Եթե իրավական պետության դաշտում լինեինք, նորմալ պատգամավորները առնվազն կբարձրացնեին այդ հարցը. Մելոյան

Ընդդիմադիր «Պատիվ ունեմ» եւ «Հայաստան» խմբակցությունները միացել են ՍԴ դատավոր Սեդա Սաֆարյանի լիազորությունները դադարեցնելու հարցով Սահմանադրական դատարան դիմելու միջնորդությանը: Ի՞նչ ընթացակարգ է սպասվում, ի՞նչ կարելի է ակնկալել, «Իրավունքը» պարզել է սահմանադրագետ ԳՈՀԱՐ ՄԵԼՈՅԱՆԻՑ:

— Նախ ոչ վաղ անցյալում արդեն կիրառվել է նման ընթացակարգ, մասնավորապես` խոսքը ՍԴ դատավորի լիազորությունները դադարեցնելու մասին է:  «Իմ Քայլը» խմբակցությունը նախաձեռնել էր նույն գործընթացը ՍԴ նախագահ եւ դատավոր Հրայր Թովմասյանի լիազորությունների դադարեցման կապակցությամբ, որը հանրության համար թեմա էր դարձել: Իմ գնահատմամբ` այն ակնհայտ ապօրինի բնույթ ուներ, եւ շուրջ մեկ տարի` ի դեմ պարոն Թովմասյանի` ՍԴ հարգարժան դատավորների ողջ կազմը հետապնդումների էին ենթարկում: Հիմա կրկին իմ գնահատմամբ` ավելի արդարացված հիմքով նմանաբնույթ պրոցես է մեկնարկվել: Ընթացակարգը կարգավորվում է Սահմանադրությամբ՝  ԱԺ կանոնակարգ եւ Սահմանադրական դատարանի մասին սահմանադրական օրենքներով: Իրավական պրոցեսի համաձայն, խմբակցությունները ներկայացնում են ԱԺ որոշման նախագիծ՝ կոնկրետ ՍԴ դատավորի լիազորությունները դադարեցնելու  վերաբերյալ, որի արդյունքնում այն պետք է հավանության արժանանա ԱԺ պատգամավորների 3/5-ի կողմից եւ հավանության արժանանալու պարագայում ներկայացվի ՍԴ: Այնուամենայնիվ, երկու ընդիմադիր խմբակցությունները քանի որ չունեն այդ 3/5 մասը, ըստ իս, այս գործընթացն ավելի շատ քաղաքական հետեւանքների պետք է վերածվի եւ ինչ-որ փուլում կթեւակոխի քաղաքական դաշտ: Պատկերացնո՞ւմ եք, եթե իրավական պետության շրջանակներում լինեինք եւ եթե իշխանության կամարտահայտությամբ առաջնորդվող դատավոր լիներ, կարգապահական խախտման պարագայում ինչպիսի աղմուկ կբարձրացվեր: Այնուամենայնիվ, իմ կարծիքով` դժվար թե գործող իշխող խմբակցությունը միանա այս մեկնարկին, բայց, ամեն դեպքում, սպասենք հետագա գործողությունների զարգացմանը: Ես դրական ոչինչ չեմ ակնկալում, չեմ կարծում, որ իրենք իրենց կողմից ընտրված, իրենց համար յուրային հանդիսացող ՍԴ դատավորի լիազորությունների դադարեցման պրոցեսին կմիանան: Նորից կկրկնեմ` եթե իրավական դաշտում դիտարկենք, իհարկե, նորմալ պատգամավորները առնվազն կբարձրացնեին այդ խախտման հարցը եւ որոշակիորեն դիտարկումներ կանեին տիկին Սաֆարյանի վարքագծի վերաբերյալ:

ԼԻԼԻԹ ՀԱՐՈՒԹՅՈՒՆՅԱՆ

Այս թեմայով Վիրավոր իմ Հայաստան, դու դեռ ուղղելու ես քո ողնաշարը Օպերային երգիչներին ու Կապելլային՝ չնչին գումարներ, տաշ-տմբլ երգողներին՝ բազմապատիկ ավել․ Սուքիասյան Ի՞նչ են քննարկել «Ուժեղ Հայաստան»-ի եւ «Հայաստան»-ի ղեկավարները ՇՏԱՊ. ՀՀ նախագահ անճանաչելիորեն փոխվել է. ՖՈՏՈ ՇՏԱՊ. Նարիմանյանը ցույց է տալու այն մարդկանց, ովքեր դիմակով և առանց դիմակի բռնության են ենթարկել. Խորխոռունու սպանության հետքերով