Առաջարկում եմ ընդառաջ գնանք մեր Արցախի հայրենակիցներին եւ փորձենք խաղաղ ձեւով բացել Բերձորի ճանապարհը. Անի Կարապետյան

Արցախահայությունը, ոչ թե կանգնած է, այլ արդեն ապրում է հումանիտար աղետի մեջ, եթե եւս մի քանի օր ճանապարհն անանցանելի մնաց` Արցախում հացի խնդիր է առաջ գալու, եթե իհարկե արդեն չկա։ Պարենային պաշարը չի բավականացնելու, հաշվի առնելով այն, որ Ադրբեջանը մի քանի օրով կտրել էր նաեւ գազամատակարարումը, ոչ մի երաշխիք չունենք, որ դա չի կրկնվի ու դեռ էլ ավելին... Այն ինչ տեղի է ունենում Արցախի եւ արցախահայության նկատմամբ խիստ դատապարտելի պետք է լինի մարդասիրական նորմերով առաջնորդվող ժողովրդավար պետությունների կողմից։ Սակայն, մենք ունենք այն ինչ ունենք։

 

Սիրելի հայրենակիցներ, մենք պետք է խաղաղ ճանապարհով փորձենք դուրս գալ այս բարդ իրավիճակից, ուստի՝ առաջարկում եմ ` մենք Հայաստանից ընդառաջ գնանք մեր Արցախի հայրենակիցներին, արցախի մեր հայրենակիցներն էլ ընդառաջ գան մեզ եւ փորձենք խաղաղ ձեւով բացել Բերձորի ճանապարհը։ Նույն միջազգային հանրությունը պետք է տեսնի, որ մենք մեր հայրենակիցներին բարբարոսներին չենք հանձնում, մեր հայրենակիցներն էլ չեն պատրաստվում ապրել ագրեսորների հետ, որոնք իրենց փորձում են սովի ու ցրտի մեջ սպանել։

 

Իմ սիրելի հայրենակիցներ, իմ շատ սիրելի արցախահայություն, մենք Աստծով ու աղոթքով, քայլելով պետք է գանք ու բացենք մեզ համար կենսական անհրաժեշտություն ունեցող Բերձորի ճանապարհը։

 

Դիմում եմ Հայաստանում ու Արցախում գործող քաղաքական ուժերին, հասարակական կազմակերպություններին, միավորումներին, հայրենիքի համար մտահոգ հեղինակություն ունեցող անհատներին, բոլոր֊բոլորին, խնդրում եմ, եկեք միասին դուրս բերենք Արցախը եւ արցախահայությանը շրջափակումից, եկեք վերականգնենք մեր ոտնահարված իրավունքները, եկեք պարզապես տեր կանգնենք ինքներս մեզ ու մեր հայրենիքին», - ասված է հայտարարության մեջ: