Իշխանությանը չի հուզում ո՛չ Լաչինի միջանցքի, ո՛չ Արցախի եւ ո՛չ էլ 120 հազար հայրենակիցների ճակատագիրը. Մելիք-Շահնազարյան

Արդեն տեւական ժամանակ է` Լաչինի միջանցքը փակ է, այսպես ասած՝ ադրբեջանցի «բնապահպան-ակտիվիստների» կողմից, Արցախի ժողովուրդը ստիպված է վերապրել 90-ականները, ապրել ու արարել մութ ու ցուրտ, սոված եւ դեֆիցիտի պայմաններում: Եվ այս իրավիճակում ո՞րն է ՀՀ իշխանությունների անելիքը, ի՞նչ քայլեր պիտի ձեռնարկվեին, որ չի արվել ու չի արվում: «Իրավունքի» հետ զրույցում «Ոսկանապատ» վերլուծական կենտրոնի ղեկավար, քաղաքագետ ՀՐԱՆՏ ՄԵԼԻՔ-ՇԱՀՆԱԶԱՐՅԱՆԸ նշեց, որ իշխանությունը հստակ ցույց է տալիս, որ իրենց չի հուզում ո՛չ Լաչինի միջանցքի, ո՛չ Արցախի թեման եւ ոչ էլ 120 հազար հայրենակիցների ճակատագիրը, ինչը որդեգրած քաղաքականություն է, որը չի թաքցվում նրանց կողմից:

«Ի՞նչ պետք է անի իշխանությունը, միակ տրամաբանական պատասխանը՝ հրաժարական տալ եւ թողնել, որպեսզի այդ խնդրով զբաղվեն այն մարդիկ, որոնց հետաքրքիր է Լաչինի միջանցքը ու մարդկանց ճակատագիրը: Պարզ է, որ ամեն ինչ անում են հակառակը, մեզ համար խնդիր ստեղծելու տեսակետից»,- ասաց քաղաքագետն ու հավելեց, որ եթե լինի գերակա ու նորմալ իշխանություն, ապա առաջին հերթին պետք է որոշում կայացնել, ամեն գնով լուծել այդ խնդիրը:

Մելիք-Շահնազարյանը նաեւ կարեւորեց միջազգային հանրության դերակատարումը, որը կարող է ճնշում գործադրել Ադրբեջանի վրա, ինչպես նաեւ հակընդդեմ ակցիաների կազմակերպումը հենց միջանցքի տարածքում. «Այդ հարցում կարեւոր է Ռուսաստանի հետ լիարժեք  համագործակցության կազմակերպումը` որպես հիմնական ռեսուրս ունեցող ուժ: Հակառակ կողմում հումանիտար աղետի սպառնալիքն է, որը հաղթահարելու համար ցանկացած քայլ արդարացված է»:

Հարցին, թե արդյո՞ք մեր հասարակությունը դարձել է հանդուրժող եւ հարմարվում է ստեղծված իրավիճակին, քաղաքագետն ընդգծեց, որ Արցախում մարդկանց ամեն օրն է պայքար:

«Ես տեսնում եմ, որ Արցախի մեր հայրենակիցները տրամադրված են դիմակայության, ապրել բառիս բուն իմաստով շատ մեծ նեղության մեջ, բայց Ադրբեջանի պահանջները չկատարել: Արցախի ժողովրդի միակ անելիքն այդ վճռականությունը պահպանելն է եւ քաղաքական այն ուժերին, որոնք  տրամադրված են պայքարի, լիարժեք աջակցություն տալն է: Սփյուռքում մեր հայենակիցները բավականին ակտիվ են, ինչը ՀՅԴ-ի շնորհքն է, մնում է Հայաստանի բնակչությունը, եւ այստեղ մեծ խնդիր կա: Նրանք, ովքեր չեն համակերպվում այսօրվա իրողության հետ, ցավոք, չեն կարողանում իրենց մոտեցումը քաղաքական թրենդ դարձնել, այստեղ ինքնակազմակերպվելու լուրջ խնդիր կա, որը կանգնած է նաեւ քաղաքական ուժերի առջեւ», - նշեց Մելիք-Շահնազարյանը եւ եզրափակելով խոսքը` շեշտեց, որ մեր հիմնական գործառույթներից մեկը պետք է լինի ընդդիմադիր ուժերին աջակցություն ցույց տալն է ու միասնականության ոգին ապահովելը:

Ս. ԱՍԱՏՐՅԱՆ

Այս թեմայով ՀՀ-ի՝ TRIPP-ից շրջանառության օգուտը կարող է կազմել 10 միլիոն դոլար, որը հավասար է մի խանութի տարեկան շրջանառության․ Հրանտ Միքաելյանը փակագծեր է բացում Եվրոպան գնում է դեպի ներքին արյունահեղություն. Քաղաքագետ Ռուսական կողմը վերահսկողություն է հաստատել ևս 3 բնակավայրի նկատմամբ «Միասնական Ռուսաստանը» ռեկորդային թվով մանդատներ է ապահովել Պետդումայի ընտրություններում Լևոն Բաղդասարյանի կողմից հնչեցված յուրաքանչյուր գնահատական ինձ համար առանձնահատուկ արժեք ունի. Հրանտ Սարաֆյանի շնորհակալական խոսքը