Իրենց հետագա պաշտոնավարումը նպատակահարմար չէ․ Պապիկյանը՝ պաշտոնանկ արված զինվորականների մասին

«Ես առավոտյան երկրորդ բանակային կորպուսի հրամանատարին աշխատանքից ազատելու միջնորդություն եմ ներկայացրել հանրապետության նախագահին, նախագահն արդեն իսկ ստորագրել է որոշումը: Նաև հանձնարարել եմ Պաշտպանության նախարարին, որ պետք է շատ կոնկրետ անհատական հետևանքներ լինեն»,-այսօրվա Կառավարության նիստում անդրադառնալով գիշերը Գեղարքունիքում տեղակայված զորամասում բռնկված հրդեհի դեպքով պաշտոններից ազատված պաշտոնյաններին՝ ասաց վարչապետ Նիկոել Փաշինյանը:

Պաշտպանության նախարարը ներկայացրեց պաշտոններից ազատված զինվորականներին. «Զբաղեցրած պաշտոններից ազատվել են 2-րդ բանակային կորպուսի շտաբի պետ, կորպուսի հրամանատարի տեղակալ, թիկունքի պետ, կորպուսի հրամանատարի տեղակալ, կորպուսի հրամանատարի  տեղակալ մարտական հրամանատարության գծով, այնուհետև N զորամասի շտաբի պետ, հրամանատարի տեղակալ, N զորամասի հրամանատարի տեղակալ թիկունքի գծով, N զորամասի ինժեներական ծառայության պետ, N զորամասի ինժեներասակրավորային վաշտի հրամանատար և ԶՈՒ-ի թիկունքի վարչության հրդեհային անվտանգության ծառայության պետ»:

Փաշինյանի հարցին, թե արդյոք նշված պաշտոնյաները Գլխավոր շտաբի պետի հրամանն իրականացնելու այս կամ այն չափով պատասխանատվություն են ունեցել, Պապիկյանն ասաց. «Իրենց զբաղեցրած պաշտոններն ինչ-որ կերպ առնչվում են խնդրին, իրենց հետագա պաշտոնավարումը նպատակահարմար չէ»: