Երբ մարդիկ չունեն նույնիսկ տարրական կենցաղը բավարարող պայմաններ եւ սնունդ, տարբերվելն ուղղակի ամոթ է. Հակոբյան

Ի՞նչ է կատարվում 82 օր շրջափակված Արցախում, արդյո՞ք կան արտոնյալներ, որոնց համար չկան փակ ճանապարհներ եւ շրջափակումով պայմանավորված այլ սահմանափակումներ, «Իրավունքը» հետաքրքրվեց Արցախի ԱԺ «Արդարություն» խմբակցության պատգամավոր ՄԵՏԱՔՍԵ ՀԱԿՈԲՅԱՆԻՑ:

— Այս առումով տարօրինակ իրավիճակ է, որովհետեւ կա՛մ ես եմ լավ լույսի ներքո նայել այդ ամենին, կա՛մ իրականում չի եղել նման խնդիր, թեպետ շատերն են փաստում, որ չի եղել: Երբ իշխանությունն էր խոսում ամոթի եւ խարանի մասին՝ ի դեմ նախկին պետնախարար Ռուբեն Վարդանյանի, ավելի ազդեցիկ էր, եւ իրականում աշխատեց այդ հանգամանքը: Մարդիկ երբ իրենց տներում չունեն նույնիսկ տարրական կենցաղը բավարարող պայմաններ եւ սնունդ, այդ պարագայում տարբերվելն ուղղակի ամոթ է: Եվ դրանով պայմանավորված՝ հավատացեք, որ այսքան օրերի ընթացքում չեմ նկատել արտոնյալներ, չեմ նկատել այդպիսի պահվածխք որեւէ մեկի կողմից: Եզակի դեպքեր եղել են, որոնց հանրային ամոթանք է տրվել, անմիջապես շտկվել է: Նաեւ վերահսկողությունն է բավականին ուժեղ եղել, որպեսզի  չլինի հանկարծ այնպես, որ որոշ տնտեսվարողներ կարողանան համաձայնությունների գալ, շրջանցել սահմանափակումները, ապրանք ներկրել եւ բարձր գներով վաճառել: Էլի եմ ասում՝ այնպես չէ, որ բացարձակ չի եղել նման խնդիր, բայց դրանց եղել է բավականին կոշտ արձագանք թե՛ հանրության, թե՛ համապատասխան մարմինների կողմից, որից հետո նման գործունեությունն ուղղակի դադարեցվել է:

— Ամեն դեպքում, երբեմն տպավորություն է ձեւավորվում, որ ճանապարհը փակ է միայն շարքային քաղաքացու համար: Իսկ ոմանք լավ էլ գնում-գալիս են:

— Չեմ ուզում ֆիքսվենք եզակի դեպքերի վրա, եթե նույնիսկ դրանք եղել են: Չեմ ուզում սա դարձնել քննարկման առարկա, որովհետեւ սա եւս սոցիալական անարդարության հետեւանքն է, որը միշտ գործել է: Միշտ եղել են արտոնյալներ եւ բավականին շատ: Իհարկե, սկզբում փորձեր արվեցին, որից հետո ուղղակի կանխվեցին նման դեպքերը: Եթե կա կարիք, ենթադրենք, որ քաղաքական գործիչը կամ պետական այրերից մեկը հրատապության կարգով Արցախի Հանրապետությունից դուրս գա, ապա ռուս խաղաղապահների միջնորդությամբ՝  կարողանում են: Իսկ Կարմիր խաչի միջնորդությամբ միայն կիսված ընտանիքները եւ ծայրահեղ վիճակում գտնվող հիվանդներն են կարողանում անցնել ճանապարհը: Այո, սկզբնական օրերին եղել են խախտումներ, բայց արդեն օրինաչափ է դարձել, որ բոլորը  պետք է պահեն ու պահպանեն այն դեռեւս չգրված օրենքները եւ կարգերը, որոնք կան այս իրավիճակում:

ՀՐԱՆՏ ՍԱՐԱՖՅԱՆ

Այս թեմայով Հայտնի է մարզպետից՝ համայնքապետ ձգտման պատճառը «Իրավունք». Ով է Վանեցյանի կուսակցությունով առաջադրված Լեվոն Վահրադյանը Գերիների վերադարձը չի կարող դիտարկվել երկրորդական հումանիտար հարց, դա առաջնահերթ խնդիր է. Մետաքսե Հակոբյան Դուք անառակ եք, անբարո, անսիրտ, անպատիվ ծախու կենդանիներ․ Կարին Տոնոյան 23 տարի Արցախի հողը գրկած ապրեցիր, տղաս… Հիմա թող հողը խաղաղությամբ գրկի քեզ․ հերոս Արտուշ Արզումանյանի մայր