Նախ թող պատասխանեն, թե ով էր Արցախում վարում 44-օրյա պատերազմը, ա՛յ էդ տեղից թող սկսեն. «Սեւ հովազ» ջոկատի հրամանատարը վերջին ձերբակալությունների մասին

«Եթե գործող իշխանությունը իրականում ցանկություն ունենար պատժել պատերազմի մեղավորներին չէր սպասի երկու տարի: Իսկ ինչո՞ւ է հիմա` երկու տարի անց որոշել քր, գործեր հարուցել շատ պարզ է, այս ընթացքում հնարավորինս մաքրել են իրենց հետքերը, իսկ էս քր, գործերը ընդամենը բռնոցիների հերթական մասն է: Չորս տարի է սրանց համար բռնել-բաց թողնելը դարձել է գործելաոճ: Եթե ուզում են իսկապես պարզեն իրական մեղավորներին, ապա հենց առաջինը իրենք իրենց պետք է բռնեն, որ նախօրոք իմանալով մոտալուտ պատերազմի վտանգը ոչինչ չձեռնարկեցին: Ի՞նչ է նշանակում տալ հերոսի կոչում, հետո ասել` վայ կայնի, ոնց որ էսի հերոս չի, այլ հակահերոս է:  Սրանք իմ կարծիքով էս թատրոնը խաղում են եղած փաստերն էլ մաքրելու համար, որ դատարանում սիրուն մարքրվեն ու արդարացվեն»-«Իրավունքի» հետ զրույցում անդրադառնալով վերջին հարուցված քր. գործերին, որոնք վերաբերում 44-օյա պատերազմի պատճառները վեր հանելուն, ասաց «Սեւ հովազ» ջոկատի հրամանատար, Արցախի հերոս Ռուստամ Գասպարյանի եղբայրը՝ Սերոբ Գասպարյանը:

-Ի՞նչ կասեք կոնկրետ ՊԲ նակին հրմանատար Միքայել Արզումանյանին առաջադրված մեղադրանքի մասին, նրան մեղադրում են Շուշիի անկման մեջ, մասնավորապես, որ նրա գործողություններն են հանգեցրել բերդաքաղաքի անկմանը:

-Գիտեք, մինչեւ Շուշիին հասնել բավականին տարածքներ են հանձնվել, եթե էդքան ազնիվ են, ապա պետք է սկսեին Ջալալից, գային հասնեին Միքայելին, հետո Օնիկ, ապա Նիկոլ: Այսինքն հիմա իրենք սկսել են հետեւից, բայց ինչո՞ւ, շատ բաներ են կատարվել մինչեւ Շուշին: Հիմա Միքայելին մի որոշ ժամանակ կփակեն, հետո բաց կթողեն` կգնա: Սրանք ոչինչ չեն բացահայտելու, ընդհակառակը, սրանք սկսել են քողարկման, թաքցման, հետքերը մաքրելու գործընթաց: Հիմա կհայտնվեն մարդիկ, ովքեր ցուցմունքներ կտան, սրանք էլ կիմանան անմիջապես էդ մարդկանց տվյալները ու կամ փողերով բերանները կփակեն, կամ կուղարկեն արտերկիր կամ տվյալ մարդիկ կարժանան հոկտեմբերի 27-ի վկաների ճակատագրին` կանհետանան կամ արտերկում կմահանան:

Երկրորդ, թող այդ նույն իշխանությունները հասարակության համար բացահայտեն, թե ովքեր են այսօր հանձնում տարածքները, ում գլխավորությամբ եւ ում բանավոր խոստումներով: Թող ասեն, թե ով է հասարակությանը տանում թրքացման, թող այ էս հարցերին պատասխանեն: Մենակ Արզումանյանով ոչինչի չի լուծվի, թող սկզբից գան` Ջալալով, Օնիկով, Նիկոլով ու իրենց նման լիքը պատասխանատուներով: Թող բացահայտեն, թե ով էր այդ ժամանակ ԱԱԾ ղեկավարը, ով էր վարում հակահետախուզությունը: Ասում են Շուշի, բա Հադրութը, բա Քարվաճառը, բա Աղավնոն, ո՞վ է հանձնում այդ ամեն ինչը:

-Դե Փաշինյանը Վլադիվաստոկում հայ համայնքի հետ հանդիպման ընթացքում ասաց, որ ոչ ոք չի պլստալու:

-Շատ լավ, եկեք հիշենք նրա նույն` 2018թվ. լոզունգները, ինչ արեց չորս տարվա մեջ: Իր ղեկավարած տարիներին հաշվենք մեր զոհերի քանակը թե՛ խաղաղ ժամանակ, թե՛ պատերազմի ժամանակ: Երեսուն տարի մենք էդքան զոհ չենք ունեցել: Կամ ինչ է կատարվում ՀՀ-ի քաղաքացիական կյանքում` քաոս, օրը մի քանի սպանություն, ով է սրա պատասխանատուն: Սա ինչ է, եթե ոչ անկարողություն: Ամեն անգամ, երբ մարդիկ սկսում են հասկանալ, որ սրանք թրքահպատակ են` սրանք ինչ-որ մի բան անում են, որպեսզի ժողովրդի ուշադրությունը շեղեն, սա դառել է սովորություն:

Ես ասել եմ ու կասեմ` բոլորը պետք է պատասխան տան: Նախ առաջին հերթին թող պատասխանեն, թե ով էր Արցախում վարում 44-օրյա պատերազմը, այ էդ տեղից թող սկսեն, թող ասեն, թե ով է վարել պատերազմը: Էս հարցին թող պատասխանեն, հետո նոր անցնեն առաջ` կա՞ այդ պատասխանատուն, իհարկե չկա: 

Զրույցը` ԻԼՈՆԱ ԱԶԱՐՅԱՆԻ