Շատ վատ նախադեպ կարող է լինել. հայտնի փաստաբանը` «Նորք-Մարաշի» գործով վճռի մասին

Երեւանի ընդհանուր իրավասության դատարանը՝ դատավոր Մեսրոպ Մակյանի նախագահությամբ, հրապարակեց «Նորք-Մարաշի» գործով 20 ամբաստանյալների դատավճիռը: Մասնավորապես` ՀԱՊ կուսակցության նախագահ Արթուր Վարդանյանը մեղավոր ճանաչվեց` դատապարտվելով ազատազրկման՝ 13 տարի ժամկետով, հաշվակցելով նախաքննության եւ դատաքննության ընթացքում կալանքի տակ գտնվելու ժամկետը, վերջնական պատիժ սահմանվեց 9 տարին:Մինչդեռ, ՀՀ ՊՆ նախկին փոխնախարար Վահան Շիրխանյանին նույն գործով առաջադրված մեղադրանքներում արդարացրեց՝ ճանաչելով եւ հռչակելով նրա անմեղությունը՝ հանցակազմի բացակայության հիմքով, իսկ մյուս մեղադրանքներով՝ մեղավոր ճանաչեց՝ որպես վերջնական պատիժ սահմանելով ազատազրկումը՝ 3 տարի 5 ամիս ժամկետով: Այնուհետեւ դատարանը նշեց, որ Վահան Շիրխանյանը համաներմամբ ազատվում է պատիժը կրելուց:

Անդրադառնալով կայացված դատավճռին` «Լեւ գրուպ» փաստաբանական գրասենյակի ղեկավար, հայտնի փաստաբան ԼԵՎՈՆ ԲԱՂԴԱՍԱՐՅԱՆԸ, ով Արթուր Վարդանյանի պաշտպանն է, «Իրավունքի» հետ զրույցում ասաց, որ դատական ակտը ստանալուց հետո` օրենքով սահմանված կարգով այն կբողոքարկեն վերադաս ատյանին:

«Նախ հրապարակվեց դատավճռի եզրափակիչ մասը, իրավամբ կստանանք ամբողջ  դատական ակտը, որի հետ կապված համապատասխան իրավական հետեւություններ կարվի: Ըստ էության,հնարովի, սարքած գործ է, որը եկավ ու հանգրվանեց այս փուլին: Իրավապաշտպանիս կարծիքն է, որ այն ապագա չունի: Միեւնույն ժամանակ, տարօրինակ եմ համարում, որ առերեւույթ պատվիրատուին դատարանը փորձաշրջան է տալիս, առերեւույթ կատարողներին` երկար ազատազրկումներ: Սա իրավակիրառ պրակտիկայում ոչ միայն հարիր չէ, այլ շատ վատ նախադեպ կարող է լինել: Որպես կանոն՝ առերեւույթ պատվիրատուն իրավամբ ավելի մեծ պատասխանատվության պետք է ենթարկվի, քան առերեւույթ կատարողը», - շեշտեց փաստաբանը:

Ամփոփելով միտքը` Լեւոն Բաղդասարյանն ասաց, որ սա հնարածին մեղադրանքներով կայացված դատական ակտ էր:

ՀՐԱՆՏ ՍԱՐԱՖՅԱՆ

Այս թեմայով ՇՏԱՊ․ Արմավիր ՔԿՀ-ի բանտախցում կտրուկ վատացել է Արթուր Վարդանյանի առողջական վիճակը կտրուկ վատացել է Գուցե արժե հարցնեք ինքներդ ձեզ՝ ինչի՞ եք հասցրել այս երկիրը․ ԶԱՐՄԱՆՔ «Խլուրդը դո՛ւք եք, գաղտնիք բացեմ՝ ձեզնից ա ինֆորմացիան եկել»․ Լևոն Քոչարյանը՝ Նիկոլ Փաշինյանին Բիչախչյանը խոսել է իր շարք վերադառնալու ժամկետների մասին Հակակոռուպցիոն կոմիտեի կողմից ձերբակալված փաստաբանը Էդգար Հակոբյանն է