Ազգը կործանվում է, նայե՛ք հադրութցիներին, դուք էլ եք նույն վիճակում հայտնվելու. Հայրյան

Կառավարության դիմաց երեկ կրկին հավաքվել էին արցախցի փախստականները: Այս անգամ նրանք եկել էին հստակ զգուշացումով, որ եթե ՀՀ կառավարությունը հրաժարական չտա, ապա Հայաստանն էլ կարժանանա Հադրութի ճակատագրին: «Հանուն Հադրութի» ՀԿ նախագահ, Մեծ Թաղերի նախկին գյուղապետ, Արցախի նախկին պատգամավոր ԼԵՎՈՆ ՀԱՅՐՅԱՆԸ նեղսրտած էր, որ իրենց զգուշացումներին քիչ թվով քաղաքացիներ են արձագանքել:

— Սա նշանակում է, որ ժողովրդին հետաքրքիր չէ իր իսկ վիճակը: Մեր ընկերներից մեկն անգամ ասում է՝ այսօր ո՞ւմ եք հայհոյելու: Ոչ մեկին, պարզապես ուզում ենք ժողովրդին կոչ անել, բացատրել, որ վիճակը վատ է` այնքան վատ, որ մոտ է անելանելիին: Կոչ ենք անում ոտքի կանգնել եւ պաշտպանել մեր շահերը, այլապես դա մեր փոխարեն որեւէ մեկը չի անի: Այս իրավիճակի մեղավորն առաջին հերթին ժողովրդի անտարբերությունն է: Դանակը ոսկորին է հասել, բայց ոչինչ չենք անում: Այս իշխանությունը պետք է հեռանա, որովհետեւ չի սպասարկում հայության շահը: Վերջին ապացույցը ՔՊ-ական պատգամավոր Էդուարդ Աղաջանյանի հայտարարությունն է, որ ի վիճակի չեն ապահովելու Արցախի անվտանգությունը: Սկզբում տվեցին Ջրականը, հետո Ասկերանի գյուղերը, Հադրութը, Շուշին: Նոյեմբերի 9-ի թղթով իբր թե կանգնեցրին Ադրբեջանի առաջխաղացումը: Ի՞նչ իմաստ ուներ այդ թուղթը, եթե այսօր ամեն օր հակառակորդն առաջ է գալիս: Պրահայի հանդիպումների արդյունքները՝ որպես վկա, այդտեղ արդյունք կա՞: Նիկոլ Փաշինյանն ասաց, թե ուզում է ճանապարհ տալ, իսկ Ալիեւը համաձայն չէ: 2020թ.-ից Ալիեւն անում է իր ուզածը, Փաշինյանն էլ մի բան է խնդրում, ու նա չի համաձայնում: Հետեւաբար, հաջորդ քայլով ՀՀ ճանապարհները կօտարվեն հօգուտ Ադրբեջանի: Որոշ ժամանակ առաջ պնդում էի, որ ՔՊ-ի հաջորդ հայտարարությունը լինելու է Ցեղասպանության հարցից հրաժարվելը, բայց հիմա ավելի կոնկրետ եմ ասում: ՔՊ-ի հաջորդ հայտարարությունը լինելու է այն, որ ՀՀ-ի՝ որպես անկախ պետության շահերն այլեւս չեն կարողանում պաշտպանել, որ պետք է մտնենք այլ պետության կազմ, եւ քանի որ Թուրքիան խնդրահարույց է, իսկ ՌԴ-ն՝ թույլ, լավ կլինի մտնենք Ադրբեջանի կազմ, քանի որ Ալիեւն այդպես է ուզում: Փաշինյանն է այսպես ասելու: Թող սա ձեզ ֆանտաստիկ կամ ծիծաղելի չթվա: Հայ ազգը կործանվում է: Նայե՛ք հադրութեցիներին, դուք էլ եք նույն վիճակում հայտնվելու: Ուզում եք կոտորվե՞ք: Իշխանության հայտարարած խաղաղության պայմանագիրը նշանակում է, որ խաղաղ ենք կոտորվելու: Հայ ժողովուրդ, վիճակն օրհասական է, մի՛ նստեք ռեստորաններում եւ աշխատավայրում, այլապես կոտորվելու ենք: Հա՛յ ժողովուրդ, քեզ սպասվում է Հադրութի ճակատագիրը՝ մի տեղ անտուն թափառել, որովհետեւ չես ուզում պետություն պահել: Իշխանությունը պետությունը ծախում է, իսկ դու լուռ նստած ես:

ՀՐԱՆՏ ՍԱՐԱՖՅԱՆ

Այս թեմայով Մթնոլորտի նոր համաշխարհային վերլուծությունը մտահոգիչ պատկեր է բացահայտել. Լևոն Ազիզյան «Իրավունք». Փաշինյանը «հաթաթա» է տվել «Շեֆ ջան, մենք պրոբլեմ չունենք» ասողներին Հայտնի է մարզպետից՝ համայնքապետ ձգտման պատճառը ՀՐԱՏԱՊ.ԴՕԿ Կուսակցության պատվավոր նախագահ Վարդան Ղուկասյանն հանգամանալից կանդրադառնա ԵԽԽՎ-ում ՀՀ ԱԺ ընտրությունների վերաբերյալ հնչած գնահատականներին «Իրավունք». Ով է Վանեցյանի կուսակցությունով առաջադրված Լեվոն Վահրադյանը