Ընդդիմությունը վերադառնում է ԱԺ․ ոմանք մանդատները վայր կդնեն. Irakanum.am

Irakanum.am-ն արդեն տեղեկացրել էր, որ խորհրդարանական ընդդիմությունը՝ «Հայաստան» և «Պատիվ ունեմ» դաշինքները քննարկում են ԱԺ վերադառնալու հարցը։ Իշխան Սաղաթելյանը մեր հարցին ի պատասխան ասել էր, որ վերջնական որոշում չունեն։ Նշենք, որ ավելի աղ ԱԺ նիստերի դահլիճ վերադարձել էին «Պատիվ ունեմ» խմբակցության պատգամավորները՝ մասնակցել հայտարարությունների ժամին և հաջորդ օրվա քվեարկությանը։

Ինչպես հայտնում են մեր աղբյուրները «Հայաստան» դաշինքում ևս վերջնական որոշում ունեն և նոյեմբերի 15-ին մեկնարկելիք ԱԺ քառօրյային նրանք ևս կմասնակցեն։ Բայց այստեղ հարցն այն է, որ դաշինքի ոչ բոլոր պատգամավորներն են կողմ եղել խորհրդարան վերադառնալու որոշմանը։ Մասնավորապես մենք տեղեկացանք, որ կտրուկ դեմ է արտահայտվել Իշխան Սաղաթելյանը։ Վահե Հակոբյանը ևս հակված չէ ԱԺ վերադառնալուն, մինչդեռ «Հայաստան» խմբակցության ղեկավար Սեյրան Օհանյանը հայտնել է, որ նման որոշում անձամբ Ռոբերտ Քոչարյանն է կայացրել և իրենք պետք է վերադառնան, հատկապես, որ ԱԺ նիստերին օր առաջ մասնակցելու ցանկություն ընդդիմադիր պատգամավորներից շատերն ունեն։

ԱԺ վերադառնալու որոշումն ուրախացրել է մի շարք ընդդիմադիրների, մասնավորապես Գեղամ Նազարյանին, Աղվան Վարդանյանին, ու խմբակցության կանանց։

Այս ամենով ընդդիմադիր խմբակցությունում տեղի ունեցած քննարկումը չի ավարտվել և մեր տեղեկություններով խորհրդարան վերադառնալու որոշումից անմիջապես հետո որոշ պատգամավորներ կհայտարարեն մանդատները վայր դնելու մասին։

Ի դեպ իշխանականները որոշել են ծափերով դիմավորել ընդդիմադիր գործընկերներին, այնպես, ինչպես «ճանապարհել» էին ու գոնե այս փուլում չսրել իրավիճակը նիստերի դահլիճում։

Irakanum.am