Կապ չունի` բժի՞շկ ես, իրավաբա՞ն ես, թե՞ լրագրող.Պրոֆեսիոնալն էլ կարող է հայտնվել նման իրավիճակում. Գրիգոր Մինասյանը` հոր քրգործի մասին

ՀՀ արդարադատության նախարար Գրիգոր Մինասյանը մեկնաբանեց իր և Վատիկանում Հայաստանի նախկին դեսպան Միքայել Մինասյանի հոր` Արա Մինասյանի նկատմամբ հարուցված քրեական հետապնդման հարցը։ Կառավարության նիստից հետո լրագրողների հետ ճեպազրույցում Գրիգոր Մինասյանը նշեց, որ անգամ պրոֆեսիոնալ աշխատողը կարող է հայտնվել նման իրավիճակում։

«Ես աշխատում եմ որպես արդարադատության նախարար, աշխատել եմ նաև որպես փոխնախարար` օրենքով սահմանված լիազորությունների շրջանակում։ Զգացմունքներն ու էմոցիաներն էլ որևէ կերպ չպետք է մարդուն խանգարեն, երբ դու իրականացնում ես քո աշխատանքը։ Կապ չունի` բժի՞շկ ես, իրավաբա՞ն ես, թե՞ լրագրող»,– նշեց Մինասյանը։

 

Նշենք, որ Արա Մինասյանի նկատմամբ նոր քրեական հետապնդում է հարուցվել։ Նոր ապացույցներ են ձեռք բերվել առ այն, որ «Սուրբ Գրիգոր Լուսավորիչ բժշկական կենտրոնի» նախկին տնօրեն Արա Մինասյանը, տնօրինելով ընկերության ֆինանսական միջոցները, նույն բժշկական կենտրոնի գլխավոր հաշվապահի, գնումները համակարգողի, հեմոդիալեզի պարագաներ մատակարարող ընկերության տնօրենի և ներկայացուցչի օժանդակությամբ, ընկերության օգտին գնման գործընթացներում հնարավոր մրցակիցների նկատմամբ խտրական պայմաններ կիրառելով, 2014-2018թթ.–ի ընթացքում մեկ միասնական դիտավորությամբ, ծառայողական դիրքն օգտագործելով, հափշտակել է իրեն վստահված առանձնապես խոշոր չափերով մոտ 416 մլն դրամը: