Սերժ Սարգսյանի գործը քննող դատավոր Վահե Միսակյանի նկատմամբ հայտարարվեց նկատողություն

ԲԴԽ-ն բավարարեց Երևանի ընդհանուր իրավասության դատարանի դատավոր Վահե Միսակյանին կարգապահական պատասխանատվության ենթարկելու մասին ՀՀ արդարադատության նախարարության ներկայացրած միջնորդությունը։ «Փաստինֆո»-ի հաղորդմամբ՝ նրան հայտարարվեց նկատողություն։

Հիշեցնենք, որ դատավոր Միսակյանի վարույթում գտնվում են մի շարք աղմկահարույց գործեր, այդ թվում՝ ՀՀ երրորդ նախագահ Սերժ Սարգսյանի, ԱԺ «Հայաստան» խմբակցության պատգամավոր Արմեն Չարչյանի, ՀՀ նախկին վարչապետ Վազգեն Մանուկյանի վերաբերյալ։

Երևանի ընդհանուր իրավասության դատարանի դատավոր Վահե Միսակյանի նկատմամբ կարգապահական վարույթը հարուցվել է ՀՀ արդարադատության նախարարության կողմից՝ գործերից մեկով արդարացման դատական ակտը կողմերին ուշ տրամադրելու համար, ինչի հետևանքով, ըստ նախարարության, վաղեմության ժամկետներն անցել են։ ԱՆ-ն միջնորդություն է ներկայացրել ԲԴԽ՝ դատավորին պատասխանատվության ենթարկելու համար։ Ըստ միջնորդության՝ թիվ ԵԴ/1067/01/19 քրեական գործով թույլ է տրվել Քրեական դատավարության օրենսգրքի 375-րդ հոդվածում ամրագրված պահանջների խախտում, որոնք իրենց հերթին հանգեցրել են «Հայաստանի Հանրապետության դատական օրենսգիրք» սահմանադրական օրենքի 69-րդ հոդվածի 1-ին մասի 1-ին կետով եւ 70-րդ հոդվածի 2-րդ մասի 6-րդ կետով սահմանված դատավորի վարքագծի կանոնների խախտման:

Միջնորդության քննության ընթացքում դատավոր Վահե Միսակյանը, անդրադառնալով դատական ակտն ուշ ուղարկելու պատճառներին և դրան նպաստող հանգամանքներին, բարձրացրեց դատարանների գերծանրաբեռնվածության խնդիրը։