Ծննդյանդ օրը չեմ ասելու շնորհավոր․․․Գալիս եմ սրբավայրդ աչքերիցս հոսող հավերժական արցունքներով. Արամայիս Ոսկանյանն այսօր կդառնար 27 տարեկան

«Որդուս ծննդյան օրն է․․․ Ծնունդ,որ ապրեցրեց, կյանք,որ արժեցավ խաղաղություն... Կյանքի ու մահվան հավերժական պայքարում կոփված առարկայական հիշողությունները հաղթում են քարացած, ընդարմացած, ժամանակից մազապուրծ փախած զգացմունքներին։ Ծննդյանդ օրը չեմ ասելու շնորհավոր․․․Գալիս եմ քեզ մոտ առանց տորթի ու գունավոր փուչիկների, առանց կոնֆետների ու փափուկ խաղալիքների՝ սրբավայրդ օծելով միայն անհուն կարոտից, առկայծող վրեժից կարմրած՝ աչքերիցս հոսող հավերժական արցունքներով։ Իմ միակ որդի...», - գրել է ապրիլյան պատերազմում զոհված ԱՐԱՄԱՅԻՍ ՈՍԿԱՆՅԱՆԻ մայրը՝ ԱՆՈՒՇ ՀԱԿՈԲՅԱՆԸ:

 

Հիշեցնենք, որ Արամայիս Ոսկանյանը ծնվել է 1996 թվականի հունվարի 26-ին Գեղարքունիքի մարզի Գավառ քաղաքում։ 2002-2011 թվականներին սովորել է Գավառի թիվ 9 հիմնական դպրոցում։ 2011-2013 թվականներին ուսումը շարունակել է Գավառի ավագ դպրոցում։ 2013 թվականին ընդունվել է Հայաստանի պետական ագրարային համալսարանի «Ֆինանսների կառավարում» բաժինը։

 

2014 թվականի հուլիսի 14-ին զորակոչվել է բանակ՝ ծառայության անցնելով Մարտունու զորամասերից մեկի նռնականետային դասակում։ Ծառայության ընթացքում դիրքեր բարձրանալիս մշտապես բարձր պատասխանատվությամբ կատարելով իրեն վստահված մարտական առաջադրանքը՝ Արամայիսը հաճախ ասում էր․ «Թուրքերը լավ են զինված, նրանց տեխնիկան հզոր է, բայց մենք հոգով ենք հզոր, նրանք մեզ տեսնելիս մահու չափ վախենում են, մենք մի թիզ հող էլ չունենք թուրքերին տալու»:

 

Արամայիս Ոսկանյանը զոհվել է 2016 թվականի հունվարի 9-ի երեկոյան՝ ժամը 21։30-ին, երբ մարտական հերթապահություն էր իրականացնում եւ արգելված գոտում հակառակորդի կողմից աշխուժություն նկատելով՝ առաջ է գնում՝ դիտարկում կատարելու, ինչի հետեւանքով հակառակորդի կողմից մահացու վիրավորում է ստանում: Արցախի հանրապետության Նախագահ Բակո Սահակյանի հրամանագրով՝ Արցախի պետական սահմանը պաշտպանելիս ցուցաբերած արիության համար Պաշտպանության բանակի N զորամասի շարքային Արամայիս Ոսկանյանը հետմահու պարգեւատրվել է «Մարտական ծառայություն» մեդալով, ՀՀ նախագահ Սերժ Սարգսյանի հրամանագրով՝ Արամայիս Ոսկանյանը պարգեւատրվել է «Արիության համար» մեդալով։ 2016 թվականի սեպտեմբերի 9-ին Գավառի թիվ 5 ավագ դպրոցում բացվել է հերոսի անվան զինվորական պատրաստության դասասենյակ: Դասասենյակի բացման արարողությանը հաջորդեցին Ոսկանյաննների բնակարան տանող ճանապարհի անվանակոչության եւ Արամայիս Ոսկանյանի բնակված տան պատին նրա հուշատախտակի բացման արարողությունները: