ՌԴ-ն մեր լավագույն դաշնակիցն է, որովհետեւ այլընտրանք չկա. Սերժ Սարգսյան

ՀՀ երրորդ նախագահ Սերժ Սարգսյանը «Բանակցային առաջնագծում» գրքի շնորհանդեսի պաշտոնական արարողությունից հետո՝ լրագրողների հետ զրույցում անդրադարձավ նաեւ հայ-ռուսական դաշնակցային հարաբերություններին, մասնավորապես ադրբեջանական վերջին դիվերսիոն հարձակումից հետո՝ ռուս խաղաղապահների հանդեպ առկա դժգոհություններին:

«Ես, բնականաբար, եւս ոգեւորված չեմ ՌԴ որոշ պաշտոնյաների հայտարարություններով եւ անթույլատրելի եմ համարում, երբ ահաբեկչին ու ահաբեկչի թիրախին դնում են նույն հարթության վրա՝ երկուսին էլ կոչ անելով հանդարտության: Սա ինձ հիշեցնում է 80-ականների վերջին Սովետական միության գերագույն խորհրդի մի նախագահի, որը երբ ժողովուրդներն իրար հետ կռվում էին, ասում էր՝ «կլուբնիկի» պատճառով են իրար հետ կռվում: Բայց մյուս կողմից էլ տեսանք ՌԴ պաշտպանության նախարարության հասցեական հայտարարությունը: Իսկ ուրիշ ավելի հստակ հայտարարություններ եղա՞ն: Այո, ես տեսա, որ Ֆրանսիայի ԱԳՆ-ն եւս հասցեական հայտարարություն արեց, բայց մեր տարածաշրջանում կա ԵՄ հատուկ ներկայացուցիչ, ով պարտավոր է այդ բոլոր իրադարձություններին մանրամասն տեղյակ լինել: Իսկ նա ի՞նչ ասաց: Ի՞նչ է նշանակում՝ արյունոտ միջադեպ, դա ի՞նչ ասելու բան էր: Ամեն ինչը պետք է միշտ դիտարկել համեմատության մեջ: Լավ, ռուսական խաղաղապահներին քննադատում ենք, ասում ենք՝ գնացեք, կա՞ մի երկիր, որ պատրաստ է խաղաղապահներ բերել, կա՞ այդպիսի մի երկիր: Եթե չկա, ինչո՞ւ են ավել-պակաս խոսում: Իսկ Լեռնային Ղարաբաղի Հանրապետությունն այսօր ի վիճակի՞ է դիմակայել Ադրբեջանին՝ առանց խաղաղապահների, հատկապես, որ Հայաստանը ձեռքերը լվացել է: Հայաստանն այլեւս իրեն չի համարում անվտանգության երաշխավոր, վաղուց արդեն չի համարում՝ կոպիտ ձախողվելուց հետո, ես նկատի ունեմ 44-օրյա պատերազմը: Բա այդ 120 հազարը ո՞նց պետք է դիմակայի այդ 10 միլիոնին: Ուրեմն՝ անհրաժեշտություն է, չէ՞, այնտեղ այսօրվա խաղաղապահների առկայությունը», - շեշտեց ՀՀ երրորդ նախագահը:

ՀՀ երրորդ նախագահի գնահատմամբ՝ միշտ պետք է հիշել, որ որեւէ դաշնակցային հարաբերություն միակողմանի օգնության համար չէ:

«Սովորական մարդկային հարաբերություններում էլ միայն այն ընկերությունն է ամուր, երբ ընկերակցող կողմերը գիտակցում են, որ ընկերությունը նաեւ փոխադարձ պատասխանատվություն է, փոխադարձ պարտավորություն է, եւ ոչ թե՝ դու միշտ տուր, տուր, տուր, իսկ ես ձեռքերս ծալեմ՝ անցնեմ-գնամ, մեկ ուրիշի հետ սկսեմ խոսել: Սա պետք է գիտակցել: Պետք է հասկանալ, որ միջազգային քաղաքականությունը շատ կոշտ, դաժան կողմեր ունի: Երբ տեսնում են, որ մարդ տեղից բան չի հասկանում, անմիջապես կուլ են տալիս: Այո, Ռուսաստանը եղել է եւ հիմա էլ մեր դաշնակիցն է, իսկ մեր կողմից դուք տեսնո՞ւմ եք այդպիսի դաշնակցային հարաբերություններ: Ես երբեք ռուսամոլ չեմ եղել, երբե՛ք, չեմ էլ լինելու, ես համարել եւ համարում եմ, որ ՌԴ-ն մեր լավագույն դաշնակիցն է, որովհետեւ այլընտրանք չկա: Նրանք, ովքեր ուզում են գալ մեր տարածաշրջան, ի՞նչ են մեզ առաջարկում: Իսկ ովքեր այդ գաղափարը առաջ են տանում, արդյո՞ք պայմանավորվածություն ունե՞ն, ՆԱՏՕ-ն գալու է այստեղ՝ ռազմաբազա դնի՞, եվրոպական մի որեւէ երկիր Ղարաբաղում կոնտինգենտ է ունենալո՞ւ: Դուք շատ լավ գիտեք, որ ես երբեք հակաեվրոպա էլ չեմ եղել, բացարձակապես: Ասածս, իմ կշտամբանքն այս պահին վերաբերում է ոչ թե ՆԱՏՕ-ին կամ ԵՄ-ին, այլ այն ավանտյուրիստներին, ովքեր ինչ-ինչ հանգամանքներից ելնելով՝ փորձում են այստեղ ամեն ինչը պղտորել: Իսկ պղտորելը լավ բանի չի կարող բերել», - ընդգծեց Սերժ Սարգսյանը:

ՀՐԱՆՏ ՍԱՐԱՖՅԱՆ

Այս թեմայով Ռուսական ռուբլին 2025 թվականի ամենաուժեղ արժույթն է․ Bloomberg «Բենզին հողի դիմաց» օպերացիա. ԸՆԿԵՐ ՓԱՆՋՈՒՆԻ Եթե ՔՊ-ն մնաց իշխանության, Էրդողանը կորոշի՝ ով կլինի ՀՀ Կաթողիկոսը. Արամ Սարգսյան Ռուսական ուժերը խորը ճեղքումից հետո մտել են Կոնստանտինովկայի արեւելյան հատված (Քարտեզ) Ղազախստանի նախագահ Տոկաեւը Դոնալդ Թրամփին հրավիրել է այցելել Ղազախստան