Ազգին ու հայրենիքին ոչ պիտանի մարդիկ միշտ էլ եղել են ու կլինեն. Տեր Եփրեմը՝ ՔՊ-ական պատգամավորին

«Մեր հայրենիքի ու ազգի համար ծայրահեղ լարված ու մտահոգիչ ժամանակներում, երբ փոխըմբռնումն ու միաբանությունը առավել կարեւոր են, քան երբեւէ, ամեն մի չմտածված քայլ ու խոսք, արարք ու պահվածք էլ ավելի են փխրուն ու խոցելի դարձնում մեր հասարակական կյանքն ու հիմքերը... Զավեշտալի ու պախարակելի է, երբ դա դրսեւորվում է պատասխանատվության մեծ չափաբաժին կրող մեկի կողմից։ Խորհրդարանի ՔՊ խմբակցության պատգամավոր Արմեն Խաչատրյանի ճեպազրույցն, ինչ խոսք, դրա թարմ ու վառ օրինակն է։ Մի անձնավորություն, որին ժողովուրդն այսօր վստահել է երկրի օրենսդիր մարմնում ազգային եւ հասարակական կյանքի շատ մտահոգիչ հարցերի լուծումը տալ, շատ հանգիստ եւ ոչ մտահոգ կերպով արտահայտվում է թմրանյութերի օգտագործման նորմալ լինելու մասին, եւ դեռ ավելին, օգտագործողների մեջ հոգեւորականներին մատնանշում։ Ինչ խոսք, հստակ է, թե ինչ նպատակ կա այս նենգավոր շեշտադրման մեջ, բայց անժխտելի է այն հանգամանքը, որ դարեր ի վեր ազգին միաբանող եւ հոգեւոր-բարոյական արժեքներ սերմանող հայ եկեղեցին ու հոգեւորականը նման քստմնելի զրպարտանքներից ու բամբասանքներից չեն երերացել, ընդհակառակը՝ ավելի ըմբռնումով ու գիտակցորեն են շարունակել իրենց առաքելությունը հայ ժողովրդի անդաստանում... Իսկ Արմեն Խաչատրյանի պես` ազգին ու հայրենիքին ոչ պիտանի մարդիկ միշտ էլ եղել են ու կլինեն... Աստծո օրհնությունն ամենքիս...», - գրել է Արժանապատիվ ՏԵՐ ԵՓՐԵՄ քահանա ՀԱՐՈՒԹՅՈՒՆՅԱՆԸ: