Եկել է հերթական պատասխանատվությունը նորից այլոց վրա գցելու ժամանակը. Պողոսյան

Շիրակի մարզպետ Նազելի Բաղդասարյանն օրեր առաջ հայտարարեց, որ հրաժարականի դիմում է ներկայացրել Նիկոլ Փաշինյանին: Այս մասին «Իրավունք TV»-ի տաղավարում զրուցել ենք գյումրեցի իրավապաշտպան ԿԱՐԱՊԵՏ ՊՈՂՈՍՅԱՆԻ հետ:

— Այս իշխանության օրոք, եթե չեմ սխալվում, արդեն 5-րդ մարզպետն է փոխվում Շիրակում: Ըստ Ձեզ` ինչո՞վ էր իրականում պայմանավորված Նազելի Բաղդասարյանի հրաժարականը:

— Անկեղծ ասած, շատ կանխատեսելի էր եւ ոչ միայն Նազելի Բաղդասարյանի հրաժարականը, այլ նաեւ տարբեր այլ պաշտոնյաների փոփոխությունները, այդ թվում` ե՛ւ ՄԻՊ-ի գրասենյակում, ե՛ւ արտգործնախարարությունում: Այս ամենն արվում է ընդամենը պետական կառավարման ստրուկտուրան ավելի էժանացնելու եւ ցածրացնելու համար: Միեւնույն ժամանակ, բերելու այնպիսի մի վիճակի, որ ժողովրդի մոտ ամբողջովին վերանա ակնկալիքները պետությունից: Վերջին 5 տարիներին Նիկոլ Փաշինյանն ամեն ինչ արել է, որ Հայաստանի միջազգային վարկանիշը հասնի ամենացածր մակարդակի, որպեսզի որեւէ մեկն իր հետ չունենա շփում: Այսօր Փաշինյանն իր կառավարման լավագույն ժամանակները չի ապրում եւ եկել է հերթական պատասխանատվությունը նորից այլոց վրա գցելու ժամանակը: Բոլորս էլ շատ լավ հիշում ենք, որ 2020 թվականի խայտառակ կապիտուլիացիայից եւ երկրում ստեղծված քաղաքական ճգնաժամից հետո` որոշակի մասսաների նրանք նորից կարողացան իրենց նկատմամբ վերաբերմունք ստեղծել` միայն նրանով, որ շրջանառության մեջ էին գցել հետեւյալ նախադասությունը` «էս խեղճ հարիֆն ինչ անի, որ կողքը խելացի մարդիկ չկան»: Եվ հիմա հերթական անգամ մոտենում ենք մեր պատմության եւս մեկ ցավոտ էջի, որից հետո կրկին այդ նույն խոսակցությունը գցելու են շրջանառության մեջ, թե` «էս խեղճ հարիֆն ինչ անի, որ կողքը լավ մասնագետներ չկան, իսկ լավերը հների հետ էին եւ կոռումպացված»: Այս նույն էժանագին շոուն է պատրաստվում խաղալ Նիկոլ Փաշինյանը:

— Ն. Բաղդասարյանի եղբայրը` Արման Բաղդասարյանը, վերջերս բերման էր ենթարկվել, հետո հայտարարեց, որ դուրս է գալիս «Քաղաքացիական պայմանագիր» կուսակցությունից ու վայր է դնում Գյումրիի համանուն խմբակցության ավագանու մանդատը: Հնարավո՞ր է, որ սրանով էր նաեւ պայմանավորված քրոջ հրաժարականը:

— Եթե քույրը նեղացած լիներ կամ իրեն անհանգստացներ իր եղբոր ու նրա ընտանիքի ճակատագիրը, կհրաժարվեր ամեն ինչից եւ կգնար, տունը կնստեր: Բայց նա հրաժարական է տվել` Երեւան գալու եւ պաշտոնի բարձրացման ակնկալիքով: Միանաշակ այս ամենը որեւէ ձեւով ես չեմ կապում նրա հրաժարականի հետ: Նազելի Բաղդասարյանին անձամբ շատ լավ ճանաչում եմ երկար տարիներ, իր ընտանիքի մյուս անդամներին` նույնպես, այդ թվում` նաեւ եղբորը: Չեմ ուզում ինչ-որ չակերտներ բացել, բայց այս ընթացքում առիթ եմ ունեցել հանդիպել եւ զրուցել եղբոր հետ: Ասեմ, որ չափազանց անկեղծ զրույց է եղել, եւ այս երկու դեպքերը բացարձակապես կապ չունեն իրար հետ: Ավելին ասեմ` իմ ունեցած տվյալներով Նազելի Բաղդասարյանը բացարձակ չնեղվեց, երբ իր եղբոր կնոջն ուղղակի ուրիշի պատճառով աշխատանքից հեռացրին: Բացարձակ չնեղվեց նաև, որ իր եղբայրն ավագանու անդամությունից դուրս եկավ: Այսինքն` նա զուտ իր կարիերայով է զբաղված: Հետեւապես, բացարձակ իմաստ չկա այստեղ տեսնել ճնշումներ եւ այլն: Ինչեւէ, չեմ ուզում որեւէ մեկի ընտանիք մտնել, առավել եւս` քպ-ական ընտանիքների, որոնք ինձ համար ավելի շատ թուրքական ծագումներով ընտանիքներ են: Ես փորձում եմ հնարավորինս հեռու մնալ:

