Եզրակացությունները հիմք են տալիս պնդելու, որ երեխաներն այրվել են կենդանության օրոք, հենց այդտեղ է թաղված շան գլուխը. Փաստաբանը մանրամասներ է ներկայացնում

Ազատ գյուղի կացարանում զոհված 15 զինծառայողների ծնողները շարունակում կասկածի տակ դնել տղաների մահվան պաշտոնական վարկածը: Վերջիններս առաջ են քաշում վարկածն առ այն, որ հրդեհի ժամանակ զինծառայողները անշարժ պառկած են եղել մահճակալներին։ Ի վերջո ի՞նչ է պարզվել Ազատ գյուղի զինվորական կացարանում զոհված 15 զինծառայողներից 8-ի դիակների դատաբժշկական փորձաքննության արդյունքներով, հարցի պատասխանը փորձել ենք ստանալ տուժողների ներկայացուցիչ, փաստաբան Նորայր Նորիկյանից, ով փաստեց.

-Մահվան երկու պատճառ է նշվում, առաջինը՝ այրվածքային շոկ, երկրորդը՝ շմոլ գազով թունավորում։ Նշված է, որ այդ եզրակացությունները հիմք են տալիս պնդելու, որ երեխաներն այրվել են կենդանության օրոք, ինչը գործի փաստական հանգամանքների հետ էական հակասության մեջ է մտնում։ Այն հանգամանքների հետ, որոնց մենք տիրապետում ենք։ Երկրորդ՝ շմոլ գազի առկայությունն այրվածքային շոկի հետ շատ լուրջ հակասության մեջ է։ Մենք պետք է հասկանանք, թե շմոլ գազի առկայության պայմաններում ինչպե՞ս է ստացվել, որ ողջ մնացած զինծառայողները առնվազն չեն թունավորվել այդ շմոլ գազից։ Մենք նաև պետք է հասկանանք, թե այդ շմոլ գազն ինչի՞ց է առաջացել, ո՞նց է ներթափանցել ննջասենյակ։ Եթե, ըստ գործի փաստական հանգամանքների, կապիտանը բենզինով վառել է վառարանը, բոցի ու հրդեհի առկայության պայմաններում ի՞նչ շմոլ գազի մասին է խոսքը։ Ավելին, եթե զինծառայողները չեն արձագանքել և հրդեհի պայմաններում այդ տարածքը չեն լքել, այսինքն՝ գոնե ինքնապաշտպանական գործառույթ չեն իրականացրել, դա նշանակում է, որ դրանից առաջ ինչ-որ իրադարձություն է տեղի ունեցել այդ տարածքում։ Ի՞նչ է տեղի ունեցել, հենց այդտեղ է թաղված շան գլուխը։ Պետք է պարզել ճշմարտությունը։ Բացի դա, ողջ մնացած զինծառայողների չթունավորված լինելու, այնտեղ գտնվելու, այդ տարածքից դուրս գալու հանգամանքները պարզման ենթակա հանգամանքներ են։

ԻԼՈՆԱ ԱԶԱՐՅԱՆ