Պատմություն ռուս հարբեցողի ու վարկի տակ ընկած հայի մասին. Հայտնի փաստաբանի գրառումը

Ակնհայտ է, որ Ռուսաստանից, Ուկրաինայից եկած տասնյակ հազարավոր մեր հյուրերը, որոնց մի մասն արդեն Հայաստանում ստացել է կացության իրավունք կամ քաղաքացիություն, իրենց հետ բերել են իրենց բարքերն ու իրենց ապրելու ձևերը։ Լավ է դա, թե վատ, այն մեր տիրույթում չէ, բայց, իրավամբ, լինելով հյուրասեր ազգ, մեր հյուրերը պետք է գիտակցեն, որ Հայաստանում գործում են պարտադիր բարեվարքության որոշ կանոններ, որը խախտելը հյուրերի կողմից անթույլատրելի է:

Դեպքը, որ տեղի է ունեցել, Ռուսաստանի կամ Ուկրաինայի համար ամենօրյա սովորական երևույթ է, Հայաստանի համար զավեշտի հասնող զանցանք կամ հանցանք է։ Որոշ խմբագրումներով ներկայացնում եմ մեր հայրենակցի նամակը։

Մեր շենքի երկրորդ հարկի բնակարանը գնել են Ռուսաստանից եկած մարդ ու կնիկ։ Երկուսն էլ ալկաշ։ Այնպես չի, որ մեզ նեղություն են տալիս, բայց հաճելի չէ, երբ հարևանդ խրոնիկ հարբեցող է:

Օրեր առաջ գիշերվա երկուսի կողմերը շենքի բակում ուժեղ գմփոցից արթնացանք, վազեցինք պատշգամբ։ Ալկաշներից ամուսինը երկրորդ հարկից ընկել էր բակում կայանած տղայիս մեքենայի վրա, ասել Դոգը, արել էր մորմշ։ Վազելով իջանք բակ, տեսնենք ոչ մի վնաս չի ստացել, բայց մեքենան ջարդ ու փշուր էր արել։ Առավոտյան ցույց եմ տալիս մեքենան, ինքը լռում է, կնիկն էլ մի հատ վկայական է ցույց տալիս, որ ալկաշ մարդը ճանաչվել է սահմանափակ գործունակ։ Զանգեցի ոստիկանություն, պատմեցի եղելությունը, ասում են կատակ ես անում: Մի խոսքով հաջորդ օրը թաղայինը եկավ, բարձրացավ հետները խոսեց, ինձ էլ ասաց գնա հատուցում ապահովագրողներից ուզի։ Ապահովագրողները մերժեցին, ասացին ավտովթար չի։ Դիմեցի տարբեր տեղեր, իրավաբանների, ասում են հնարավոր չի: Մեքենան էլ բանկով ենք գնել, բանկն իր փողն է ուզում։

Պատասխան.

Արձանագրեմ, որ տվյալ անձն ալկոհոլը չարաշահելու համար ճանաչվել է սահմանափակ գործունակ, իսկ վերջինիս եկամուտները, այդ թվում՝ աշխատավարձը, տնօրինում է իր կինը, որպես հոգեբարձու։

Օրենքի ուժով նման կատեգորիայի անձիք անգործունակ չեն համարվում, ուստի չեն ազատվում պատասխանատվությունից: Անհրաժեշտ է գնահատել մեքենային պատճառված վնասը, դիմել դատական պաշտպանության, կիրառել հայցի ապահովում՝ վնասի չափով արգելանք կիրառելով դրամական միջոցների, իսկ դրանց բացակայության դեպքում՝ ձեր վերևի հարկի բնակարանի վրա:

Լևոն Բաղդասարյան, փաստաբան