Հուսամ՝ մեր թշնամիները մարդկային կլինեն.ՄԱՐԹԵՆ ՅՈՐԳԱՆՑ

«Իրավունքը» զրուցել է ֆրանսահայ երգիչ եւ կոմպոզիտոր ՄԱՐԹԵՆ ՅՈՐԳԱՆՑԻ հետ:

— Ինչպե՞ս եք պատրաստվում Նոր տարվան:

— Ես հիմա գտնվում եմ Կանադայի Մոնրեալ քաղաքում: Ամեն ինչ այստեղ լավ է: Մեկ ամիս է դիտում ենք ֆուտբոլի խաղերը: Պատրաստվում եմ Նոր տարվան: Նոր տարվա գիշերը պետք է երգեմ Թեքեյան, Հայ օգնության, ինչպես նաեւ Տարեցների միություններում: Ամանորից հետո դարձյալ Մոնրեալի մոտ գտնվող Օտտավա քաղաքում պետք է երգեմ: Այսինքն` բավականին զբաղված եմ:

— Կանադայում Նոր տարվա տրամադրությունն ինչպիսի՞ն է:

— Այստեղ ամեն տեղ պարահանդեսներ են լինում: Հուսով եմ՝ հաջորդ տարի քովիդ ու պատերազմ չի լինի: Թող Աստված բոլորիս օգնի, որ հիվանդ չլինենք ու չտեսնենք պատերազմ: Տեսնում եմ, որ Հայաստանում շատ սքանչելի են նախապատրաստվել Նոր տարվան: Ինչի համար շատ ուրախ եւ երջանիկ եմ:

— Իսկ ինչպե՞ս են նշում սուրբծննդյան օրը Կանադայում:

— Դեկտեմբերի 24-ին` սուրբծննդյան գիշերը, ամեն մարդ իր տանն է նշում: Այդ օրը ուրախության, նվերների օր է: Փոքրիկների համար այն ամենալավ օրն է: Շատ կարեւոր է, որ լավ տրամադրություն ունենանք նշելու համար: Սուրբծննդյան տոնը հայկական տոնացույցով նշվում է հունվարի 6-ին: Ես նաեւ այդ օրն եմ նշում՝ որպես սուրբծննդյան տոն: Ինչ վերաբերում է Նոր տարվան, ճիշտ է, ես նշում եմ, բայց Նոր տարին սոսկ թվականի փոփոխություն է, ուրիշ ոչինչ:

— Երբեւէ Ձմեռ պապիկի դերում եղե՞լ եք:

— Մինչ այսօր չեմ եղել, բայց ամեն տարի Ձմեռ պապիկի կողքին եմ եղել եւ երգել եմ:

— Կցանկանայի՞ք լինել Ձմեռ պապիկ:

— Ինչո՞ւ չէ` եթե հրավիրեն, կհամաձայնեմ լինել Ձմեռ պապիկ:

— Դուք ե՛ւ Կանադայում եք նշել Ամանորը, ե՛ւ՝ Ֆրանսիայում, ո՞ր երկրում է ավելի հետաքրքիր անցել տոնը:

— Մի քանի տարի է, ինչ Կանադայում եմ ապրում: 4-5 ամիս Ֆրանսիայում եմ լինում, իսկ մնացած ամիսներին Կանադայում, որովհետեւ տիկնոջս ընտանիքը Կանադայում է ապրում: Նրա մայրը 95 տարեկան է: Դրա համար ավելի շատ այստեղ ենք լինում: Նոր տարին եւս նշելու եմ Կանադայում: Բոլոր երկրներում էլ շատ լավ է անցնում Նոր տարին: Այդ օրը ուրախության տոն է:

— Նոր տարվա նախաշեմին ի՞նչ ակնկալիքներ ունեք 2023 թվականից:

— Ես գիտեմ, որ Հայաստանի փոքրիկները շատ տաղանդավոր են: Նոր տարվա նախաշեմին կմաղթեմ բոլորին երջանկություն, առողջություն: Այս տարի, երբ սեպտեմբերին այցելեցի Հայաստան, հաջորդ օրը պատերազմական դրություն եղավ: Շատ տխուր եւ հուզված էինք բոլորս: Մեծ Մասրիկ գյուղը պետք է գնայի: Այնտեղ ինձ էին սպասում, բայց չգնացի պատերազմական դրության պատճառով: Եվ վստահ եմ, որ ինչ-որ նախապատրաստել էի անցյալ տարի, կիրականացնեմ 2023 թվականին: Նաեւ կայցելեմ Մեծ Մասրիկ գյուղ: Հուսամ՝ մեր թշնամիները մարդկային կլինեն, եւ Հայաստանն ավելի խելացիորեն կվարվի այս ամենի դեմ:

ՆՈՒՆԵ ԶԱՔԱՐՅԱՆ

Այս թեմայով  «Ճկույթիկ» երգը կունենա շարունակություն. ՄԱՐԹԵՆ ՅՈՐԳԱՆՑ «Լավատես եմ եւ միշտ մտածում եմ իմ ազգի մասին». ՄԱՐԹԵՆ ՅՈՐԳԱՆՑ Հայ աղջիկները սքանչելի գեղեցիկ են.Մարթեն Յորգանց (ԱՆՈՆՍ) Շնորհավորում եմ Հայաստանի հաջողությունը «Մանկական Եվրատեսիլ» մրցույթում.ՄԱՐԹԵՆ ՅՈՐԳԱՆՑ ՄԱՐ­ԹԵՆ ՅՈՐ­ԳԱՆՑՆ ԱՅ­ՑԵ­ԼԵԼ Է Ե­ՌԱԲ­ԼՈՒՐ