Թեհրանը ՀՀ-ին զենք չի վաճառի, բայց թույլ չի տա երրորդ երկրներին և սիոնիստական ​​ռեժիմին ներգրավվել Հայաստան-Ադրբեջան հակամարտության մեջ. Իրանի պատգամավոր

Տեւական ժամանակ է ինչ հայաստանյան մամուլում տարատեսակ խոսակցություններ են շրջանառվում, թե իբր Իրանը պատրաստ է Հայաստանին զենք մատակարարել։ Նման թեզ են առաջ քաշում նաեւ որոշ քաղաքական գործիչներ: Իրականությունը, սակայն, լրիվ հակառակն է: Մասնավորապես վերը նշված տեղեկությունների վերաբերյալ հստակ պատասխան ստանալու ակնկալիքով դիմել ենքհ այկական ծագմամբ իրանցի քաղաքական գործիչ, Իրանի իսլամական հանրապետության խորհրդարանի պատգամավոր ԱՐԱ ՇԱՀՎԵՐԴԱՅԱՆԻՆ, ով նախ փաստեց.

-Հայաստանի ժողովրդի անվտանգությունը նույնն է, ինչ Իրանի ժողովրդի անվտանգությունը, և Թեհրանը կտրականապես դեմ է սահմանների և աշխարհաքաղաքականության փոփոխությանը: Բայց իրականությանը չեն համապատասխանում վերջերս որոշ լրատվամիջոցներում տարածված տեղեկությունները, թե Իրանից Հայաստան զենք է ուղարկվում կամ ուղարկվելու: Այդ լուրերը շրջանառվում են  կովկասյան տարածաշրջանում լարվածություն և անապահովություն ստեղծելու նպատակում։ Իրանը դեմ է պատերազմին և կարևորում է երկրների տարածքային ամբողջականության պահպանումը:

Պատգամավորը անդրադարձավ նաեւ Կապանում Իրանի հյուպատոսության բացմանը, նկատելով.

-Կապանում Իրանի գլխավոր հյուպատոսության բացումը նշանակում է, որ Թեհրանը  թույլ չի տա երրորդ երկրներին և սիոնիստական ​​ռեժիմին ներգրավվել Հայաստան-Ադրբեջան հակամարտության մեջ։

ԻԼՈՆԱ ԱԶԱՐՅԱՆ