Մահերի թիվը շարունակաբար աճում է, 11 հազար շենք հողին է հավասարվել, Հաթթայի օդանավակայանը շարքից դուրս է եկել․ Երկրաշարժի հետեւանքները Թուրքիայում

Հայտնի է, որ Թուրքիան տնտեսական լավ վիճակում չէր, թուրքական լիրայի պարբերական արժեզրկումներ էին: Հիմա այս երկրաշարժի հետևանքով ի՞նչ ծավալի խնդիրներ կարող են առաջանալ այս եւ այլ հարցերի պատասխաններ փորձել ենք ստանալ «Ակոս» թերթի խմբագիր Բագրատ Էստուկյանից, ով փաստեց․

-Միանշանակ, սոցիալ-տնտեսական ճգնաժամը կկրկնապատկվի, բացի այդ, մարդկային զգալի կորուստներ ունեցավ Թուրքիան այս երկրաշարժի հետևանքով: Էլ չենք խոսում նյութական կորուստների մասին՝ 11 հազար շենք է փլվել երկրաշարժի հետևանքով, Հաթթայի օդանավակայանը շարքից դուրս է եկել։ Երկրի 10 նահանգներում 3 ամիս ժամկետով արտակարգ իրավիճակ է հռչակվել, հայտարարվել է 7-օրյա սուգ: Իսկ արտակարգ իրավիճակը ընտրությունների նախօրեին անշուշտ քաղաքական իմաստ էլ ունի, հետևաբար երկրում քաղաքական, սոցիալական, տնտեսական ճգնաժամը կրկնապատկվելու է: Մահերի թիվն էլ շարունակաբար աճում է, ու կարծում եմ՝ դեռ կաճի:

-Կարծում եք՝ Էրդողանի դիրքերը կթուլանա՞ն ստեղծված ճգնաժամի պայմաններում:

– Էրդողանը շատ ճարպիկ քաղաքական գործիչ է. կան ազդակներ, որոնք կդժվարացնեն նրա գործը, և կան ազդակներ, որոնք, հակառակը՝ կթուլացնեն: Այդ ազդակները շահագործելու մեծ դաշտ է հիմա ստեղծվել:Կրկնում եմ՝ նա ճարպիկ քաղաքական գործիչ է և կարող է վնասի միջից մեծ օգուտներով դուրս գալ:Բնակչությունը հատկապես Թուրքիայի ծայրամասային հատվածներում մեծ հակակրանք ունի Էրդողանի նկատմամբ, և դրա պատճառներից մեկն էլ աղքատությունն է: Հիմա երկրի սոցիալ-տնտեսական խնդիրները էլ ավելի են սրվելու, վերջապես երկիրը մեծ կորուստ ունեցավ, մեծաքանակ մարդիկ անօթևան են մնացել: Բայց նաև կարող եմ ասել, որ շնորհիվ իր ճարպկության այս խնդիրների միջով Էրդողանը կարող է չոր դուրս գալ, քանի որ ժողովուրդը միամիտ է. նա կարող է ամեն ինչ վերագրել աստծո կամքին, ոչ թե իր ղեկավարման թերություններին:

ԻԼՈՆԱ ԱԶԱՐՅԱՆ