Մեզ իշխանություն պետք չէ, Հայրենիք է պետք. Տիգրան Վարդանյան

«Իրավունք TV»-ի տաղավարում զրուցել ենք ՀՀԿ խորհրդի անդամ ՏԻԳՐԱՆ ՎԱՐԴԱՆՅԱՆԻ հետ:

— 80 օր շրջափակման մեջ գտնվող Արցախի համար ընդամենը մեկ քիչ, թե շատ մասշտաբային ակցիա տեղի ունեցավ` այն էլ միայն ՀՀԿ-ի կողմից` Ամանորին ընդառաջ: Այսօր ընդդիմությունն ակտիվություն դրսեւորում է միայն սոցցանցերում եւ առցանց այլ հարթակներում, բայց ոչ փողոցում, ինչո՞ւ:

— Մեդիատիրույթում սկսել են շահարկել նաեւ մեր հանրահավաքը, որոշ ընդդիմադիր ներկայացող անձնավորություններ էլ թիրախավորում են մեզ, թե ՀՀԿ-ն դուրս էր եկել փողոց իշխանության գալու համար: Մինչդեռ բազմիցս հայտարարել ենք, որ մեզ իշխանություն պետք չէ, մեզ պետք չի, օրինակ, լինել ընդդիմության առաջին, երկրորդ, երրորդ համարը, մեզ հայրենիք է պետք` հող, որի վրա իրենց աթոռները կարողանան դնել այն ընդդիմադիրները, ովքեր պայքարում են դրա համար: Կարծում եմ` բոլորն էլ տեսան, թե Ձեր նշած հանրահավաքի ժամանակ կառավարության դիմաց, ովքեր էին ներկա եւ ինչ թվաքանակով: Այսինքն` այն բոլոր ընդդիմադիր ուժերը, ովքեր կարող էին կոնսոլիդացնել, այսպես ասած, իրենց մարդկանց, այն ՀԿ-ներին, որոնք իրենք են ֆինանսավորում, չարեցին: Մինչդեռ մենք 44 օրից ավել եղել ենք փողոցում, գիշերել ենք Ֆրանսիայի հրապարակում եւ ամեն օր, մեր ուժերը թարմացնելով, ներկա ենք եղել: Ճիշտ է, ո՛չ առաջին համարն ենք եղել, ո՛չ գլխավոր կազմակերպիչը, բայց ներկա ենք եղել, որովհետեւ ով ուզում է լինի, յուրաքանչյուր հայրենասեր եւ հայրենանվեր մարդու կողքին ՀՀԿ-ն կանգնելու է` իր բոլոր լծակներով:

— Իսկ հիմա ինչո՞ւ դուրս չեք գալիս փողոցային պայքարի, նեղացե՞լ եք…

— Մենք չենք նեղանում մեր ժողովրդից ու չենք էլ նեղանալու, պարզապես կասեմ հետեւյալը` ընդդիմությունն ունի մեկ հնարավորություն, եւ այն մսխելը անպատասխանատվություն է լինելու: Այդ հնարավորությունը մսխելը ընդդիմության համար արժենալու է Հայաստանի եւ Արցախի վերջնական վախճանը: Ու այդ ժամանակ ոչ մեկը չի գալու ծաղիկ խոնարհի մեր պետության առաջ, ուղղակի, հիշողները կհիշեն, մնացածներն էլ թուրքական մանաթներով նորից կվաճառվեն: Միայն ընդգծեմ, որ ՀՀԿ-ի ձայնը լսելի եղել է եւ լինելու է, ու կարծում եմ` առաջիկայում ունենալու ենք այդ պատմական հնարավորությունը, որպեսզի սրանց հեռացնենք: Պետք է ճիշտ օգտագործենք վերջին փամփուշտը,  որն ունի ընդդիմությունը, որովհետեւ հակառակ դեպքում` Նիկոլ Փաշինյանն  ավելի է ամրապնդելու իր դիրքերը:

ՀՐԱՆՏ ՍԱՐԱՖՅԱՆ

Հ.Գ.– Հարցազրույցն ամբողջությամբ դիտե՛ք տեսանյութում.

Այս թեմայով ՇՏԱՊ․ Արմավիր ՔԿՀ-ի բանտախցում կտրուկ վատացել է Արթուր Վարդանյանի առողջական վիճակը կտրուկ վատացել է Անբարոյական մոտեցում է, եթե ՊՆ նախարարը գտնում է, որ բանակի ողբերգական դեպքերում իր մեղքը չկա Ադրբեջանական ագրեսիայի հետևանքով Արցախն ունեցել է 220-ից ավելի զոհ 2023 թվականի սեպտեմբերի 19–20-ը ավարտվեց ոչ միայն պատերազմը, այլ նաև Արցախի հայկական պետականության մի ամբողջ պատմաշրջան Գուցե արժե հարցնեք ինքներդ ձեզ՝ ինչի՞ եք հասցրել այս երկիրը․ ԶԱՐՄԱՆՔ