— Թե ինչ պաշտոն է ստանձնելու Ն. Բաղդասարյանը, իր հրաժարականից հետո լրագրողներին տված ճեպազրույցում հիշեցրել էր, որ ունի իրավաբանի կրթություն: Հետեւապես` որտե՞ղ նա կկարողանա այս անգամ տեղավորվել: Տարբեր պաշտոններ են շրջանառվում` արդարադատության փոխնախարար, ՄԻՊ…

— Եկեք այս հարցին անեկդոտով պատասխանեմ: Իհարկե, ներողություն եմ խնդրում բոլորից, որովհետեւ անեկդոտները չեն կարող լինել մաքուր հայերենով, եւ հաստատ կան նաեւ որոշակի ոչ հարիր բառեր: Վերջին շրջանում տարածված մի լավ անեկդոտ կա. հորեղբայրը հարցնում է իր եղբոր որդուն. «Տղա ջան, որ դու ՔՊ-ական ես դարձել, քեզ ի՞նչ պաշտոն են տալու: Ասում է. «Դե, երեւի, մարզպետ»: Հորեղբայրն էլ պատասխանում է. «Է՛հ, նորմալ է, էշի երկիր է, կտան»: Այնպես որ, ես չեմ զարմանա, եթե թեկուզ վաղը հովիվին բերեն եւ տան Հայաստանի գլխավոր սրտաբան, մի հատ էլ ասեն` դու պետք է սրտի բարդագույն վիրահատություններ անես, որովհետեւ ժամանակին կենդանիների մորթ շատ ես արել եւ տիրապետում ես օրգանների առանձնահատկություններին:

— Դուք Ն. Բաղդասարյանի հրաժարականից հետո` «կանխատեսում էիք», որ հաջորդ մարզպետը հնարավոր է լինի գերու ծնող ձեւացած ախուրյանցի Անոն, որովհետեւ ինքը ժամանակին ամենաբարձրն էր գոռում` «ՆիԳոլ»…

— Դա արդար ցանկություն էր, որը նաեւ ֆեյսբուքյան իմ էջով էի ասել: Իրականում, երեւի, ամենաարդար բանը կլիներ Շիրակի մարզի եւ նաեւ Հայաստանի Հանրապետության համար, որ ախուրյանցի Անոն դառնար մարզպետ: Վերջին հաշվով ինքն էլ է ուզում ապրել, ծառայողական մեքենա ունենալ: Ինչո՞վ է տարբերվում Անոն նույն նազելիբաղդասարյաններից, արփիդավոյաններից կամ որեւէ այլ ՔՊ-ականներից:

— Արդեն Շիրակի մարզը նոր մարզպետ ունի` ի դեմս Մուշեղ Մուրադյանի: Ի՞նչ ակնկալիքներ ունեք այս նշանակումից:

— Բացարձակ ոչ մի ակնկալիք չունեմ այսօրվա իշխանություններից: Նրանց վերաբերյալ միայն կան մտավախություններ, թե հերթական անգամ ինչ հիմարություն են անելու, ինչ մեծ վնասներ են պատճառելու մեր երկրին, մեր հայրենիքին: Ինչ վերաբերում է Մուշեղ Մուրադյանին, անձնապես չեմ ճանաչում, որովհետեւ մինչեւ «դագաղների հեղափոխությունն» աշխատում էր մարզպետարանում, բայց բավականին աննշան կերպար էր, եւ առիթ չի եղել ծանոթանալու: Ընդամենը տեղյակ եմ, որ արդեն իշխանափոխությունից հետո շատ հարմար տեղավորվել էր ՔՊ-ում, մասնավորապես` այն ժամանակվա մարզպետ Կարեն Սարուխանյանի թիմում: Եվ քանի որ երկուսն էլ անասնապահությամբ էին իրենց կարիերան սկսել, իմ վերը ասած հովիվի տարբերակով` եկել էին պաշտոնների` զուտ իրենց անձնական բիզնեսը զարգացնելու: Մուշեղ Մուրադյանին տեղավորեցին ‹‹Արփի լիճ›› ազգային պարկ›› ՊՈԱԿ-ում` որպես տնօրեն եւ այդ ընթացքում, ըստ լուրերի (անկեղծ ասած, դեռեւս ուսումնասիրություններ չեմ սկսել), մի քանի հատվածներում բավականին մեծաթիվ տարածքներ են պաշտոնական դիրքը oգտագործելով վերցրել, խոսքը` 2-3 հարյուր հեկտարների մասին է: Ինչպես նաեւ տարածքում կան բավականին շատ փաստեր, որ ոչ ճիշտ կառավարելու հետեւանքով բավականին վնասվել է պարկի ֆլորան եւ ֆաունան:

ՀՐԱՆՏ ՍԱՐԱՖՅԱՆ

Այս թեմայով Փաշինյանը «տրաս է հանել» սյունեցի պատգամավորներին ՀՐԱՏԱՊ. Հայտնի փաստաբանը դիմել է Երեւանի քաղաքապետին հստակ առաջարկությամբ Նիկոլ Փաշինյանը շնորհավորել է Հռոմի պապին Կապի մեջ կլինենք, շնորհակալ եմ այցի համար․ Պուտինը՝ Փաշինյանին (տեսանյութ) Նիկոլ Փաշինյանին Կարմիր հրապարակում կրկին Լուկաշենկոյի կողքին են նստեցրել