Մեր ամենահզոր զենքերը ուղղակի չեն օգտագործվել 44-օրյա պատերազմում. Սերժ Սարգսյան

«Բանակցային առաջնագծում» գրքի շնորհանդեսի պաշտոնական մասի ավարտից հետո՝ ՀՀ երրորդ նախագահ Սերժ Սարգսյանը համբերատար պատասխանեց լրագրողների ամենատարբեր հարցերին: Այդ թվում՝ հարց հնչեց 44-օրյա պատերազմից հետո գործող իշխանության կողմից տարածվող այն թեզի վերաբերյալ, թե  բանակ չենք ունեցել, այն եղել է նախկին իշխանության համար կոռուպցիայի աղբյուր: Ի վերջո մենք բանակ ունեցե՞լ ենք, մարտունա՞կ էր, թե՝ ոչ, ՀՀ երրորդ նախագահը փակագծեր բացեց:

«Մենք, այո, ունեցել ենք բանակ, եւ մեր բանակը դա ապացուցել է 1992-94 թթ.-երից մինչեւ ընդհուպ 2018 թվականը: Երկրի այս կառավարիչները հաճախ փորձում են ինչ-որ բան համեմատել ավտոմեքենայի հետ: Մեր բանակը Մերսեդես չէր, դա՝ անկասկած, եւ չէր էլ կարող լինել, որովհետեւ նույն Մերսեդեսը տասնամյակների պատմություն ունի, բայց մեր բանակը արժե համեմատել «добротный» նորմալ մեքենայի հետ, որն իր պարտականությունները կատարում էր: Սրանք խոսում են այն մասին, որ այդ մեքենան լավը չէր, այս չէր, այն չէր ու մոռանում են, որ այդ մեքենան վարում է ոչ միայն վարորդական իրավունք չունեցողը, այլ ընդհանրապես վարել չիմացողը եւ անխուսափելիորեն այդ մեքենան ձորն է ընկնելու: Եվ ընկել է ձորը: Բայց փոխարենը հասկանան, որ պետք է վարել իմանալ, նորից խոսում են՝ բանակ չենք ունեցել, այս չենք ունեցել, այն չենք ունեցել: Բոլոր այն թվերը, որ իրենք հրապարակում են փողի հետ կապված, միֆ է, հեքիաթ է, որովհետեւ նույնիսկ սովորական քաղաքացին շատ լավ գիտի, թե ինչ է նշանակում 1 դոլարը, 100 դոլարը 2023 թվականին եւ ինչ արժեք ուներ այդ դոլարը 1994, 2004, 2014 թվականին: Որեւէ մեկը չի խոսում այն մասին, որ 2018-ից հետո Հայաստանը որեւէ ռազմատեխնիկական աջակցություն չի ստացել: Իսկ մինչեւ 2018-ը՝ ես կարող եմ խոսել իմ ժամանակահատվածի մասին եւ մինչեւ այդ, երբ ես երկար տարիներ եղել եմ ՊՆ նախարար, մենք ստացել ենք ահռելի ռազմատեխնիկական օժանդակություն: Չեմ ուզում թվեր ասել, որ շահարկման առարկա չդառնա, բայց դա ահռելի էր», - ընդգծեց Սերժ Սարգսյանը:

ՀՀ երրորդ նախագահը նաեւ շեշտեց, որ մեր բանակն ունեցել է բավականաչափ ռազմամթերք ու ռազմական տեխնիկա՝ պատերազմն այսպես չավարտելու համար:

«Մեր ամենահզոր զենքերը չեն օգտագործվել, ուղղակի, չեն օգտագործվել ինձ համար անհասկանալի պատճառներով, իսկ այդ զենքերը ժամանակին օգտագործելու պարագայում իրավիճակը բոլորովին այլ կերպ կլիներ: Հետո խոսում են, որ զինամթերք չի եղել, զենք չի եղել: Բա եթե հետեւում եք ռուս-ուկրաինական ռազմական գործողություններին, տեսնո՞ւմ եք, որ ռուսական կողմը օգտագործում է բոլոր այն զենքերը, որ մենք ունեինք: Զենքը նաեւ օգտագործող է պետք: Եթե դու չես օգտագործելու, եթե նույնիսկ ատոմային ռումբ էլ ունենայինք, չէին օգտագործելու: Ոչ միայն զինամթերքի, նաեւ անձնակազմի առումով մենք 44-օրյա պատերազմում օգտագործել են 50%-ի չափով, բա այն 50%-ը ինչո՞ւ չեն օգտագործել՝ դա արդեն մյուս հարցազրույցների ժամանակ», - եզրափակելով խոսքը՝ ասաց Սերժ Սարգսյանը:

ՀՐԱՆՏ ՍԱՐԱՖՅԱՆ

Այս թեմայով Հազար նոր ավտոբուս էլ բերենք, պիկ ժամերին հնարավոր է քչություն անի. Աշոտ Սարգսյան ՇՏԱՊ․ Արմավիր ՔԿՀ-ի բանտախցում կտրուկ վատացել է Արթուր Վարդանյանի առողջական վիճակը կտրուկ վատացել է ՔՊ-ի կեղտոտ սպիտակեղենը փռել են արեւին Հայկ Սարգսյանն ասեց՝ պապայի ընկերն ա, կարա՞ գա. Սիմոնյանը մանրամասներ է պատմում քրեական հեղինակության հետ հանդիպումից ՇՏԱՊ. ՀՀ նախագահ անճանաչելիորեն փոխվել է. ՖՈՏՈ