Մինչ Ալենենք «իրենց յորղանի գյորա են» Թուրքիայի հետ հարց լուծում, արցախահայությանը սնուցող պորտալարը կտրվում է

Թուրքիայում հզոր երկրաշարժից հետո` Նիկոլ Փաշինյանը ցավակցել էր Թուրքիայի նախագահին, ինչը հայկական մամուլում բուռն քննարկումների առիթ էր հանդիսացել: Սակայն շատերի կարծիքով էլ տարերային աղետի ժամանակ սա ընդունված տարբերակ է, այն աղետ էր եւ անմեղ զոհերի պատճառ: Բայց անհերքելի փաստ է ու աչք ծակող իրականություն, որ մեծ անհամաչափություն կա իշխանությունների գործողությունների միջեւ, եւ անգամ նժարի վրա չես կարող չափել գործողությունների անհավասարությունն ու անչափելի կշիռը, երբ ՀՀ իշխանությունը մեծ սրտացավություն է ցուցաբերում եւ օգնություն տրամադրում Թուրքիային, բայց արցախահայությունը մատնված է սովի ու կանգնած է ցեղասպանվելու կամ սեփական հողից վտարվելու վտանգի առաջ:

Անդրադառնալով դրսեւորած պրոթուրքական սրտացավությանը` Աժ-ում Ալեն Սիմոնյանը հիշատակել էր, մեր՝ հայերիս, քրիստոնյա լինելու հանգամանքը եւ նշել, թե հնարավոր չէր այս արհավիրքին չարձագանքել:

«Ընդունում եմ, որ թշնամական ենք, բա ի՞նչ անենք, հավաքվենք, էթանք 90 միլիոնանոց Թուրքիայի վրա, ուզում եմ հասկանամ ձեր տարբերակը ո՞րն է, մեր նպատակը էտ խնդիրը լուծելն է «մեր յորղանի գյորա»,- թուրքական բառերի շարանով իր ելույթը սահմափակել էր ՀՀ ԱԺ նախագահը:

«Իրավունքի» հետ զրույցում ԱԺ «Հայաստան» խմբակցության պատգամավոր ՔՐԻՍՏԻՆԵ ՎԱՐԴԱՆՅԱՆԸ ցավակցականների մասով նշեց, որ տարածաշրջանում երկրաշարժը բնական աղետ է, եւ այս առումով ուրախանալը թուլության նշան է, այստեղ տարակարծություն լինել չի կարող: Ըստ Վարդանյանի՝ ցավակցականների շուրջ ծավալված քննարկումներից զատ, Հայաստանում կան առավել խորքային եւ օրհասական խնդիրներ, որոնց շուրջ խորհել է հարկավոր:

«Մեր խնդիրը այլ հարց է, ի՞նչ են հիմա Հայաստանում իշխանության աթոռները զբաղեցնողներն անում անվտանգությունն ապահովելու համար, ի՞նչ են անում մեր կենսական հարցերը լուծելու համար»,- ասաց Վարդանյանն ու անդրադարձավ շրջափակված Արցախի խնդրին` նշելով, որ արցախահայությանը փրկելու համար ՀՀ իշխանությունը զրո քայլ է անում:

«Ի՞նչ է արվում շրջափակման մեջ գտնվող 120 հազար հայի համար հումանիտար աղետը Արցախում կանխելու, շրջափակումը մի փոքր մեղմելու համար, զրո քայլ, ու այդ ֆոնին է, որ խնդրահարույց են դառնում մնացած բոլոր քայլերը, որոնք արվում են, այդ թվում նաեւ, այո՛, Թուրքիայի ուղղությամբ: Ո՛չ միայն ցավակցելը, այլեւ` ընդհանրապես քաղաքականությունը, որը վարվում է այս տարիների ընթացքում, Թուրքիայի հետ հարաբերություններում որեւէ դրական բանի չի բերել»,- ընդգծեց Քրիստինե Վարդանյանը:

Ըստ պատգամավորի` այս իշխանության որեւէ քայլ չի նպաստել, որպեսզի Թուրքիայի վերաբերմունքը մեր նկատմամբ փոխվի: Նա համոզված է, որ իշխանության գործողությունները Թուրքիայի համար` Ադրբեջանին աջակցելու առումով, միայն խրախուսական կարող է լինել:

Ս. ԱՍԱՏՐՅԱՆ

Հ.Գ.- Քրիստինե Վարդանյանի հարցազրույցը կարդացե՛ք «Իրավունք» թերթի առաջիկա համարներից մեկում:

Այս թեմայով Կայացավ ՍԻՄ կուսակցության Ներկայացուցիչների խորհրդի տարեվերջյան նիստը Ադրբեջանական բենզինի թաքնված ականները. Մեկնաբանում են տնտեսագետները Վարդանյան եղբայրների կրկեսը հրավիրում է ձեզ «WONDERLAND» Ադրբեջանից Վրաստանի տարածքով Հայաստան է ժամանել նավթամթերքով բեռնված գնացքը Դուք զբաղված եք մարդկանց մոլորեցնելով, ոչ թե մտահոգ եք երկրի հզորացմամբ և խաղաղության հաստատմամբ