«Թատրոն կայարան»-ի «Անահիտ»-ը կոնկրետ ասելիք ունի

Արդեն մի քանի ամիս է, ինչ գործում է «Թատրոն կայարան»-ը, որը թատերասեր հանրության առաջ իր դռներն է բացել բավական հետաքրքիր խաղացանկով: «Անկոչ հյուրը», «Սեր ֆրանսիական ձեւով» եւ այլ ներկայացումների շարքն օրերս էլ համալրեց նաեւ Ղազարոս Աղայանի «Անահիտ» հեքիաթի համանուն բեմադրությունը: Ընդ որում՝ առաջնախաղը հանդիսատեսի պակաս չուներ. «Անահիտ»-ով հետաքրքրված էին ոչ միայն պատանի, այլեւ մեծահասակ հանդիսատեսը:

Բեմադրության եւ սցենարի հեղինակը «Թատրոն Կայարանի» գեղարվեստական ղեկավար ԿԱՐԱՊԵՏ ՔԱՐԱՋՅԱՆՆ է, ում գնահատմամբ՝  այսպիսի «Անահիտ» երեւանյան թատրոններում դեռ չէր բեմադրվել:  Նա պիեսի հիմքում պահպանել է 5 կարեւոր կետ. սեր ծնողի, սեր կողակցի, սեր աշխատանքի, սեր փոխհարգանքի, սեր հայրենիքի նկատմամբ: Հատուկ այս ներկայացման համար երաժշտություն է գրել կոմպոզիտոր ՎԱՀԵ ՀԱՅՐԱՊԵՏՅԱՆԸ, իսկ պարերը բեմադրել է ՆԱԿԱ ՄԻՐԶՈՅԱՆԸ, նկարիչ՝ ԱՐԵԳ ՄԻՐԻՋԱՆՅԱՆ:

Թատրոնի փոխտնօրեն ԱՆԴՐԱՆԻԿ (ԱՆԴԻ) ՍՈՂՈՄՈՆՅԱՆԸ մեզ հետ զրույցում ընդգծեց, որ հատկապես այս ներկայացումը շատ լուրջ եւ մեծ պատասխանատվությամբ են իրականություն դարձրել:

«Սա սովորական կամ հերթական ներկայացումներից չի եղել, այլ կոնկրետ ասելիք ունի՝ թե՛ մեծերի, թե՛ փոքրերի համար, ինչի համար մեր տաղանդավոր դերասանական կազմը ջանք չխնայեց, զորուգիշեր աշխատեց ու փայլուն կերպով հանձնեց այն հանդիսատեսի դատին», - ասաց Սողոյանը:

Նշենք, որ ներկայացմանը ներկա էին մշակութային գործիչներ, ԿԳՄՍ նախարարության ներկայացուցիչներ: Ի դեպ, Սողոյանը տեղեկացրեց, որ առաջնախաղին իրենց աջակցել է Ararat view Garden-ի տնօրինությունը, որպեսզի ներկայացմանը մասնակից լինեն նաեւ պատերազմում զոհվածների ընտանիքի անդամներ:

ՀՐԱՆՏ ՍԱՐԱՖՅԱՆ

Այս թեմայով Թե բա 82 միլիոն դրամ էլ դեռ ես եմ ներդրել փողոցի լայնացման և բորդուրների համար Ռուսական դրամատիկական թատրոնը բացեց 89-րդ թատերաշրջանը «Սովորական պատմություն» ներկայացմամբ Մենք այս պետությանը պետք չենք․ Անահիտ Մարտիրոսյան Որ խելքներդ չի հասնում, ծպտուն մի հանեք․ ԲԱՄԲԱՍԱՆՔ Բաղդասարյանների գերդաստանը Խաչվերածը նշեց հավերժի ճամփան բռնած ՆԻՆԱ ՄԱՅՐԻԿԻ հիշատակի առաջ խոնհարմամբ