Եթե Պահք ենք պահում, բայց չար գործից եւ մեղքից չենք հրաժարվում` դա հավասարազոր է Պահք չպահելուն. Գերաշնորհ Տ. Առաքել արքեպիսկոպոս Քարամյան

Սկսվել է Մեծ Պահքի շրջանը, որը տևում է 40 օր, որին հաջորդում է 7-օրյա ավագ շաբաթվա շրջանը: Որն՞ է տոնի հիմնական խորհուրդը, ինչո՞վ է այն տարբերվում եկեղեցական այլ տոներից հարցերի պատասխանը փորձել ենք ստանալ Կոտայքի Թեմի առաջնորդ Գերաշնորհ Տ. Առաքել արքեպիսկոպոս Քարամյանից, ով  նախ նկատեց.

-«Բարեկենդան» նշանակում է բարի կենդանություն կամ բարի կյանք, որը խորհրդանշում է մարդու երանական վիճակը դրախտում: Մարդն ապրում էր դրախտում Աստծո ներկայությամբ, նրան խորթ էին վիշտն ու ցավը տառապանքն ու դառնությունը: Պահքի կարեւորության մասին խոսվում է հին ու նոր կտակարաններում: Պահքը սահմանվել է Աստծո կողմից դեռեւս դրախտում, դրախտի մեջ Աստված պատվիրել էր մարդուն, որ ամեն ինչից կարող է օգտվել, բացի դրախտի կենտրոնում տնկած բարու եւ չարի ծառից` դա պահքն էր: Մովսես Մարգարեն տասը պատվիրանները ստանալուց առաջ 40 օր պահք պահեց: Դավիթ Մարգարեն մեղք գործելուց հետո պահք պահեց` զղջաց եւ ապաշխարհեց: Նինվե քաղաքի ողջ բնակչությունը պահք պահեցին, որպեսզի Աստված չկործանի իրենց քաղաքը, Քրիստոսը մկրտվելուց առաջ 40 օր պահք պահեց: Պահքը մարդուն զինում եւ դառնում է նրա համար որպես վահան ամրության ու դիմակայում չարի դեմ հեգեւոր եւ մարմնական փորձությունների ժամանակ: Կերակրի պահքը անօգուտ է առանց մեղքից հետ կանգնելու: Ի՞նչ օգուտ, եթե մարդը նիհարի` պահք պահելով, բայց հոգին գիրանա մեղքով: Եթե մենք կարողանում ենք պահել պահք, բայց չար գործից եւ մեղքից չենք հրաժարվում` դա հավասարազոր է պահք չպահելուն: Մեր երանավետ հայրապետներից Գրիգոր Տաթեւացին ասում է` ոմանք պահոց օրերին կենդանու միս չեն ուտում, բայց հաճույքով իրար միս են ուտում: Պահքը շատ կարեւոր է, երբ այն ներդաշնակված է աղոթքի հետ: 

-Սրբազան, որո՞նք են Պահքի շրջանում կարեւոր քայլերը, որոնք պետք է իրականացնի հավատացյալը:

-Մեծ պահքի շրջանում մենք պետք է զբաղվենք Աատվածաշնչի ընթերցանությամբ, աղոթքի մեջ լինենք, մարդկանց ողորմություն տանք, մասնակցենք սուրբ եւ անմահ պատարագներին, խոստովանանք մեր մեղեքրը, ապրենք առաքինի կյանքով` ներողամիտ եւ համբերտար լինենք, մարդկանց չդատենք, մեր լեզուներն ու ականջները բամբասանքների չտրամադրենք, տարատեսական հաճույքներից հոգով եւ մարմնով հեռու մնանք:

-Սրբազան, շաբաթ երեկոյան փակվեցին բոլոր եկեղեցիների վարագույրները, սա ի՞նչ խորհուրդ է իր մեջ պարունակում:

- Փակվեցին եկեղեցու վարագույրները, բայց ժամանակն է, որպեսզի բացենք մեր հոգու վարագույրները եւ նայենք մեր ներսը, քննենք մեզ ու հարց տանք` ճի՞շտ ենք ապրում արդյոք երկրի վրա, թե՞ սխալ: Խորանը խորհրդանշում է երկինք, իսկ վարագույրը` երկնքի դռները, որոնք անպայմանորեն բացվելու են մեր առջեւ մեր Տեր Հիսուս Քրիստոսով Ծաղկազարդին: Մեծ պահքը սկսվում է Բուն Բարեկենդանով եւ ավարտվում մեր փրկչի Սուրբ Հարության տոնով, իսկ այդ երկու տոների միջեւ ընկած է հոգու եւ մարմնի մաքրության ապաշխարհության շրջանը:

Զրույցը` ԻԼՈՆԱ ԱԶԱՐՅԱՆԻ