Ինչ են ԵՊՀ-ում ամերիկացիների հետ քննարկել Սլավոնական համալսարանի դասախոսները

«Իրավունքի» տեղեկություններով՝ օրերս ԵՊՀ-ում տեղի է ունեցել «Հայաստանը, Միացյալ Նահանգները եւ տարածաշրջանային փոխակերպումները Եվրասիայում. անդրազգային փոխըմբռնման ընդլայնում» խորագրով միջազգային երկօրյա գիտաժողով: Նպատակն է եղել քննարկել ԱՄՆ-Եվրասիա երկխոսության առանձնահատկությունները՝ ո՛չ ավել, ո՛չ պակաս շեշտելով Հայաստան-ԱՄՆ փոխհարաբերությունների զարգացման ուղիները եւ մոտեցումները: Ընդ որում՝ հատկանշական է այն, որ երկօրյա գիտաժողովին, բացի Երեւանի եւ Արիզոնայի պետական համալսարանների հետազոտողներից ու գիտնականներից, զեկուցումներ են ներկայացրել նաեւ Վալերի Բրյուսովի անվան պետական եւ Հայ-ռուսական (սլավոնական) համալսարանների ներկայացուցիչներ:

ԵՊՀ ռեկտոր Հովհաննես Հովհաննիսյանն անձամբ է եկել ու ողջունել նախաձեռնությունը, քանի որ ներկա է եղել Հայաստանում ԱՄՆ դեսպանատան հասարակայնության հետ կապերի բաժնի տնօրեն Ջեննիֆեր ՄքԷնդրյուն, Արիզոնայի պետական համալսարանի «Մելիքյան» կենտրոնի պրոֆեսոր Սթիվեն Բատալդենը եւ ՀՀ արտաքին գործերի նախարարության ամերիկյան երկրների վարչության պետ Արմեն Եգանյանը: Ի դեպ, առիթից օգտվելով՝ ԵՊՀ ռեկտորը գովազդել է համալսարանում գործող «Ամերիկագիտություն» մագիստրոսական ծրագիրը:

ԱՄՆ դեսպանատան ներկայացուցիչ Ջեննիֆեր ՄքԷնդրյունն էլ  նշել է, թե որքան հպարտ է դեսպանատունը, որ աջակցում է հայաստանյան եւ ամերիկյան կրթական ոլորտների համագործակցությունն ընդլայնելուն:

«Գիտաժողովը ԱՄՆ դեսպանատան ֆինանսավորած դրամաշնորհային ծրագրի մի մաս է, որն ունի մի քանի ուղղություն: 2 տարի առաջ ստեղծված «Ամերիկագիտություն» մագիստրոսական կրթական ծրագրի շրջանակում վերապատրաստումներ է անցել ծրագրում դասավանդող պրոֆեսորադասախոսական կազմը, ինչի շնորհիվ է նաեւ, որ արդեն ունենք 20 ուսանող: Այս ծրագրում հետազոտական գործոնն առանձնակի մեծ է, եւ հենց դա է պատճառը, որ կենտրոնի հետազոտողների համար պարբերաբար հայտարարում ենք դրամաշնորհային ծրագրեր, որոնց թվում՝ այնպիսի ծրագրեր, որոնք բաց են ընդհանուր առմամբ Հայաստանում գիտահետազոտական գործունեություն ծավալելու համար», - մանրամասնել է ԱՊՀ երկրների ինստիտուտի մասնաճյուղի տնօրեն, հայ-ռուսական «Լազարյան ակումբի» խորհրդի անդամ, քաղաքագիտության դոկտոր ԱԼԵՔՍԱՆԴՐ ՄԱՐԳԱՐՈՎԸ, ով պարզվում է՝ ԵՊՀ «Ամերիկագիտություն» ծրագրի ղեկավարն է:

ՀՐԱՆՏ ՍԱՐԱՖՅԱՆ

Այս թեմայով «Պուտինի ուղին»․ ինչ կարող է շահել Հայաստանը 2023 թվականի սեպտեմբերի 19–20-ը ավարտվեց ոչ միայն պատերազմը, այլ նաև Արցախի հայկական պետականության մի ամբողջ պատմաշրջան Գագիկ Ղազինյանը հայց է ներկայացրել ԵՊՀ-ի դեմ «Փաստ». ԵՊՀ-ի շուրջ նոր կրքեր են բորբոքվել «Խնդիրն էն ա, որ վարչապետ Փաշինյանը ԵՊՀ դիպլոմը հեղափոխությունից հետո ա ստացել», «Ես դիպլոմ չունեմ»