Խցանումներն արհեստածին բնույթ են կրում, ձեր զարդարանքը գիշերն արե՛ք. Մանրիկյան

Դուրս է եկել տանից եւ այդպես էլ տեղ չի հասել… Այս արտահայտությունը վերաբերում է ոչ թե մի քաղաքացու, այլ բոլոր երեւանցիներին, ովքեր օրվա մի զգալի մասը սկսել են անցկացնել ո՛չ ավել, ո՛չ պակաս երթեւեկության խցանումների մեջ: Խնդիրը դարձել է նույնքան անլուծելի, ինչպես հայկական ու արցախյան հարցն է, միայն թե այս դեպքում՝ չկա ո՛չ վաշինգտոնյան, ո՛չ էլ մոսկովյան լուծման գոնե առաջարկվող տարբերակ: Այս մասին «Իրավունքը» զրուցել է Երեւանի ավագանու «Բարգավաճ Հայաստան» խմբակցության ղեկավար ՄԻՔԱՅԵԼ ՄԱՆՐԻԿՅԱՆԻ հետ:

- Ի վերջո, որեւէ լուծում կամ տրամաբանական բացատրություն ունի՞ այն, որ երեւանյան խցանումները դարձել են պարտադիր ու անխուսափելի:

- Ստեղծված իրավիճակն, իսկապես, շատ մտահոգիչ է: Ինքս, որպես Երեւանի բնակիչ եւ վարորդ, ամեն օր առնչվում եմ խցանումներին: Կարծում եմ՝ այդ խցանումները  արհեստածին բնույթ են կրում: Մասնավորապես՝ վերջին օրերի խցանումները կապված են Ամանորին ընդառաջ քաղաքը զարդարելու հետ: Ինձ համար սա անընդունելի է: Ամբողջ առաջադեմ աշխարհի երկրներում նմանատիպ զարդարանքներն անում են հիմնականում երեկոյան ուշ ժամերի, որպեսզի չխաթարեն քաղաքացիների անդորրը եւ անցուդարձը: Սակայն մեզ մոտ ամենածանրաբեռնված ժամերին, ինչպես տեսնում եք, կատարվում է նման զարդարանքների աշխատանքներ, ինչի համար փակվում են կենտրոնական փողոցներ եւ առաջացնում խցանումներ: Երեւանի ավագանու վերջին նիստերից մեկի ժամանակ քննարկվում էր, թե գովազդային կազմակերպությունների կողմից գովազդային վահանակների տեղադրման ժամանակ առաջանում են երթեւեկության խցանումներ: Երեւանի ավագանու շատ անդամներ դժգոհում էին, թե գիշերվա ժամերին թող տեղադրեն եւ այլն: Հիմա էլ ես եմ ասում՝ ձեր զարդարանքը գիշերն արեք, ինչո՞ւ է Երեւանի քաղաքապետարանն իրականացնում այդ աշխատանքներն այնպիսի ժամերի, որն ամբողջությամբ կաթվածահար է անում երթեւեկությունը: Սա շատ ցավալի իրավիճակ է:

- Խնդիրն այն է, որ զարդարելուց հետո էլ հարցը չի լուծվելու, հիմա էլ մարդիկ զարդարված փողոցներում են մնալու խցանումների մեջ, որովհետեւ կա նաեւ ճանապարհների ու էստակադաների պակաս: Ի՞նչ կասեք այս մասին:

- Գրեթե 4 տարի է բարձրաձայնում ենք, որ Կրկեսի մոտ, «Հայրենիք» կինոթատրոնի հարեւանությամբ էստակադաների անհրաժեշտություն կա: «Հայրենիք» կինոթատրոնի մոտ պետք է կառուցվեր էստակադայատիպ անցում: Անգամ Արթուր Մեսչյանը, որն այն ժամանակ Երեւանի գլխավոր ճարտարապետն էր, հպարտորեն մակետ էր ցույց տալիս, թե ինչպիսին պետք է լինի այն, նաեւ մամուլում մոտավոր նկարները արտացոլեցին: Սակայն, այդպես էլ էստակադաներ չկառուցվեցին: Այո՛, իրավացի եք, հիմնական պատճառը, որ այսօր խցանումներ ունենք, ցավոք, նաեւ այն է, որ քաղաքային մարմինն այս առումով դեռ  կաղում է: Շուտով կքննարկենք 2023 թվականի բյուջեն, կտեսնենք, թե արդյոք նախատեսված են էստակադաների կառուցում, թե՝ ոչ, որպեսզի բեռնաթափենք այնպիսի բանուկ խաչմերուկներ ինչպիսին են այն հատվածները, որոնք արդեն նշեցի:

- Փաստորեն, կարճաժամկետ լուծում այս հարցը չունի՞ եւ պետք երեւանցին շարունակի սպասել, ինչպես անհույս սպասում է խոստացված Աջափնյակի մետրոյի կայարանի՞ն:

- Էլի եմ շեշտում՝ «Բարգավաճ Հայաստան» խմբակցության, մասնավորապես իմ կողմից 4 տարի անդադար էստակադաների կառուցման հարցը բարձրաձայնվել է: Անգամ մեր խմբակցության կողմից առաջարկ է եղել, որ Երեւանի զարգացման հնգամյա ծրագրի մեջ ներառվի Կրկեսի, «Հայրենիք» կինոթատրոնի մոտ, Դավիթաշենի կամուրջից դեպի Կոմիտասի պողոտա իջնող հատվածում էստակադաներ կառուցելը, որտեղ միշտ խցանումներ են լինում: Բայց, ցավոք, սայլը տեղից չի շարժվել: Իսկ խնդիրները ավելանում են, որովհետեւ օրեցօր Երեւանում ավտոմեքենաներն են շատանում: Պետք է օրհասական լուծում տրվի, նոր ճանապարհային հանգույցներ եւ էստակադաներ կառուցվեն: Մինչդեռ այս պահին նմանատիպ լրջագույն ծրագրեր չկա: Հուսամ, որ 2023 թվականի բյուջեում գոնե կտեսնենք նմանատիպ ծրագրեր, մոտակա մի քանի օրվա ընթացքում պարզ կլինի:

- Երեւանցիները շարունակում են դժգոհել նաեւ տրանսպորտի վատ աշխատանքից: Քաղաքապետ Հրաչյա Սարգսյանը եւ փոխքաղաքապետ Տիգրան Ավինյանը երկու-երկու մեկնել էին Լեհաստան՝ MAN Truck & Bus SE ընկերության հրավերով, որպեսզի այդ  գործարանից նոր ավտոբուսներ ձեռք բերեն: Ի՞նչ հույսեր կան այս առումով:

- Հարցի լուծում կլինի միայն միասնական ցանցի ներդրմամբ, որը կներառի մետրոպոլիտենը եւ կունենանք երկու-երեք նոր կայարաններ: Այդ դեպքում կկարողանանք նաեւ բեռնաթափել Երեւանը: Հավատացեք, միայն ավտոբուսներ ներկրելով՝ այդ հարցը լիարժեք լուծում չի ստանալու: Ընդամենը որոշակի լուծում է ստանալու՝ այն էլ որոշակի ժամանակով: Կարող ենք ներկրել, օրինակ, 700-800 ավտոբուս, որը հավելյալ ծանրաբեռնվածություն է բերելու մեր ճանապարհներին: Ճիշտ է, մասնագետներն ասում են, թե ավտոբուսներ ներկրելով ՝ զուգահեռաբար ավելի կքչանան գազելները կամ ավելի փոքր տարողությամբ ավտոբուսները, սակայն էլի եմ ասում՝ տրանսպորտային հարցի լուծումը տեսնում եմ միասնական ցանցի ներդրմամբ: Սա է իմ պատկերացումը տրասնպորտային բարեփոխման հետ կապված, իսկ մնացածը կապրենք, կտեսնենք, մոտակա ժամանակներս ամեն ինչ պարզ կդառնա: Ամեն դեպքում, արդարացի են քաղաքացիների բողոքները: Ոււղղակի շնորհակալություն եմ հայտնում մեր քաղաքացիներին, որ այսքան դիմանում են: Ինչքա՞ն կարող են մարդիկ ամեն անգամ լսել, թե «էլի համբերեք», «մի քիչ էլ դիմացեք»: Արդեն չորս տարի է համբերում են ու սպասում տրանսպորտի բարեփոմանը, որը շատ դանդաղ է տեղի է ունենում, եւ այն էլ ոչ լիարժեք է քանի որ չի ներառում մետրոն ամբողջությամբ:

ՀՐԱՆՏ ՍԱՐԱՖՅԱՆ

Այս թեմայով Սովորական արծրունություն՝ նացիստների փաստաբանությամբ ՈՒՂԻՂ. Ազգային ժողովի նիստ Մանրիկյանը կոչ է անում չանցնել կոռեկտության սահմանը Global High-Tech-ի 15-րդ դափնեկիրը ժամանել է Հայաստան Հայտնի վիրաբույժը այլեւս գործունեությունը ծավալելու է Երեւան բկ-ում