ՔՊ-ի պառակտումը ընդդիմադիր խմբակի համար՝ երկնքից աստղ իջեցնելու համար երազանք կմնա, դա ես եմ Ձեզ ասում․ Վիգեն Խաչատրյանի ուշագրավ բացահայտումը

«Մեր քաղաքականությունն այնպիսին պետք է լինի, որ երբևիցե Արցախում հայաթափումը չդառնա իրականություն։ Որևէ պարագայում Արցախը չպետք է հայաթափվի, բայց այսօր կա կոնկրետ ծրագիր, որն ինչ-որ պահի դառնալու է Արցախի հայաթափություն։ Մենք պիտի սպասարկենք մեր շահը, ոչ թե այլ պետության։ Դրա համար Էլ ռուսական տարբերակը, ինչպես ասաց վարչապետը այս պահին մեզ համար ընդունելի է, որովհետեւ Արցախի հարցը մնում է առկախված հետագա լուծման համար։ Մենք այս կերպ վերահաստատում ենք, որ մենք Արցախը ու արցախցուն չենք ուրանում, մենք ուզում ենք բացառել արցախցիների հայաթափումը՝ սա է ողջ իրականությունը։ Դե հիմա էլ ասում ենք ընդդիմություն կոչված խմբակին, որ իրենք էլ իրենց տեսակետը հայտնեն, դիրքորոշում հայտնեն, բայց ինչպես միշտ իրանք էլ ընկել են բառախաղի վրա, որ խուսափեն հստակ պատասխանից, մեկ անգամ եւս վերահաստատելով, որ իրենց համար կարեւորը իշխանության գալն է, ոչ թե Արցախի եւ ՀՀ-ի ժողովրդի խաղաղ ու անվտանգ կյանքը>>,-<<Իրավունքի>> հետ զրույցում անդրադառնալով իշխանության ռուսական խաղաղության տարբերակի վրա կանգ առնելու դիրքորոշմանը, ասաց  «Քաղաքացիական պայմանագիր» խմբակցության պատգամավոր Վիգեն Խաչատրյանը։

-Պարոն Խաչատրյան, եթե ի սկզբանե Ձեզ համար ռուսական տարբերակն էր ընդունելի՝ ինչո՞ւ էիք Բրյուսել, Պրահա մեկնում, այս հարցը ի դեպ ընդդիմությունն էլ է բարձրացնում։

-Բա չհասկանանք, թե որտեղ ինչ է քննարկվում, որ վերջնական դիրքորոշում հայտնենք, իսկ ինչ մնում է Ձեր ասած ընդդիմությանը, ապա նրանք քաղաքականապես այնքան անհաս են, որ իրեց ասելու, պատասխանելու ոչինչ չունենք։

-Պարոն Խաչատրյան, կասեք, ինչո՞ւ էր ԱԺ-ում ուժեղացված հսկողություն վարչապետի ԱԺ դահլիճում գտնվելու ժամանակ, երբ ընդդիմադիրներից եւ ոչ ոք չկար։

-Էդ թեման էլ են ֆետիշացրել այդ իշխանություն տենչող խմբակը, որեւէ ուժեղացված, արտառոց բան չի եղել։ Պարզապես այդ իշխանազավթմամբ տառապող մանդատավորները այնքան չեն եկել ԱԺ, որ տեղյակ չեն, թե իրականում ինչը՝ ոնց է։ Որեւէ արտառոց  բան չկա, ավելին ասեմ նրանց երազանքն էլ ՔՊ-ն պառակտված տեսնելու վերաբերյալ, երբեք իրականության չի վերածվի։ ՔՊ-ի պառակտումը ընդդիմադիր խմբակի համար՝ երկնքից աստղ իջեցնելու համար երազանք կմնա, դա ես եմ Ձեզ ասում։