որի ռեժիսորն է Արցախի Հանրապետության ժողովրդական արտիստ Քաջիկ Հարությունյանը:

— Իսկ փակ ճանապարհը, Թատրոնի միջազգային օրը նշելու հետ կապված, խնդիր չի՞ առաջացնի:

— Խնդիրներ, իհարկե, կան, բայց մենք մեր ուժերի չափով փորձում ենք հաղթահարել ստեղծված դժվարությունները: Սակայն փակ ճանապարհի հետ կապված հարցեր կան, որ մեզնից չի կախված: Եթե նույնիսկ մեր ներկայացման գովազդի համար աֆիշա էլ պատվիրեմ, միեւնույնն է, չեմ կարող տեղափոխել Ստեփանակերտ, որովհետեւ  ճանապարհները փակ են: Իսկ առանց գովազդի՝ ներկայացումն արդեն իսկ մեզ համար խնդիր է: Որպեսզի կիսադատարկ դահլիճում չխաղանք, մարդիկ պետք է տեղեկացված լինեն, որ ներկայացում է լինելու: Թատերասեր մարդիկ, որոնք հաճախ են լինում մեր ներկայացումներին, աֆիշա չլինելու պատճառով այս պահին տեղեկացված չեն: Դրանից բացի՝ մեր թատրոնը 2022 թվականին նշել է իր 90-ամյակը, եւ մենք Երեւանում մեր թատրոնի 90-ամյա պատմության մասին շատ հետաքրքիր գիրք ենք պատվիրել, որտեղ նկարազարդ կան մեր բոլոր բեմադրությունները, թատրոնի նախապատմությունը, դերասանների, ռեժիսորների կենսագրությունները: Ներկա պահին գիրքը պատրաստ է: Ծրագրել էինք մարտի 27-ին՝ Թատրոնի միջազգային օրը, երկու միջոցառում անցկացնել՝ առաջնախաղը եւ գրքի շնորհանդեսը: Բայց  այսօր մենք գիրքը Երեւանից Ստեփանակերտ տեղափոխելու խնդիր ունենք: Փորձում ենք գտնել դրա  հնարավոր միջոցները: Եթե կան մարդիկ, որոնք կկարողանան օգնել մեզ գիրքը Ստեփանակերտ տեղափոխելու հարցում, շատ շնորհակալ կլինենք:

— Բացի Թատրոնի միջազգային օրը նշելուց, կա՞ն նոր մտահղացումներ:

— Այո, կան… Մայիսի 3-ին նախատեսված է հյուրախաղեր Իրանում, բայց ճանապարհը փակ լինելու պատճառով՝ չգիտենք՝ կմեկնե՞նք, թե՝ ոչ:  Մեզ հետ պետք է նաեւ դեկորները տանենք՝ ուղեբեռ ունենք:  Այսինքն՝ դա միայն մի քանի հոգու մեկնելու հետ կապված հարց չէ… Հիմնականում մեր բոլոր խնդիրները կապված են փակ ճանապարհի հետ:

— Ներկա պահին թատրոնից դուրս՝ ի՞նչ իրավիճակ է Ստեփանակերտում:

— Արդեն կամաց-կամաց մարդիկ բլոկադայի պայմաններին հարմարվել են: Հերթից հերթ են գնում: Կարող է չորս ժամ հերթ կանգնեն, մեկ կիլոգրամով գնան տուն: Բայց ի՞նչ կարող ես անել, եթե սա է մեր իրականությունը: Թատրոնի փորձերը փորձում ենք այնպես կազմակերպել, որպեսզի մարդիկ իրենց առօրյա հոգսերով զբաղվելու ժամանակ էլ ունենան…

ՆՈՒՆԵ ԶԱՔԱՐՅԱՆ

Այս թեմայով Սի Ցզինպինը 10 տարվա ընթացքում առաջին անգամ պետական ​​այցով կժամանի Միացյալ Նահանգներ Ոտնակոխ անելով Փաշինյանի այս հայտարարությունները` թփռոշացած ՔՊ-իստները գործող քաղաքապետ են «խաղացնում».ուր է հակակոռուպցիոնը Թե բա 82 միլիոն դրամ էլ դեռ ես եմ ներդրել փողոցի լայնացման և բորդուրների համար Պետությունը չպետք է քաղաքացու փոխարեն որոշի՝ նրա վիշտը ֆինանսապես «բավարար ծանր» է, թե ոչ Փաշինյանը նպատակ ունի կտրել թաղման նպաստները