Փողոց են նետել մարդկանց ու թքած ունեն, սա է պետության վերաբերմունքը. պատգամավորներն այցելեցին ՊՆ նախկին շենքի բնակիչներին

ՊՆ նախկին շենքի բնակիչներն արդեն գրեթե երկու շաբաթ է, ինչ մնացել են փողոցում՝ մի կերպ տեղավորվելով երկար պայքարի արդյունքում ձեռք բերած երկու վրանի տակ: Նրանք վճռական են տրամադրված՝ շարունակելու են նստացույցը, երեկ էլ բողոքի ակցիա իրականացրին Պետական եկամուտների շենքի դիմաց: Հիշեցնենք, որ Պռոշյան համայնքի Գեւորգ Չաուշի խճուղի թիվ 5 հասցեում գտնվող Պաշտպանության նախարարության նախկին շենքը, որտեղ օթեւան էին գտել հարյուրավոր ընտանիքներ, կառավարության որոշման համաձայն, փոխանցվել է ՊԵԿ-ին եւ փետրվարի 16-ին ոստիկանությունը բռնի ուժով դուրս հանեց այնտեղ ապաստան գտած քաղաքացիներին՝ թողնելով փողոցում: Այս մասին «Իրավունքը» զրուցել է օրեր առաջ այս քաղաքացիներին իր գործընկերների հետ այցելած ԱԺ «Հայաստան» խմբակցության պատգամավոր ԳԱՌՆԻԿ ԴԱՆԻԵԼՅԱՆԻ հետ:

— Ինչպե՞ս եք տեսնում խնդրի լուծումը` այս ընտանիքները մանկահասակ երեխաներով փաստացի մնացել են երկու վրանի տակ:

— Այդ մարդիկ արժեք են մեզ համար եւ մեր այցի նպատակն այն էր, որ կարողանանք նրանց խնդիրներին տրամաբանական լուծումներ գտնել: Ամեն մեկի խնդիրն անհատական ուսումնասիրման կարիք ունի եւ ամեն մեկի համար ինդիվիդուալ լուծումներ պետք է գտնել: Բազմանդամ ընտանիք կա, որին ինչ-որ տեղ են առաջարկել տեղափոխվել, բայց պայմանները չեն բավարարում: Օրինակ` 10 քառակուսու մեջ չի կարող 10 հոգանոց ընտանիքն առանց սանհանգույցի ապրել: Բացի այդ, պետությունը նաեւ պետք է հստակ ժամկետներ ասի, թե ինչքան կարող են այդտեղ մնալ: Պետք է մանրակրկիտ բոլորի հարցն ուսումնասիրվի, որովհետեւ մարդիկ կան, որոնք պատրաստ են ինչ-որ տեղ տեղափոխվել, հանրակացարաններում օթեւանել: Եվ պետության գործառույթը հենց սա պետք է լինի: Կա Սոցապնախարարություն, կան տարբեր վարչություններ, որոնք ե՛ւ պարգեւավճարներ են ստանում, ե՛ւ բարձր աշխատավարձեր, իրենց տաք կաբինետներից պետք է դուրս գան, կանգնեն այս մարդկանց կողքին` իրենց երեխաների հետ, որպեսզի հասկանան` ինչ է նշանակում մանկահասակ երեխայի հետ գիշերներ անցկացնել փողոցում, այն էլ այս ցրտին: Վաղը, որ խնդիրներ ունեցան այս երեխաները, ո՞վ պետք է դրա պատասխանը տա: Չէ՞ որ նրանք մեր ապագա զինվորներն են, մեր հայրենիքի պաշտպաններն են: Էլի եմ ասում` պետք է գտնել լուծումներ, որոնք ընդունելի կլինեն այդ մարդկանց համար:

— Մի՞թե 10 եւ ավելի օրերը բավարար չէին, որպեսզի պետությունն արդեն իսկ լուծումներ գտած լիներ:

— Ոչ մեկը չի գալիս այս մարդկանց մոտ, հետամուտ չի լինում, մինչդեռ նրանք բազմաթիվ հարցեր ունեն` սկսած կենցաղայինից, տաքանալու եւ այլնի հետ կապված: Այս մարդկանց ուղղակի փողոց են նետել ու թքած ունեն` կկարողանա՞ն գիշերն անցկացնել, թե` ոչ: Խնդիրը պետության վերաբերմունքն է այս մարդկանց նկատմամբ, որոնք մեր հայրենակիցներն են: Եթե պետությունը կարողանում է ուրիշ երկրների օգնություն ցույց տալ, ժամերի ընթացքում արձագանքել նրանց խնդիրներին, ապա այս դեպքում մեր հայրենակիցներն արդեն 11 օր է փողոցում են գիշերում, գուցե հիմա՞ տեղներից շարժվեն:

ՀՐԱՆՏ ՍԱՐԱՖՅԱՆ

Այս թեմայով ՇՏԱՊ․ Արմավիր ՔԿՀ-ի բանտախցում կտրուկ վատացել է Արթուր Վարդանյանի առողջական վիճակը կտրուկ վատացել է Օպերային երգիչներին ու Կապելլային՝ չնչին գումարներ, տաշ-տմբլ երգողներին՝ բազմապատիկ ավել․ Սուքիասյան Ի՞նչ են քննարկել «Ուժեղ Հայաստան»-ի եւ «Հայաստան»-ի ղեկավարները Գուցե արժե հարցնեք ինքներդ ձեզ՝ ինչի՞ եք հասցրել այս երկիրը․ ԶԱՐՄԱՆՔ «Գրատախտակին գնալու» մասին խոսելուց առաջ արժե հիշել ամենակարեւորը․ Հենրիխ Դանիելյան