Քաղաքացիներին իրենց բնակավայրերից դուրս հանելու գործընթացը շարունակվում է. թե որտեղ պիտի ապրեն նրանք, դեռ անհայտ է. Թովմասյան

Առավոտյան ահազանգ եմ ստացել առ այն, որ ոստիկանները անհամաչափ ներկայացվածությամբ ՊՆ նախկին շենքի բնակիչներին դուրս են հանում իրենց կեցավայրից:

 

Իրավապահ մարմինների տեղեկությամբ՝ ՊՆ նախկին շենքում ապրում է 100-120 մարդ, որից 37-ը անչափահասներ են, 25-ը՝ կանայք: Այս մարդիկ փաստացի մնացել են անօթևան:

 

Փորձագետներին տեղում հայտնել են, որ ոստիկանությունը բերման է ենթարկել 26 քաղաքացու: Նրանց վստահեցրել են, որ բնակիչներին չեն թողնելու անտուն և ժամանակավոր կացարանով են ապահովելու «Նաիրի» մշակույթի տանը: Բնակիչները, սակայն հրաժարվում են տեղափոխվել այնտեղ:

 

ՀՀ աշխատանքի և սոցիալական հարցերի նախարարության ներկայացուցիչն իր հերթին հայտնել է, որ այս պահին քննարկվում է բնակարանային վարձի փոխհատուցման ծրագիրը:

 

Այս պահի դրությամբ քաղաքացիներին իրենց բնակավայրերից դուրս հանելու գործընթացը շարունակվում է. թե որտեղ պիտի ապրեն նրանք, դեռ անհայտ է:

Հետևողական եմ, որ, օրենքի շրջանակներում, ամեն ինչ արվի ի նպաստ Հայաստանի Հանրապետության քաղաքացու: Բնակիչները պետք է ունենան կացավայր և միայն դրանից հետո պետք է իրականացվի նրանց հեռացումը ՊՆ նախկին շենքից», - գրել է ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ, անկուսակցական Թագուհի Թովմասյանը: