Լռելու էլ ժամանակը չէ՛, երկիր ես կործանում. Թաթուլ Պետրոսյան

«Ուժեղ Հայաստան Ռուսաստանի հետ. հանուն նոր Միության» շարժման խորհրդի անդամ, արդարադատության գեներալ ԹԱԹՈՒԼ ՊԵՏՐՈՍՅԱՆԻ գնահատմամբ` հայ-ռուսական բարեկամության աջակիցներն այսօր քիչ չեն, եւ իրենց հետեւորդները հարյուր հազարավոր մարդիկ են, որոնք գիտակցում են, որ այսօր Հայաստանի համար միակ ռեալ բարեկամը Ռուսաստանի Դաշնությունն է: Այս մասին նա նշեց «Ուժեղ Հայաստան Ռուսաստանի հետ. հանուն նոր Միության» շարժման կազմակերպած «Ռուս խաղաղապահները, սահմանապահները եւ 102-րդ բազան` որպես կայունացնող գործոն Հարավային Կովկասում» թեմայով կլոր սեղանի ժամանակ:

«ԵՐԵՍՓՈԽԱՆ ՍՏՈՐԱՔԱՐՇՆԵՐՆ ԱԺ ԱՄԲԻՈՆՆ ՕԳՏԱԳՈՐԾԵՑԻՆ ՀԱԿԱՌՈՒՍԱԿԱՆՈՒԹՅԱՆ ՀԱՄԱՐ»

Ըստ գեներալի` եթե ռուս խաղաղապահ ուժերը Արցախում չլինեին, Արցախն էլ չէր լինի:

«Պատերազմը, որը վարվեց այս ազգակործան իշխանությունների կողմից, պատրաստվեց Ադրբեջանի եւ Թուրքիայի ու մեր իշխանությունների հետ միասնական: Երկու տարի անընդհատ մեր բանակը թուլացրին եւ հակառուսականությունը խորացրին, այնուհետեւ հենց 2020 թվականին սկսեցին: Ազգային ժողովում այս շաբաթ քննարկվում էր հակահետախոււզության ծառայություն ստեղծելու մասին նախագիծը, ու էլի նույն երեսփոխան ստորաքարշները (փորձում եմ ինչքան հնարավոր է մեղմ արտահայտվել) ամբողջ ամբիոնն օգտագործեցին հակառուսականության համար, եւ այն, որ թուրքերը եկել են ու բնապահպանական կեղծ պատրվակով փակել Բերձորի միջանցքը, փորձեցին մեղադրել դրանում ռուս խաղաղապահներին, թե իրենց վերահսկողության տակ է տարածքը: Մինչդեռ եթե դու տան տղամարդն ես ու քո տունը չես պաշտպանում, հարեւանիդ իրավունք չես ունենալու խնդրել` արի ինձ պաշտպանի: Այդ նույն ստոր սուբյեկտներն ասում են` կառավարության ծրագրում գրել ենք Հայաստանը հանդիսանում է Արցախի Հանրապետության անվտանգության երաշխավոր, բայց այսօր ո՛չ ուժ ունենք, ո՛չ հնարավորություն` հանդիսանալու Արցախի Հանրապետության անվտանգության երաշխավոր: Այսինքն` իրենք եւս ընդունում են, որ անվտանգության երաշխավորն Արցախի ռուս խաղաղապահ ուժերն են, բայց նրանց ամբողջ քարոզարշավն ուղղված է հակառուսականությանը», - ընդգծեց Թաթուլ Պետրոսյանը:

«ՎԱՐՉԱՊԵՏ ԿՈՉԵՑՅԱԼԸ ԷՐԴՈՂԱՆԻ ԵՎ ԱԼԻԵՎԻ ՏԵՂԱՊԱՀՆ Է ՀԱՅԱՍՏԱՆՈՒՄ»

«Ուժեղ Հայաստան Ռուսաստանի հետ. հանուն նոր Միության» շարժման խորհրդի անդամի պնդմամբ` հակառուսականության քարոզը, բառի բուն իմաստով, իրականացվում է իշխանությունների հովանու ներքո եւ ֆինանսավորմամբ:

«Հակառուսականութուն քարոզող հասարակական կազմակերպությունները, որոշ կուսակցություններ, որոնք իրենց արտախորհրդարանական ուժ են կորչում եւ ՌԴ դեսպանատան դիմաց հավաքվում միտինգ են անում, հաջորդ օրը վարչապետ կոչեցյալ անձը նրանց հավաքում է եւ հետները հանդիպում ունենում: Սա Էրդողանի եւ Ալիեւի տեղապահն է Հայաստանում: Այսօր հակառուսականություն են քարոզում եւ դեմ են ռուս խաղաղապահ ուժերի գոյությանը այսօրվա իշխանությունը` վարչապետ կոչեցյալի գլխավորությամբ, որն անընդհատ քննադատում է, եւ Ալիեւը: Իսկ այն ստոր արտահայտությունը, թե` համաձայն է եռակողմ պայմանագրով 10-20 տարով երկարացնել խաղաղապահների ներկայությունը,  բացառվում է: Եթե երկու կողմերից մեկը վեց ամսվա ընթացքում համաձայն չեղավ ռուս խաղաղապահ ուժերի գոյությանը, այդ ուժերը չեն կարող լինել: Սա ամպագոռգոռ հայտարարություններ է անում եւ գոռում է` փորձելով Ռուսաստանի սիրտը սիրաշահել, թե` տեսեք, ես համաձայն եմ, բայց Ալիեւը, բնականաբար, այսօրվանից արդեն համաձայն չէ: Ալիեւին ձեռնտու է, որ ռուս խաղաղապահ ուժերն օր առաջ դուրս բերվեն, որ օր առաջ Արցախում ցեղասպանություն անի: Ու այսօր մարդիկ խոսում են անկախությունից, մենք ինչո՞վ ենք անկախ, եթե ռազմական, տնտեսական առումով ու ճանապարհներով ոչինչով անկախ չենք եւ ինքուրույն որոշում կայացնող չենք: Այսօր մենք սեղանի վրա ենք դրված, ոչ թե սեղանի կողքին ենք: Գնդակի պես տշում են, ինչպես ուզում են», - մանրամասնեց Թաթուլ Պետրոսյանը:

«Ի՞ՆՉՆ Է ԽԱՆԳԱՐՈՒՄ, ՈՐ ԱՐԶՈՒՄԱՆՅԱՆՆ ԱՍԻ` ՇՈՒՇԻՆ ՈՎ ՀԱՆՁՆԵՑ»

Անդրադառնալով գեներալիտետին` արդարադատության բարձրաստիճան սպան հիշեցրեց, որ 41 գեներալ ստորագրել էին Նիկոլ Փաշինյանի հրաժարականը` նշելով, որ երկիրը հասցրել է կործանման այս իշխանությունը:

«Ի՞նչ եղավ հետո, բոլորին հատ-հատ օգտագործեց եւ նետեց փողոց, Միքայել Արզումանյանին էլ մեղադրում է Շուշին հանձնելու մեջ: Նույն Արզումանյանը թող բարձրաձայնի, որ Շուշին Նիկոլ Փաշինյանը հանձնեց` այն դժգույն ու դժբախտ քաղաք համարելով: Էլի, փառք Աստծո, ՌԴ նախագահը գոնե այդ ժամանակ կարողացավ կանգնեցնել պատերազմը, այլապես մենք ընդհանրապես Արցախ չէինք ունենալու: Բանակում ունենք 89 գեներալ, 27 գեներալ կա ոստիկանությունում, մոտ 50 գեներալ կա Ազգային անվտանգությունում, քննչական կոմիտեում, դատախազությունում (այս թվերը կարող են տատանվել 1-2-ով ընդամենը), ինչո՞ւ որեւէ մեկը ձայն չի հանում: Մի՞թե բոլորի, ներողություն արտահայտությանս համար, տակն այնքան կեղտոտ է, որ վախենում են ձայն հանել: Սովետական պատերազմական ֆիլմերից մեկում ռազմաճակատից սպան գալիս է եւ փորձում աշխատել երկրի թիկունքում ու ասում է, որ շատ ավելի ծանր է թիկունքում աշխատելը, որովհետեւ թշնամին թիկունքից է, իսկ ռազմաճակատում գիտես, որ թշնամին դիմացդ է: Այսօր ռազմաճակատը Հայաստանի Հանրապետության ներսում է: Այդ գեներալներից 80-90 տոկոսը իրենց գեներալական կոչումները ստացել են Ռուսաստանի գեներալական ակադեմիայում կրթություն ստանալուց հետո: Նրանք իրենց երկրորդ հայրենիքն են համարում Ռուսաստանը, բա թող մի հատ ձայն հանեն: Ի՞նչն է խանգարում, որ Արզումանյանն ասի` Շուշին ով հանձնեց, թող խոսեն Օնիկ Գասպարյան սուբյեկտն ու մյուսները, լռելու ժամանակը չէ՛», - հորդորեց գեներալ Պետրոսյանը:

Եզրափակելով խոսքը` նա ասաց, որ ԱԱԾ-ի տղաներից շատերին` որպես գործընկերների, առանձին դեպքերում հարգում է, բայց լռելու էլ ժամանակ չկա:

«Ասում են` տեղեկություն ունենք, բայց չենք հայտնում: Ի՞նչ ասել է` չենք հայտնում, դու երկիր ես կործանում: Մենք ոչ թե անդունդի եզրին ենք, այլ գահավիժման ընթացքի մեջ ենք: Եթե չկարողանանք դեմն առնել, վաղը էլ հայրենիք չենք ունենալու: Չգիտեմ` օբյեկտիվ դեղատոմսեր չունեմ, բայց այս ցավը բոլորիս դուռն է գոցել, խելք խելքի պետք է տանք եւ մտածենք` ինչ անենք, որ հակառուսականությունը Հայաստանում կանխենք: Իսկ հակառուսականության կանխման առաջին քայլը այս ստահակներին իշխանությունից հեռացնելն է, որովհետեւ իրենք են կառավարում եւ կազմակերպում հակառուսականությունը Հայաստանում», - ամփոփելով խոսքը` ասաց Թաթուլ Պետրոսյանը:

ՀՐԱՆՏ ՍԱՐԱՖՅԱՆ

Այս թեմայով Մահացել է պրոֆեսոր, ակադեմիկոս Վլադիմիր Պետրոսյանը Մոսկվայի հարավում ավտոմեքենայի պայթյունի հետևանքով ռուս գեներալ է զոհվել Սեդրակիչը ֆիասկո է ապրում այս օրերին Երկնային տարեդարձդ շնորհավոր պարոն Գեներալ Լեգենդար հայրն ու սիրասուն պապը, որ ապրեց հայրենիքի համար․ գեներալ Աստվածատուր Պետրոսյանն այսօր կդառնար 72 տարեկան