Իմ մուտքը Հայաստան փակ է գործող իշխանության հանդեպ նողկանքի համար. Մարգարիտա Սիմոնյան

RT–ի, «Ռուսաստան այսօր» ՄՏԳ-ի եւ Sputnik–ի գլխավոր խմբագիր Մարգարիտա Սիմոնյանն արձագանքել է Նիկոլ Փաշինյանի խոսքերին, որոնք նա հնչեցրել է ասուլիսի ժամանակ։

 

Փաշինյանն ասել էր, որ Հայաստանն իր նկատմամբ հարգանք ակնկալելու իրավունք ունի, եւ ՀՀ-ում անցանկալի անձ են հայտարարվել այն մարդիկ, որոնք ելույթ են ունենում ու հայտարարում, որ Հայաստանը միջանցք է խոստացել, թող տա այդ միջանցքը։

 

Վերջին շրջանում Հայաստանում անցանկալի անձ են հայտարարվել Պետդումայի պատգամավոր, իր հայամետ դիրքորոշմամբ հայտնի Կոնստանտին Զատուլինը,  RT-ի եւ Sputnik-ի գլխավոր խմբագիր  Մարգարիտա Սիմոնյանն ու մեդիամենեջեր Արամ Գաբրիելյանովը: Թե ուրիշ ովքեր են ներառված «սեւ ցուցակում», Փաշինյանը չէր նշել` հայտարարելով, որ դրանով զբաղվում են իրավասու կառույցները։

Նա նշել է, որ իր այս խոսքերի համար է հայաստանյան մուտքը փակվել, ինչի մասին խոսել է դեռ ամռանը։ Միեւնույն ժամանակ, Սիմոնյանը ընդգծել է, որ արգելքն իրեն քիչ է հուզում, ինքն առանց այդ էլ չէր պատրաստվում մեկնել Հայաստան։ Ինչպես խոստովանել է Սիմոնյանը, նա Հայաստանում եղել է երկու անգամ` 25 տարեկանում Պուտինի աշխատակազմում աշխատելիս եւ 35 տարեկանում, երբ եկել էր ծանոթանալու ամուսնու` Տիգրան Քեոսայանի բարեկամների հետ։

 

Սիմոնյանը շեշտել է, որ ներկայիս իշխանությունների օրոք ինքը Հայաստան ոչ մի դեպքում չէր էլ գա։

 

«Սակայն շփոթեցնում է այն ձեւակերպումը, որով արգելել են իմ մուտքը` «անհարգալից վերաբերմունքի համար»», – ասել է RT–ի գլխավոր խմբագիրը եւ հավելել, որ անհարգալից վերաբերմունքը դեռ վաստակել է պետք։

 

«Այսպես փոխեք ձեր ձեւակերպումը. «Մարգարիտա Սիմոնյանի մուտքը Հայաստան փակ է գործող իշխանության հանդեպ նողկանքի համար», - եզրափակել է նա։