Ի՞նչ է տոնում հայը՝ հողերի հանձնո՞ւմը, ճանապարհների շրջափակո՞ւմը, աշխարհով մեկ խայտառակ լինե՞լը. Ալլա Հակոբյան

Մի քանի ժամ հետո Հայաստան աշխարհը կդիմավորի 2023 թիվը... Սակայն մասնատված է այսօր Հայոց աշխարհը, մասնատված է այն աստիճան, որ հայը հայի հոգսն ու ցավը դադարել Է զգալ... Այո՛, վստահ եմ, որ ոչ միայն թագավորական պալատներում հինգերորդ անգամ Նոր Տարի դիմավորողներն, այլեւ սովորական մարդկանց մեծ զանգված գալիք 2023 թիվը կդիմավորի լի ու լի սեղանների շուրջ: Լի ու լի սեղանների եւ հեռուստացույցից հնչող տափակ կատակների արանքում դիմավորելով 2023 թիվը` կմոռացվեն 2020-ի պատերազմի հազարավոր զոհերն ու հաշմանդամները, տեղահանված ու անտուն մնացածներն, անհայր մնացած ձագուկներն ու այրիները...

 

Երեւանի բոլոր շրջանները զարդարված են տոնածառներով... Լկտի թուրքն էլ է տոնածառ դրել... Ի ցույց բոլորի... Հային ծաղրելով... Թուրքի կողմից շրջափակված ճանապարհին այսօր վեր է խոյանում կանաչ պլաստիկ շշերից պատրաստված տոնածառ...

 

ՏՈՆԱԾԱՌ... Սովորական դարձած բառ... Ամենօրյա կենցաղում մոռացության է տրվել բառի բուն իմաստն ու խորհուրդը՝ Քրիստոսի մուտքը Յերուսաղեմ... (Հյուսիսային շրջաններում, ուր չեն աճում ձիթենի եւ արմավենի, եղեվնու ճյուղերը զարդարելով են քրիստոնյաները վերհիշում այդ պանծալի օրը:): Մոռացության է տրված եւ բառակազմությունը՝ ՏՈՆ եւ ԾԱՌ... Միայն չեմ հասկանում, ի՞նչ է ՏՈՆՈՒՄ հայը՝ հողերի հանձնո՞ւմը, կենսական նշանակություն ունեցող ճանապարհների շրջափակո՞ւմը, աշխարհով մեկ խայտառակ լինե՞լը...

 

Օրերս Արցախում մի քանի արցախցու (ոչ բոլորին) հաջողվել է մեկ կիլոգրամ շաքարավազ գնել ու մեկուկես կիլոգրամ հնդկաձավար (гречка): Այսօր կեսգիշերին լի ու լի սեղանների շուրջ նստելիս հիշե՛ք, որ մեր հայրենակիցներն Արցախում գտնվում են հումանիտար աղետի պայմաններում...

 

Հ.Գ. Բայց անկոտրուն է արցախցու հոգին... Թուրքի աչքը հանելով Արցախում կյանքը շարունակվում է... Օրերս ԾՆՎԵՑ եւս մեկ արցախցի, ով՝ իր ճիչով խլացնելով թուրքի ականջը, արձանագրեց. «Ես հա՛յ եմ՝ Հա՛յկի սերնդից եմ եւ սա Ի՛Մ ՀՈՂՆ է»: Արցախում արդեն վաղուց վաճառքում չկա ոչ մի հատիկ ծաղիկ, սակայն հնարամիտ արցախցիներն այս հարցն էլ լուծեցին՝ նորածնին ու երջանիկ մորը դիմավորեցին... մի փունջ կարմիր բողկով եւ կարմիր բողկով ձեւավորված զամբյուղով...

 

ԱՆՊԱՐՏԵԼԻ Է հայի միտքը...

ԱՆՊԱՐՏԵԼԻ Է հայի հոգին...